InfoHub Logo

Amerıkandyq psıhopat fılmi trıller elementteri bar fılosofıalyq drama. Fılm amerıkandyq jazýshy Bret Iston Ellıstyń 1991 jyly jaryq kórgen «Amerıkandyq psıhopat» romanyna negizdelip 2000 jyly túsirilip, kórermenge jol tartty. Fılm rejıseri kanadalyq rejıser jáne kınosynshy Merrı Herron.

Fılm bizge Ýoll Strıtta «ómir súretin» Patrık Beıtmen atty keıipker jaıly baıandaıdy. Patrıktyń ómirine fılmniń basynda qyzyǵa da qyzǵana da qaraýǵa bolady. Sebebi, Patrık baı. Banktaǵy shotynda qomaqty aqshasy bar, óziniń dene bitimine kútinip qaraıtyn keıipker arqyly avtorlar bul fılmde tutynýshy qoǵamdy synǵa alatyny sózsiz.

Fılmde Patrıktyń eki jaǵy kórsetilgen. Birinshisi – barlyǵymyzǵa belgili baı «aq násildi» keńse qyzmetkeriniń obrazy. Ekinshisi – psıhıkasynda aýytqý bar, óz qoǵamyn jek kóretin qylmysker. Patrık sán qýyp, meıramhanalardy aralap júrip, ómirdi sezinýdi umytyp qalǵan adam dep sanasaq bolady. Qoǵam aldynda minsiz kórinetin obraz jasap alǵan Patrık adamdardy óltirý arqyly belgili bir emosıa alǵysy keledi. Biraq bir qyzyǵy Patrıktyń jasaǵan qylmystary aınalasyndaǵylarǵa múldem qyzyqsyz jáne baıqalmaıdy da. Bul tutynýshy qoǵamnyń kartınasy. Patrıktyń qasyndaǵylar da dál ózi sekildi kıim men úıdegi jıhazdardyń qaı brendke tıesili ekenin jattaýmen ómirlerin ótkizýde. Patrık óziniń boıyndaǵy eki tulǵanyń arasyndaǵy shekarany fılmniń sońyna qaraı joǵaltady. Kásipker Patrık pen qylmysker Patrık bir adamǵa aınalyp, Patrık jolda kezdesken adamnyń bárin óltirip, esinen adasady.

Fılmniń maqsaty nede? Fılm bizge adamdardyń kıetin betperdesi jaıly aıtpaq. Adamdar óziniń kim ekenin jasyrady. Jasyra kele ózderiniń kim ekenderin ózderi umytady. Bul qazirgi qoǵam men zamannyń beınesi. Adamdardyń bir-birine degen nemquraılylyǵy men qyzyǵýshylyq tanytpaýynyń kórinisi fılmde sýrettelgen.

Fılmdi óziniń sheberligimen árlegen Krıstıan Beıl róldi joǵary deńgeıde alyp shyqty. Krıstıan Beıldyń emosıalary arqyly Patrıktyń ishinde ne bolyp jatqanyn túsiný asa qatty kedergi týdyrmaıdy.

Bul fılm óz kórermenin ár býynnan tabady. Fılmdi tamashalaǵannan keıin barlyq kórermen «nege?» degen suraq qoıatyny anyq. Ár kórermen Patrıkqa qarap óziniń kıetin betperdesi jaıly oılanady degen senimdemin.

Ál Farabı atyndaǵy QazUÝ Kıno&Medıa mamandyǵynyń 1 kýrs stýdenti Elýbaı Ǵaızat

---