InfoHub Logo

Jyly ekenin sezgem osy únniń men,
Seniń úniń, ana, meıirim bildirgen.
Terbetkende áldı aıtyp sol únmen,
Besigimde-aq, ana, sonda kún kúlgen.

Sol bir únnen ómir syryn uǵa aldym,
Sodan bildim tabıǵatyn jyr-ánnin.
Oıansam da sol daýysty izdeppin,
Jylasam da sol úndi estip jubandym.

Oǵan álemdegi birde-bir til tanys emes edi. Tipti estı qoısa da, bóbek oǵan selt ete qoımaıtyn. Óıtkeni oǵan solardyń bárinen de jaqyn, bárinen de ystyq, bárinen de kúshti bir til boldy. Bóbek bul tildiń óziniń ana tili dep atalatynyn bilgen joq. Tek bul tilde óziniń anasy sóıleıtin edi - bóbekke bul til sondyqtan qýatty boldy, sondyqtan ystyq edi, sondyqtan jaqyn boldy. Osy tilde bir tunyp turǵan meıir bar edi. Bul tilde barlyq nárse túsinikti edi, túsiniksiz eshteńe de bolmaıtyn. Sondyqtan bóbek uıqysynan oıana salyp, aldymen osy tildi izdeıdi. Oǵan álemde budan artyq til bolýy da múmkin emes.

Bul tildiń bóbektiń ana tili ekendigin anasy biletin. Anasy bul tildiń kıeli babalardan jetken til ekendigin biledi. Áıel zatyna tán qasıetpen ant-sý isher. Bul tildi bóbegine buzbaı jetkizý - boryshy. Óıtkeni babalar bóbektiń babalary ǵoı. Onyń babalary kúshti bolǵan. Ony bóbektiń ózi de sezedi. Eger olar kúshti bolmasa, osyndaı áýezdi tildi muraǵa qaldyryp keter me edi.

Kesh bata bóbek uıqyǵa jatady. Biraq ol elegizip áldeneni izdeıtin. Osy kezde qarasha úıden ana áldıi estiledi. Bul bir ǵajaıyp mýzyka edi. Búkil ón boıynda Dalanyń úni jatatyn. Sol Dalanyń boıaýyn bar ıirimine, bar boıyna sińirip alǵan saz edi. Ol kúshti saz. Onyń boıynda babalardyń qýaty jatyr. Osy áýez bóbektiń tilindegi qasıetti sózderdi bóbektiń qulaǵyna jetkizedi. Al qasıetti sózde qasıetti kıe bar. Ol bóbektiń ana tilinde aıtylatyn sózder.

Qarasha úıdiń syrtynda - aspanda juldyz jymyń qaǵady. Sulý aı kúlimdeıdi.

Qarasha úıde gaýhar joq edi. Biraq onda ana áldıi bar ǵoı. Onda bóbek uıyqtap jatyr. Múmkin onyń bolashaǵy zor bóbek shyǵar.

Bóbek ósti. Endi onyń jan-dúnıesi bilim izdedi. Aınalada bóbekke tanys emes nárseler kóp edi. Ol jaratylystyń jumbaǵyn sheshkisi keletin. Osy kezde oǵan ana tili kómekke keldi. Bóbek osynyń barlyǵyn óziniń ana tilinde de ala alatyndyǵyna qýandy. Óıtkeni bul til oǵan besiginen tanys edi ǵoı. Bóbek osy tilde barlyǵyn ońaı uǵynatyn, ońaı qabyldaıtyn, ońaı túsinetin. Bul til oǵan eń jaqyn til edi. Ol osyǵan qýanypty.

"Sen netken qasterli til ediń! - dedi bóbek endi óziniń ana tiline. - Álemde maǵan senen asqan til joq! Sen bárinen de kúshtisiń!"

---