InfoHub Logo

Aqmaral anasymen birge ortalyq bazarǵa bara jatqan. Jolda, úıdiń buryshynda súıkimdi aq kepter otyrǵanyn kórip qaldy. Bireýden jábir kórgen sıaqty. Kózderi jáýdirep ary-beri ótken adamdardan meıirim kútetindeı. Kishkentaı qyz qorǵansyz qusqa jaqyn bardy. Jaıshylyqta usha jóneletin kepter qozǵalmaıdy. Jýas. Montany. Aqmaraldan úrkektep, attap sekirýge talpynǵanymen uzaǵan joq.

— Qyzym abaıla! Aýrý bolyp júrmesin, — dep anasy eskertý jasady.

— Qarańyzshy anashym! Qanaty synyq, sodan ushpaıdy! — Aqmaral muńaıdy.

— Názik júregińnen aınaldym! Ýaqyt shyǵyndap qaıtesiń, biz asyǵyspyz.

— Joq, anashym, kómekteskim kelip tur. Qandaı súıkimdi! Túri de áppaq! Biz qol ushyn bermesek, ólip qalady... Áıtpese ıtter jep qoıady...

— Jaraıdy, meseliń qaıtpasyn, — dedi anasy qyzynyń ótinishin jerge tastamaı.

Aqmaral men anasy ekeýi kepterdiń typyrlap, qarsylasqanyna qaramastan qoldaryndaǵy sómkege basyn qyltıta salyp aldy da, avtobýsqa otyryp qala ortasyna tartty. Suraı-suraı jan-janýarlardy emdeıtin dárigerlik klınıkaǵa keldi.

Kezekshi dáriger kepterdi tekserýge ishke alyp ketti.

— Jazylsa eken, — dedi ýaıymshyl Aqmaral muńaıyp.

— Jazylady, ushady áli, — dedi anasy kishkentaı qyzyn baýyryna qysyp, jasaýraǵan kózinen súıip.

— Shyn aıtasyz ba?! Synǵan qanatyn qalaı emdeıdi?

— Ota jasaıtyn shyǵar. Sál sabyr et qyzym.

— Maqul.

Arada on-on bes múınet ótkende júzi jaıdary dáriger kórindi:

— Dál ýaqytynda ákeldińizder, ota jasaıtyn boldyq.

— Alaqaı! Aq kepter ushady! — Aqmaraldyń kóńili aspandady.

— Durys aıtasyń qyzym! — dedi dáriger táte de qýanyp. — Ushady áýelep. Osylaı turasyzdar ma? Bir aınalyp kelińizder.

— Eshqaıda barǵym kelmeıdi, — dedi Aqmaral. — Kúte turaıyqshy anashym.

— Umytyp barady ekenmin, kepterdiń ıesi sizder me?

— Kósheden taptyq. Qanatynyń synǵandyǵyn baıqaǵan qyzym, qoıarda-qoımaı osynda ákelgizdi. — Aqmaraldyń anasy shynyn aıtty.

— Tospasańyzdar da bolady, ózimiz qamqorlyqqa alamyz.

— Úıge alyp keteıik, qaldyrmaıyqshy kepterdi, — dedi Aqmaral qıylyp.

— Júregiń jumsaq eken qyzym! Qus ta bolsa jaqsylyq jasaýǵa qushtarlyǵyń quptarlyq is! Olaı bolsa, kúte turyńyzdar, — dedi aq halatty táte kúlimsirep.

***

Aqmaralǵa ermek tabyldy. Túste mektepten kele sala balkondaǵy aq kepterge barady. Dákemen qatty tańylǵan qanaty qataıyp kele jatyr. Birer kúnnen keıin oraýyn sheshý kerek shyǵar.

Áınektelgen balkon ishi jyp-jyly. Qaǵaz qoraptan jasalǵan tomashadaı orynda ydysqa quıylǵan sý, qustyń jemi, bári bar. Shynashaqtaı qyz keptermen kádimgideı sóılesedi. Kóterip tizesine otyrǵyzady. Basynan syıpaıdy.

Bir kúni qus qanattaryn qomdap, tar balkonnyń ishinde ushýǵa áreket jasady.

— Ata, ata! Kepter ushýǵa daıyndalyp júr, — dedi Aqmaral kitap oqyp otyrǵan atasyna júgirip kelip.

— Bárekeldi! Árıne ushady! Óıtkeni Alla taǵala qus ataýlyǵa kókte samǵaý úshin qos qanat bitirgen. Aq kepter beıbitshilik qusy ǵoı! Onyń jazylýyna, qatarǵa qosylýyna seniń etken eńbegiń zor! Kúni erteń sen de boı jetesiń, joǵary oqý ornyn bitirip, qalaǵan mamandyǵyńdy alasyń! Elimizdiń eleýli adamy bolasyń! Táńiri aldyńnan jarylqasyn! Baqytty bol! — dedi atasy rıza peıilmen.

Erteńinde balkon terezesin ashqan Aqmaraldy kórgen kepter, tereze jaqtaýynda alǵa qaraı umsynyp-umsynyp sál turdy da, qanatyn jazyp pyr-r etip usha jóneldi.

— Qosh, kepterim! — dedi quıtaqandaı qyz qol bulǵap.

Áýelegen aq kepter bir kezde záýlim-záýlim úılerden asyp kórinbeı ketti.

---