InfoHub Logo

Bes qabatty turǵyn úıdiń podezinen shyqqan kishkentaı qyz oń qolyndaǵy qaýdyrlaq juqa dorbany áreń kóterip, qoqys jáshigine ákeldi de aýdara saldy. Japyraqtaı–japyraqtaı kesilgen, jartylaı jelingen appaq nandar! Quıtaqandaı qyz artyna da qaramastan qaıyra úıine júgire jóneldi.

 Buny kózi shalyp qalǵan Ǵabbas kárıa:

— Áı, balam–aý, obal emes pe?! — degenshe álgindegi qyz podezd esigine zyp bere kirip ketti.

 Nurjan mektepten qaıtyp kele jatqan. Kórshi kárıanyń ashýlanyp, basyn shaıqap otyrǵanyn kórip kidirdi.

— Ata, kimge renjip otyrsyz? – dedi sálemdesken soń.

— E-eı, balam-aı! Bireý toıyp sekiredi, bireý tońyp sekiredi... Sonaý-ý, surapyl Uly otan soǵysy jyldary biz toǵyz-on jastaǵy qarasıraq bala edik. Er-azamat jappaı maıdanǵa alyndy da, elde kempir-shal, áıelder men balalar qaldy. Belimiz qaıysyp jumysqa jegildik. Kúni boıy shóp shaýyp keshqurym ushyp-jyǵylyp qosqa áreń jetemiz de, sýly-sylpyń qara kójeni ishe salysymen tósekke qulaımyz. Tańǵy uıqy qandaı tátti! Oń qoly sholaq brıgadır Qısmettiń aıqaıynan atyp turamyz. Kishkene jata turaıyn deseń bitti, Qısekeńniń alty órim qamshysy jonyńnan taspa tiler! Bir ret qasymdaǵy Medet oıanbaı qalyp, brıgadırdiń qamshysynyń astynda qalǵany! O-oı, sondaǵy Medettiń shyrqyrap jylaǵany oıymnan shyǵar emes! Áli kóz aldymda. Bala dep aıaý, músirkeý bolmaıtyn brıgadırde. Sum soǵys tezirek bitse eken, aǵalarymyz ben ákelerimiz elge tezirek oralsa dep tileımiz dáıim. Sonda qarnymyz toıyp tamaq ta ishpeımiz! Nandy mólsherlep beredi! Jegimiz kep, tábetimiz tartyp turǵanymen suramaımyz.

Qazir she?! Nandy qadirlemeımiz! Qatyp qalsa qoqys jáshigine ákep tastaımyz! Ysyrapqa jol berip, aıaqasty etemiz! Olaı jasaýǵa bolmaıdy! Bir úzim nannyń qadir–qasıetin bilgen jón! Obal-saýap degen qaıda?!

Nurjan kárıanyń áńgimesin ún-túnsiz tyńdady.

---