InfoHub Logo

Erte, erte, ertede, kádimgi ıt pen qasqyr dos bolyp, tatý-tátti ómir súripti. Olar bireýge zorlyq jasaýdy bilmepti. Urlyqqa úıir bolmapty. Ekeýi tańerteńnen keshke deıin súıek kemirip kún kóripti. Eki dostyń osyndaı jarasymdy áreketine ózge ańdar syrttaı qyzyǵady eken. «Átteń, biz de sondaı bolsaq qoı» dep armandapty. Kúnderdiń kúninde bular turǵan jerden súıek tabý qıynǵa túsedi. Ekeýi kúnuzaq dala kezip, túk taba almaı qaıtady. Bir kún solaı bolady, eki kún solaı bolady. Úshinshi kúni shydamy taýsylǵan qasqyr: — Myna túrimizben ashtan ólemiz. Endi ekeýimiz jeke-jeke súıek izdep kórsek qaıtedi, — dep dosyna óz oıyn jetkizedi. — Bálkı, sonda birimiz bolmasaq birimiz maıly súıekke tap bolarmyz. It kelisedi. Budan bylaı qasqyr men ekeýi eki baǵytqa ketip, keshke bir-aq jolyǵysyp júredi. It sonda da oljaly orala qoımaıdy. Al qasqyr dosy maıy shylqyp turǵan súıek alyp kelip júredi. Kemire qalsań, dámi aýzyńnan ketpeıdi-aý. Áýelgide ıt oǵan jete mán bermegen. Ákelgenin kemirip, dosyna raqmetin aıtýdy ǵana biledi. Bir joly qasqyr shala-jansar qozyny arqasyna salyp ákeledi. Oljasyn jerge atyp uryp: — Al, baýyrym, mynanyń súıegi ekeýimizge kóp ýaqytqa jetedi, — deıdi masaırap.— Bárinen de munyń jup-jumsaq etin aıtsańshy! Ómiri tiri nársege qıanat jasap kórmegen ıttiń denesi titirkenedi. — Sen… buny qaıdan ákeldiń?.. — E, qaıdan bolýshy edi, qoıshynyń aýylynan. Óriste mundaı qozylar qaptap júr. Shetinen ákete ber. It onan beter shoshyndy. — Sen… sen baryp turǵan jaýyzsyń. Kishkentaı qozyny qalaısha aıamaısyń?! — Fı! Aıamaısyń deıdi. Nemene, sonda biz ashtan ólýimiz kerek pe? — Ashtan ólgiń kelmese súıek izde. Ekeýi uzaq talasady. Qasqyr óz áreketin durys deıdi. It onyń burys ekenin túsindirgisi keledi. Áıteýir ne kerek, ekeýi de bir toqtamǵa kele almaı, eki jaqqa ketedi. Qasqyr sol kásibine birjola oıysady. Al ıt bolsa oı men qyrdy sharlap, súıekterdi izdep, sonymen kún kóredi. Bir joly ıt maldy aýyldyń etegindegi saıda qýraǵan aq súıekti kemirip jatsa, jaıylyp júrgen qoraly qoıǵa qaraı jer baýyrlap kele jatqan eski dosyn kóredi. Osy kezde munyń boıyn áldebir janashyrlyq sezimi bıleıdi. Súıegin tastaı salyp, momaqan qozyny súıreı jónelgen qasqyrmen alysa ketedi. Qulaǵynan tistep alady. Anaý da qarap qalmaıdy. Munyń aıaǵyna ótkir azý tisterin batyrady. Olar alysyp-julysyp jatqanda qotan jaqtan qoıshynyń myltyǵy atylady. Qasqyrdyń záresi ushyp, qasha jóneledi. Qoıshy ıttiń bul áreketin baıqap qalǵan edi, endi ony úıine ákelip, jaraly aıaǵyn tańady. Sosyn tamaq berip, biraz kún baǵady. It bolsa kúnnen-kúnge jaqsaryp, tez arada aıyǵyp ketedi. Osydan soń qoıshy ony mal qorany kúzetýge paıdalanady. It tamaq bergen kisige adal qyzmet etedi. Senimdi kómekshisi bolady. Mine, sol kúnnen beri qaraı qasqyr men ıt bir-birimen óshtesip ketipti. Qoılar ıtti ózderine dos sanap, qasqyrdy kórse qashady eken. Osylaısha urlyqpen kún kóremin dep qasqyr ıesiz qalyp, aıdalada oqta-tekte ishi ýdaı ashyp ulıtyn kórinedi.

---