InfoHub Logo

Aqmola oblysyndaǵy memlekettik mektep-ınternattardaǵy balalardyń tamaqtanýy men qarjylyq jaǵdaıyna qatysty tekserýler eleýli kemshilikterdi kórsetti. Aýdıtorlar 14 mekemeni qamtyǵan tekserý barysynda búdjet qarajatynyń tıimsiz jumsalýy men júıeli problemalardy anyqtady.

Bul týraly Infohub.kz aqparat agenttigi habarlaıdy.

As mázirindegi kemshilikter

Ásirese, "Bilim-ınnovasıa" IT lıseı-ınternatyndaǵy jaǵdaı alańdaýshylyq týdyrdy. Munda oqýshylarǵa beriletin tamaq mólsheri belgilengen normadan bes ese kem bolǵan. Mysaly, bir porsıa súrmeli sút taǵamy 77 gramnan, al plov 178 gramnan berilgen. Bul normadan áldeqaıda az. Sondaı-aq, azyq-túlik esebinde de problemalar anyqtaldy, 421 myń teńgege baǵalanǵan ónimder negizsiz esepten shyǵarylǵan.

"Daryn" ınternatyndaǵy jaǵdaı

Daryndy balalarǵa arnalǵan "Daryn" ınternatynda da jaǵdaı máz bolmaǵan. Munda balalarǵa et, balyq, súzbe sıaqty ónimderdi normadan az bergen. Tipti, 2022 jyly rasıonnyń kóptegen bóligi qysqartylsa, 2023-2024 jyldary et, balyq jáne táttilerden únemdeý jalǵasqan. Baqylaý tarazylaýy da bul jaǵdaıdy rastady: 24 porsıa súrmeli sút taǵamynyń 16-sy, al 10 porsıa vıtamındi salattyń 9-y belgilengen salmaq normasyna sáıkes kelmegen.

Bilimi joq muǵalimder men sapasyz tósek-oryn

Aqkól aýdanyndaǵy "Mektep-ınternat-balabaqsha" arnaıy kesheninde 206 mıllıon teńgeden astam búdjet qarajaty lısenzıasyz bilim berýge jumsalǵan. Taǵy 25 mıllıon teńge arnaıy pedagogıka boıynsha tıisti bilimi joq muǵalimderge jalaqy retinde tólengen. Al "Aqkól" balalardy qoldaý ortalyǵynda qajetti bilimi joq mýzyka jetekshisi jumys istep, 2,4 mıllıon teńge alǵan. Buǵan qosa, munda balalar jasyna qaramastan birdeı normamen tamaqtandyrylǵan.

Bilim sapasynyń tómendeýi

Aýdıtorlar "Bilim-ınnovasıa" lıseıinde bilim sapasynyń da tómendegenin anyqtady. Buryn 82 paıyz bolǵan kórsetkish 67 paıyzǵa deıin túsken. Oqýshylardyń úlgerimi de, mysaly, algebradan 90 paıyzdan 77 paıyzǵa deıin tómendegen. Oqýshylardyń ózderi jaǵdaıdyń yńǵaısyzdyǵyn, zamanaýı qural-jabdyqtardyń jetispeýshiligin jáne tamaqtanýdyń nasharlyǵyn aıtady.

Qorytyndy

Aýdıt qorytyndysy boıynsha, anyqtalǵan kemshilikter jekelegen jaǵdaılar emes, júıeli sıpatqa ıe ekeni belgili boldy. Bilim basqarmasyna júıeni retke keltirý, jaýapkershilikti naqtylaý, qarjylyq josparlaýdy jaqsartý jáne satyp alýlardy baqylaýdy kúsheıtý tapsyryldy. Ásirese, balalardyń tamaqtanýyn uıymdastyrýǵa erekshe nazar aýdarylýy qajettigi aıtyldy.