InfoHub Logo

Aqmıa, ýtaspa shóp (termopsıs lansetnyı, Thermopsis lanceolata) bıiktigi 40 santımetrge deıin jetetin, sabaǵy túzý, kóp jyldyq, shóp tektes ósimdik. Tamyr sabaǵy sulap jaıqala ósedi. Sabaǵynda butaqtary kóp, japyraqtary sur tústi, kezektesigi, úsh-úshten toptala ornalasqan. Japyraqtarynyń bólshekteri sopaqsha, jińishkeleý bolyp keledi. Qosymsha japyraqtary sabaqtarynan uzyn, sondyqtan bul ósimdiktiń japyraq tamyry bes salaly bolyp kórinedi. Gúlderi sary tústi, iri, sabaǵynyń úsh jaǵynda shoǵyrlanyp turady. Jemisi — uzyndyǵy 6 santımetrge deıin jetetin burshaq sıaqty qońyr tústi ári jalpaq bolady. Ol taýlardyń, tóbelerdiń tastaqty betkeılerinde, tyń jerlerde, shól jáne shóleıt aımaqtarda, al keıde aramshóp retinde egistikterdiń arasynda da óse beredi. Dári jasaý úshin ósimdiktiń jerge túsken bóligin, tuqymyn jınaıdy. Quramynda termopsın, gomotermopsın, metılsıtızın, pahıkarpın, anagırın degen alkaloıdter, ılik, qoımaljyń zattar, saponınder, smolalar, S vıtamıni bar.

Aqmıadan jasalǵan dárilerdiń qaqyryq túsiretin, ishek qurttaryn aıdaıtyp qasıetteri bar. Osyǵan baılanysty ol ókpe jáne joǵary tynys joldary qabynǵanda em úshin qoldanylady. Quramyndaǵy pahıkarpın atty alkaloıdtyń qasıetterine baılanysty qan tamyrynyń (arterıanyń) keıbir aýrýlaryn emdeý úshin jáne jatyrdyń bulshyq etterin jıyryldyrý úshin de qoldanýǵa bolady. Aqmıadan jasalǵan dárilerdi asqazan qabynǵanda, asqazanǵa jara túskende, keıbir qan aýrýlaryn emdeýge paıdalanýǵa bolmaıdy.

Qoldaný tásili

Maıdalanǵan aqmıa shóbiniń 0,6-1 gramyn qaınap turǵan 1 stakan sýǵa salyp jarty saǵat tundyrady da, sýytyp súzip alady. Daıar bolǵan dáriden 1 as qasyqtan kúnine 3 ret ishedi.

---