InfoHub Logo

(Ertegi qoıylym)

Qatysýshylar:
1. Erke
2. Aıan
3. Áje
4. Ańshy
5. Búrkit
6. Tulpar
7. Jel
8. Taǵdyr
9. Aıannyń ákesi
10. Aıannyń anasy
12. Birinshi qalyńdyq
13. Ekinshi qalyńdyq

Shymyldyq ashylǵanda sahnada úlken sandyq turady. Onyń eki jaǵynda eki perde tutylǵan. Ony masahana dese de bolady. Sandyqtyń oń jaǵynda asadal, sol jaǵynda aǵash tósek. Tósektiń ústinde saýytsaımandary: qalqan, qylysh, naıza, dýlyǵa jatady. Asadalǵa qorjyn ilingen. Sahnaǵa eki júrgizýshi shyǵyp, zalda otyrǵan balalarmen amandasady.

1-Júrgizýshi: Sálemetsińder me, balalar?!

2-Júrgizýshi: Biz búgin sendermen birge ertegishi ájeıdiń úıinde otyrmyz. Ertegini unatasyńdar ǵoı? (Balalardyń jaýaby)

1-Júrgizýshi: Ertegishi ájeıdiń ertegilerin biz de súıemiz. Bul ertegiler atalardyń, ájelerdiń aıtýymen ǵasyrdan-ǵasyrǵa, urpaqtan-urpaqqa jalǵasyp kele jatyr. Bizder olardy toı-dýmandarda, jıyndarda, merekelerde, tamashalarda atalar men ájelerdiń aýzynan estıtin bolsaq, endi olardy sender osyndaı teatrlardan da tyńdap, kózben kóre alasyńdar.

2-Júrgizýshi: Qazir sahnaǵa ertegishi ájeıleriń shyǵady. Al, myna sahnada kórip otyrǵan quralsaımandar ertegishi ájeıge kómekshi retinde qatysady.

1-Júrgizýshi: Ertegishi ájeı kelgenshe sahnada qandaı zattar bar ekenin durystap kórip alaıyq.

2-Júrgizýshi: Aldymen myna sandyqty ashyp kóreıik. Onda ájeı qyzyq-qyzyq ertegiler men ańyzdardy saqtaǵan deıdi.

1-Júrgizýshi: Óte sándi sandyq eken (Ashýǵa árkettenedi). Oı, mynaý ashylmaıdy ǵoı!

2-Júrgizýshi: Káne, men ashyp kóreıinshi (Oǵan da ashylmaıdy). Ashylmaıdy?!

1-Júrgizýshi: Múmkin, kilti bar shyǵar (İzdestiredi). Kilti kórinbeıdi ǵoı.

2-Júrgizýshi: Kel, birlesip ashyp kóreıik (Onda da ashylmaıdy). Joq, bolmaıdy eken! /Masahanadan ájeı shyǵady/

Áje: Amansydar ma, seriktesterim?! Áýrelenbeńder, báribir asha almaısyńdar. Birinshiden, bireýdiń múlkine, ásirese, bul zattarǵa ruqsatsyz tıisýge bolmaıdy. Ekinshiden, bular jaı zattar emes – sıqyrly zattar (Endi zalǵa qarap). OHo, meniń qonaqtarym qandaı kóp! Sálemetsińder me, balalarym?! Sender munda ertegi tyńdaý úshin keldińder me? Onda men ertegini senderge shyn yqylasymmen aıtyp berýge daıynmyn. Alaıda, aldymen myna sıqyrly zattardyń maǵan qaıdan, kimnen kelgenin túsindireıin.

Erte, erte zamanda meniń babalarymnyń babasy ańshy bolypty. Alaıda onyń úıi de, kúıi de, maly da, minerge aty da joq kedeı eken (Ol masahanadan qolynda sadaǵy bar ańshy qýyrshaqty alyp, júrgizýshige beredi). Ańshy bir kúni taldyń butaǵynda otyrǵan búrkitti kóredi (Ájeı endi masahanadan Búrkit qýyrshaqty alyp shyǵady). Búrkit ańshydan seskenip, butaqtan-butaqqa sekiredi. Biraq, ushyp kete almaıdy. Ańshy sadaǵyn alyp kózdeı bastaıdy. Sol kezde Búrkit adamsha sóılep qoıa beredi.

Búrkit: Toqtaǵyn, Adam! Meni atpa! Meniń qanatym synǵan, sondyqtan usha almaımyn, meni aıaı gór!

Ańshy: Aıa deısiń? Al, meni kim aıaıdy? Úsh kún boldy, ashpyn. Qaqpanyma da, toryma da ań, qus túsken joq. Keshir meni, endi seni atamyn! (Adyrnasyn kerip, jebesin soza bastaıdy)

Búrkit: (Typyrshyp) Asyqpashy, Adam! Meni atyp alǵanyńmen, tamaǵyńa jaramaımyn, báribir qarnyń toımaıdy.

Ańshy: Seni atyp alamyn da, terińdi sypyryp, ishine saban tyǵyp, kádimgi tiri búrkitke uqsatyp, bir baıǵa satamyn. Odan alǵan aqshama toıǵanymsha tamaqtanamyn. (Sadaǵyn qaıtadan kere bastaıdy)

Búrkit: Asyqpa, Adam! Meni óltirgenńńmen, bir kún ǵana toq bolasyń. Eger meni aıap, qanatymdy emdep jazsań, ómir boıy toq bolasyń. Basyńa úı de, kúı de bitip, kóńiliń kúıge tolady, baılar qataryna qosylasyń.

Áje: Ańshy kelisip, Búrkitti qolyna qondyryp, keń dalany kezip, neshe túrli emdik shópterdi izdeıdi. Birneshe kúnder ótkende ańshynyń meıiriniń arqasynda Búrkittiń qanaty jazylyp, ol ábden tyńaıyp, burynǵy myqty da zor qalpyna keledi.

Búrkit: Qaıyrymdy Adam, endi saǵan alǵysymdy aıtatyn kez jetti. Sen maǵan qanshama jaqsylyq jasadyń, emdediń, tamaqtandyrdyń, keıde men úshin óziń ash júrdiń. Endi men de seniń jaqsylyǵyńdy jaqsylyqpen qaıtaraıyn. Otyr meniń arqama. Seni tek jaqsylyq pen baqytqa bólengen ólkege alyp baraıyn (Búrkit ańshyny arqasyna otyrǵyzyp, birneshe belderden, ózenderden, kólderden, taýlardan ushyp ótedi. Aqyrynda jasyl baqty alqaptaǵy bir áppaq úıdiń aldyna baryp qonady)

– Ańshy, mynaý endi seniń úıiń bolady. Bul úıde tórt túrli sıqyrly zat bar. Mynaý asadal, onyń ishi qalaǵan taǵamdar men úıge qajetti zattarǵa toly. Al, myna qorjynnyń ishinde babalardan qalǵan birneshe túrli mýzykalyq aspaptar bar. Olar qalaǵan áýenińdi oınap, kóńilińdi kóteredi, elińniń ańsaǵan armanyn shertedi, mahabbat kúıin kúmbirletedi. Sandyqtyń ishinde ózderiń súıip tyńdaıtyn ertegiler, ańyzdar saqtalǵan. Olar seniń ómirińdi gúldendiredi. Aǵash tósek bolsa, seniń tynyshtyǵyńdy kúzetip, tátti uıqymen terbetedi.

Sen úsh túrli shartty oryndasań ǵana bul zattar ózderiniń sıqyrly qasıetterin saqtaı alady. Birinshisi – sen qart adamdardy qadirlep, ómir boıy syılap júrýge tıissiń. Keıin ózińniń de qartaıatynyńdy bil. Qarttyqtyń aqyldylyq, danalyq ekenin árqashan da esińde saqta. Ekinshi shart – eshqashan eńbekten qashpa, seniń baılyǵyń da, densaýlyǵyń da etken eńbegińe baılanysty. Úshinshi shart – ózgeniń ómirine qıanat, qastandyq jasama. Osy sharttardy óziń, balalaryń jáne nemereleriń buljytpaı oryndaıtyn bolsa, seni qorshap turǵan myna zattardyń sıqyrlyq qasıeti sarqylmaı, dáýletiń arta túsedi.

Áje: Mine, sodan beri osyndaı sıqyrly zattar árbir úıde adamdarǵa qyzmet etip, baqyt, baılyq, tynyshtyq pen bereke ornatyp keledi.

1-Júrgizýshi: Áje, qorjyndy ashyp, ishinde qandaı mýzykalyq aspaptar saqtalǵanyn kórýge bola ma?

Áje: Bolady, biraq sen aldymen qazaq halqynyń qandaı mýzykalyq sapaptaryn bilesiń, sol jaıynda aıtyp bershi.

1-Júrgizýshi: Meniń biletinim: dombyra, qobyz, qyl qobyz, nar qobyz, shańqobyz.

2-Júrgizýshi: Meniń biletinim jetigen, ol arfaǵa uqsaıdy, onyń jeti shegi bar. Taǵy daýylpazdy bilemin. Ol qazan sıaqty, betin kón terimen qaptap qoıady. Ony kóbine ań aýlaýda qoldanady: Tý-tý-tam! Tý-tý-tam! Sonymen birge elge jaý shapqanda elge habar berý úshin de qoldanady.

Áje: Qorjynda bulardan basqa da aspaptar bar. Olardy babalarymyz qaldyrǵan. Olar jaıynda bilmeýleriń de múmkin. Máselen, mynaý sazsyrnaı / qorjynnan shyǵarady/.

2-Júrgizýshi: Keremet! Balalar, qarańdarshy, formasy qazdyń jumyrtqasyna uqsaıdy, biraq eki tesigi bar eken. Buryn muny kórmegen edim. Shamasy, balshyqtan jasalǵan-aý?

Áje: Sondyqtanda ol sazsyrnaı atalǵan, ıaǵnı topyraq pen qumnan jasalady.

2-Júrgizýshi: Munymen qalaı oınaýǵa bolady?

1-Júrgizýshi: Menimshe, ony úrlep oınaý kerek sıaqty. Káne, kóreıinshi.

Áje: Má, oınap kór. (Ol N.Tilendıevtiń bir shyǵarmasyn oınaıdy.)

2-Júrgizýshi: Balalar, tyńdańdarshy, qum jyrlap turǵandaı, tipti qum tóbe kóship kele jatqandaı. (Ájeı sol kezde sandyqtan materıaldan jasalǵan qum tóbeniń beınesin alyp shyǵady.) Men buryn mundaı kishkentaı aspaptan úlken qum tóbeniń úni shyǵatynyn estip kórmegen edim. Ne degen keremet!

Áje: Balam, solaı, adamnyń qıaly sheksiz (Qorjynnan taǵy bir aspapty alyp shyǵady) Al, myna aspapty «Asataıaq» deıdi (ózi oınaıdy).

2-Júrgizýshi: Áje, keń dalada at shaýyp bara jatqandaı sezinip turmyn. Jaly jelmen jelbiregen qulynshaqty da kórip turǵandaımyn: Tatat-tatat-tatat! Tatat-tatat-tatat! (Kúledi)

Áje: Qulynshaǵym meniń, jaqsy oınaıdy ekensiń!

1-Júrgizýshi: Mynaý taǵy bir aspap. Ony

«Daýylpaz» dep ataıtynyn bilemin. (Oınaıdy)

2-Júrgizýshi: Bul aspapty oınap, batyrlardy joryqqa shaqyrady. Eı, batyrlar, alǵa attanyńdar! (Ózi batyr kıimin kıip, batyrǵa uqsap shyǵa keledi) Eı, batyrlar, káne, maǵan erińder! Attandyq joryqqa!

Tra-ta-ta! Tra-ta-ta! Tra-ta-ta!

Áje: Oı, meniń erkeshim, meniń tentegim! Durys aıtasyń, babalarymyz daýylpazdyń únimen batyrlardy joryqqa shaqyryp, eldi, jerdi jaýlardan qorǵaǵan. Sóıtip, keremet erlikter jasaǵan.

Al, mynaý – sybyzǵy (Sybyzǵyny shyǵarady). Munyń názik únimen ádemi ertegiler men ańyzdardy jyrlaıtyn bolǵan.

2-Júrgizýshi: Áje, qarańyzshy, qandaı qyzyq aspap, ózi kishkentaı qoldary bar Qańbaqshalǵa uqsaıdy. Qandaı jep-jeńil! Onymen qalaı oınaıdy eken?

Áje: Muny «Jelbýaz» dep ataıdy.Ony eshkiniń terisinen jasaıdy. Qymyz saqtaıtyn sabaǵa uqsaıdy. Muny moıynǵa ilip qoıyp oınaıdy. Má, oınap kór. (1-Júrgizýshi oınaıdy)

2-Júrgizýshi: Qandaı ǵajap ún! Samal jel keń dalany jelpip ótkendeı!

Áje: Solaı, botaqanym! Osyndaı sıqyrly áýender sıqyrly sandyqty ashyp, sıqyrly ertegiler men ańyzdardy atadan balaǵa, baladan nemerege, zamannanzamanǵa taratyp jatady. Bizder ony jeldiń ýilinen estip, ony, balalar, senderge jetkizemiz. Mine, sondaı ertegilerdiń bireýi mynandaı (Sandyqty ashqanda, ishinen jel kógershindeı qalyqtap ushyp,sahna tóbesine kóteriledi)

Áje:
Jelim, jelim – tulparym!
Jelim, jelim – suńqarym!
Jer ústinde jaqsylyq
Kórip júr ǵoı tapshylyq.
Jaqsylyqqa zulymdyq
Urynady qas qylyp.
Sol zulymdyq qashanǵy
Jer ústinde jasaıdy?

Jel:
Mahabbat pen qastandyq
Bir-birine bastan tik
Jaralǵan ǵoı teginde.
Zulymdyq kóp ómirde.
Mahabbat dese aqyndar
Alaý atyp lapyldar.
Zulymdyq ony óltirmek,
Barynsha zıan keltirmek.

Áje:
Keń dúnıe tyńdasyn,
Mahabbatty jyrlashy.
Jyrlashy, jel, jyrlashy,
Álemdi kezip tynbashy.
Sen jyrlaǵan ańyzdy
Tyńdasyn jurt jany izg,.
Men tynbaımyn, tynbaımyn,
Men jyrlasam jyrlaımyn
Tólegen men Jibekti,
Eńlik penen Kebekti.
Qozy menen Baıandy,
Aqqý jaıly aıaýly.
Jyrlamaıdy jel tekke,
Jetkizemin men kópke.
Úlgi bolsyn basqaǵa,
Kárige de, jasqa da.

(Jel ushyp ketedi. Áje sandyqtan qýyrshaq Erke qyzdy shyǵarady, odan ári ony júrgizýshi alyp ketedi. Áje Jeńesheniń rólin atqarady)

Jeńeshe:
Erke sulý sen be ediń?
Netken ǵajap kelbetiń!
Aqqýdaısyń ádemi,
Syzyp ótken kól betin.
Sen bir kóktiń juldyzy,
Jerdiń jaqut qundyzy.
Barlyq aqyn jyrlaǵan,
Kózdi tartqan qyrmyzy.

Erke:
Qıystyryp maqtaısyń,
Boıymnan min tappaısyń.
Jany jumsaq anamdaı
Aıalaısyń, baptaısyń.
Qaıyń ba eken, tal ma eken?
Sheker me eken, bal ma eken?
Meni súıer bir jigit
Bul ómirde bar ma eken?
Jeter edim bar bolsa,
Qaıyspas er nar bolsa.
Máńgi súıip óter em,
Aqqýdaıyn jar bolsa.

Jeńeshe:
Muńaıma, Erke, muńaıma,
Muńaıý álde unaı ma?
Ajaryń aımen teńesken,
Sulýsyń ǵajap bylaı da.
Kúlimdeseń kúndeı bop,
Jigit bitken shydaı ma?
(Kópshilikke qarap)
Eı, jigitter, órimder,
Bizdiń toıǵa kelińder.
Aıdaı sulý arý qyz,
Erkeshimdi kórińder!

Mýzyka oınalyp, birinshi qalyńdyq shyǵady. Qolynda sybyzǵy jáne qumyrasy bar. Sybyzǵysyn oınaǵan kezde qumyra ishinen jylan shyǵyp, bıleı bastaıdy.

Jeńeshe:
Erkejan, buǵan qalaı qaraısyń?
Jigitti kimge balaısyń?

Erke:
Mundaı óner belgili,
Sıqyrshy deıdi el muny.
Qalamaımyn sıqyrdy,
Júrgen jeri quıtyrqy.

Birinshi qalyńdyq ketip, ekinshisi shyǵady. Onyń qolynda beti oramalmen jabylǵan tabaqsha bar. Ony ashyp qalǵanda, ishinen jalt-jult etken asyl buıymdar kórinedi.

Qalyńdyq:
Erkejan, qalqam, qarashy,
Qalaǵanyńdy alasyń.

Erke:
Buıym emes asyl tasyń,
Keregi – tek mahabbatym!

Jarqyraǵan asyl tastardyń sáýlesi sónip, onyń ornyna qorqynyshty túrdegi Taǵdyr shyǵady.

Taǵdyr:
Men jalynmyn – Taǵdyrmyn,
Tanymasań – Táńirmin.
Baılyq ta meniń qolymda,
Dańq ta meniń qolymda.
Eshkim qarsy tura almas
Myna meniń jolymda!
Kútesiń meni, bilemin,
Men dep soqsyn júregiń.
Nege únsizsiń? Qoldy ber,
Júr menimen, sońyma er!
Oraımyn seni jaqutqa,
Bóleımin seni baqytqa!

Erke:
Ras, seniń ataǵyń zor,
Soǵan oraı shataǵyń mol.
Qumda jortqan kesirtkesiń,
Seni sonsha esirtken kim?
Baılyqty da, baqytty da,
Tartyp almaqsyń taqytty da.
Keregi joq onyń maǵan,
Ere almaımyn – jolyń qarań.
Qusqa keńistik aýa kerek,
Qulanǵa keń dala kerek.
Meniń-daǵy keń júregim,
Mahabbat dep eljireıdi.
Biraq, súıgenim sen emessiń,
Menimen sen teń emessiń!

Taǵdyr:
Eı, arý qyz, bulǵaqtama,
Qudiretime shyndap qara.
Kúlimdesem – kúndeımin
Ashýlansam – túndeımin.
Alyp kúshti pildeımin,
Qarsylasqandy júndeımin.
Alǵan betten taıynban,
Toıǵa jyldam daıyndal!
Jas jigit kórinedi.
Erke oǵan qadala qaraıdy.
Jigit te qyzǵa jaqyndaı túsedi.
Ekeýi birin-biri uǵysqandaı bolady.

Aıan: Áne, sol qyz...

Erke: Kútkenim osy edi...

Aıan: Men seni uzaq izdedim.

Erke: Óńim be, álde túsim be?

Aıan: Erkejan, shynymen sensiń be?

Erke: Aıanbysyń, janym, ańsaǵanym!

Aıan:
Men seni túsimde kórdim,
Áppaq bulttyń ishinde kórdim.
Álde neden qamyǵypsyń,
Álde meni saǵynypsyń.
Samuryǵymen saǵynyshtyń
Men de saǵan alyp ushtym.

Erke:
Kúttim seni, keletinińdi bildim,
Kúttim seni, óbetinińdi bildim.

Aıan:
Erkem, saǵan jetkenimshe,
Talaı taýdan ótpedim be?
Beles-beles belder qaldy,
Nebir ózen, kólder qaldy.
Saǵan arnap gúlder terdim,
Gúlmen birge gúlder dedim.
Saparymdy jalǵastyrdym,
Talaı tulpar almastyrdym.
Kóp bógetten óttim aman,
Aqyrynda jettim saǵan.
Taptym, mine, ǵashyǵymdy,
Baǵa jetpes asylymdy.

(«Kýá bol, aıym» áni oryndalyp jatady)

Taǵdyr:
Toqta, Aıan, tyńda meni,
Kim shaqyrdy munda seni?
Meniń bergen antymdy uq,
Meniń qatal saltymdy uq.
Jaqsy kórse kim Erkeni,
Opyq jeıdi túbi erteńi.
Qıankeski oıran salam,
Qanǵa bóger oılanbaǵan.
Asqaq arman kúl bolady,
Súıgen jaryń tul qalady.
Janarlary jasqa tolyp,
Ata-anań qul bolady.
Túnge aınalar úmit tańyń,
Osyny sen umytpaǵyn! (Ketedi)

Áje:
Zulymdyq bar bul ómirde,
Tek jamandyq tileginde.
Jaqsylyqty kóre almaıdy,
Júrgen jeri bolar qaıǵy.
Jazyńdy qys-toń qylady,
Qyzyl gúldi soldyrady.
Uqpady ony Aıan jigit,
Ot júrekte oıandy úmit.
Jaqsy habar jetkizýge,
Qustaı ushyp ketti úıine.

(Aıan tulparymen shaýyp bara jatady)

Aıan:
Zaýla, zaýla, tulparym!
Erke – meniń ińkárim!
Erke – asyl jaqutym,
Erke – arman baqytym!
Jelpindirip jel jańa,
Bilsin baıtaq keń dala.
Bilsin ony taýlar da,
Bilsin ony baýlar da.
Bilsin ony Anam da,
Bilsin barlyq adamdar.
Baqyttymyn men búgin,
Toı toılaıtyn keldi kún!

(Masahanadan Aıannyń ákesi men anasy shyǵady)

Aıan:
Armysyńdar, áke-sheshem!
Jettim, mine, aman-esen.
Týǵan úıim – altyn uıam,
Jaryq bergen jarqyn uıam!
Qýanyshpen ushyp kelem,
Ǵashyǵymdy qushyp kelem.
Ózi sulý kórkem sondaı,
Jan joq maǵan Erkejandaı.
Sonymen bir endigi ómir,
Jeńdi júrek, kóndi kóńil.
Bizder neden tosylamyz?
Endi tezdep qosylamyz.
Áke, bizge ber batańdy,
Er kóterer zor batańdy.

Ákesi:
Dala kezer bóri ǵana,
Qaıdan keldiń, peri bala?!
Óz jerińnen nege bezdiń?
Jat ólkeni nege kezdiń?
Daýyldama, jaýyndama,
Arýlar kóp aýylda da.
Sonyń birin ondaıda,
Tańdap alsań bolmaı ma?
Tilimdi alsań, solaı, bolsyn,
Bizdiń oıǵa oraı bolsyn.
Tyńdamasań eger meni,
Teris bata berem keri.

Anasy:
Tilep edim bir Alladan,
Soǵan táýba qylam, balam.
Baqyt izdep basqa jerden,
Jar taýypsyń basqa elden.
Taǵdyr solaı jazǵan shyǵar,
Aıaq solaı basqan shyǵar.
Mahabbatqa bóget bolman,
Deımin: «Táńir, jebep qolda!»
Jolyń bolsyn, tarylmasyn,
Balam, aldan jarylqasyn!

Aıan:
O, Anam meniń, aınalaıyn,
Tilegińe saı bolaıyn.

(Anasyn qushaqtap, basyn keýdesine qoıady)

Anasy:
O, Mahabbat Perishtesi,
Jaqsylyqty sen isteshi!
Allanyń aq pendesine –
Qonshy Aıannyń keýdesine.
Jastar Táńir syıy dep shyn,
Birin-biri súıip ótsin.
Jamanshylyq jýymasyn,
Armandaryn bıik etsin.
O, Mahabbat Perishtesi,
Júrer jolyn tegisteshi,
Qýandyryp analaryn,
Baqyt qushsyn balalarym!

Áje: Ana balasynyń mańdaıynan súıip, jaqsy tilek tilep, janary jasqa tolyp, úıdiń ishinde qalyp qoıady. Ákesiniń oń bata bermegeni úshin, balasynyń bul saparynyń sátti aıaqtalýyna senbeıtin sekildi. Aıan bolsa, súıgen jarym Erke qaıdasyń dep, tulparymen qustaı ushyp bara jatady, qolynda Erkeniń jibek oramaly. Sol kezde tasadan Taǵdyr shyǵa kelip, sadaǵymen Aıannyń tý syrtynan jebesin tartyp jiberedi. Aıan kólge ushyp túsedi de, tabanda aqqýǵa aınalyp ketedi. Sodan keıin kókka qarap, qatty qıqýlap án salady.

Sol tusta Erke kól jaǵasynda jaýtańdap, jaryn tosyp turady.

Erke:
Aqqýym meniń, Aıanym meniń,
Estımisiń, aıaýlym meniń.
Men senimen birge bolam,
Birge ushyp, birge qonam.
Teńiz, dala, orman-toǵaı
Seni ushyrsyn maǵan qaraı.
Janym-tánim senimen bir,
Ózińdi oılap egilemin.
Aqqý qusym – ǵashyq qurbym,
Seni asyǵa tosyp turmyn!

(Osy kezde qasyna Taǵdyr keledi de, kekesindi túrde til qatady)

Taǵdyr:
Sulý, nege muńaıasyń?
Endi seni kim aıasyn?
Men sertimde tura bildim,
Aıanǵa qylysh ura bildim.
Bar kúshimdi salyp birden,
Batyrlyǵymdy tanyttym men.
Erke, endi senesiń be?
Aıtqanyma kónesiń be?

Erke:
Batyr emes, baqyrsyń sen,
Syrttan atqan qatynsyń sen!

Taǵdyr:
Onda, Erke, kór mynany,
Qylyshymnan ol qulady!

(Erke kókke qaraı qolyn sozyp, Táńirden Taǵdyrdy jazalaýyn suraıdy)

Erke:
Taǵdyr, seni qarǵys atsyn!
Taǵdyr, seni qarǵys atsyn!

(Alaı-túleı mýzyka oınalyp, Taǵdyr kókke ushyp baryp, jerge bult bolyp oralyp, dáý qaraqurtqa aınalyp ketedi)

Erke:
Bári bitti, bári tyndy...
Qaraqurttyń kári syndy..
Jarym óldi, men de...
Jalǵyz qalmaımyn jerde.
Al, Taǵdyr, sen adam emessiń,
Qaraqurtsyń – elessiń,
Eshkimge jaqsylyq bolsyn demessiń.
Oılaıtynyń zulymdyq, qıanat,
Júregińde qalǵan uıalap.
Sol úshin seni qarǵaımyn,
Qudaıdan surap zarlaımyn.
Kún sen úshin tas túnek bolsyn,
Tartqanyń qasiret bolsyn!
Óz zulymdyǵyń ózińdi jutsyn,
Bul ómirden kózińdi qurtsyn!
Al, mahabbat kókteı bersin,
Jumaqqa qaraı betteı bersin!...
/Ózi kólge qaraı betteıdi/
Aqqýym meniń, asylym meniń,
Ózińe kópten asyǵyp edim.
Ant etem – endi bolamyn birge,
Qasyńda máńgi qalamyn múlde.

/Oramalyn tolqynǵa tastaıdy, Aqqý kelip ony tumsyǵymen ilip alady. Erke sýǵa sekirip ketedi de, ózi de aqqýǵa aınalady. Sóıtip, eki aqqý bir-birimen aımalasyp, aıdynda júzip bara jatady/

Áje:

Mine, sandyqta saqtalǵan ertegi-ańyzdyń biri osylaı aıaqtaldy.

(Shymyldyq)

---