InfoHub Logo

Amerıka Qurama Shtattarynyń senatory Djon Osoff, Tramp áýletiniń Qazaqstanmen baılanysty vólfram jobasyna qatysy bar ekenin málimdep, daý týdyrdy. Onyń aıtýynsha, bul mámile jemqorlyqtyń belgisi jáne oǵan 1,6 mıllıard dollar salyq tóleýshi aqshasy jumsalýy múmkin.

Bul týraly Infohub.kz aqparat agenttigi habarlaıdy.

Tramptyń uldary men Qazaqstan vólframy

Senator Osofftyń aıtýynsha, Qazaqstan prezıdenti Qasym-Jomart Toqaev ótken qyrkúıekte Trampqa qońyraý shalyp, vólfram óndirý quqyǵyn amerıkandyq kompanıaǵa bergisi keletinin jetkizgen. Osydan keıin bir aı ótken soń, Donald Tramptyń uldary, kishi Donald jáne Erık, bul kelisimge umtylǵan kompanıadan úles alǵan.

Osoff bul jaǵdaıdy synǵa alyp, «Erık pen Don Skaılaın kompanıasynan úles alǵasyn qazaqtar álgi kompanıaǵa álemdegi eń iri ıgerilmegen vólfram resýrsyn bere saldy» dep málimdedi. Onyń sózinshe, budan keıin Tramp basqaratyn Aq úı Qazaqstandaǵy ken jobasyn qarjylandyrý úshin 1,6 mıllıard dollar bólý týraly sheshim qabyldaǵan.

Vólframnyń mańyzy jáne Tramptardyń róli

Senator Osoff bul jaǵdaıǵa qynjylys bildirip, «Amerıkalyqtar benzınge, azyq-túlikke, medısınalyq qyzmetke aqsha tappaı otyr. Al mynda 1,6 mlrd dollar salyq tóleýshiniń aqshasy Qazaqstanǵa baǵyttalmaq» dedi.

Tramptyń uldary Skaılaın kompanıasyna kirgennen keıin, olar Cove Capital-men birigip Kaz Resources kompanıasyn quratynyn habarlaǵan. Bul kompanıa Qaraǵandy oblysyndaǵy Soltústik Qatpar jáne Joǵarǵy Qaıraqty vólfram ken oryndarynyń shamamen 70 paıyzyna ıelik etedi.

Vólfram – qorǵanys, avıasıa, elektronıka jáne óndiris salalarynda keńinen qoldanylatyn mańyzdy metal. AQSH Beıjińge táýeldilikti azaıtý maqsatynda Qazaqstandaǵy ken jobalaryna qyzyǵýshylyq tanytýda. Tramptyń uldary bul jobada ózin pasıv ınvestor retinde kórsetýge tyrysqanymen, senator Osoff olardyń áreketin synǵa aldy. Astana bul aıyptaýlarǵa ázirge resmı jaýap bergen joq.