InfoHub Logo

Soltústik Atlantıkada AQSH áskerı kúshteri Reseıdiń «Marınera» munaı tankerin toqtatyp, bortqa desant túsirdi. Bul oqıǵa sanksıalyq qysym men teńizdegi munaı tasymalyna qatysty geosaıası teketirestiń jańa kezeńin aıqyndap otyr.

Bul týraly Infohub.kz aqparat agenttigi habarlaıdy.

Ne belgili

AQSH Qarýly kúshteriniń Eýropalyq qolbasshylyǵy (EUCOM) 7 qańtarda taratqan málimetke saı, «Marınera» AQSH sanksıalaryn buzdy degen kúdikpen ustalǵan. Amerıkalyq taraptyń aıtýynsha, tanker eki aptadan asa baqylaýda bolǵannan keıin oǵan desant túsirilip, qazir Shotlandıa baǵytyna konvoımen jetkizilýde.

Keme Soltústik Atlantıka akvatorıasynda Venesýela jaǵalaýynan shyqqan soń ustalǵan. Ustalý sátinde ol AQSH jaǵalaýynan shamamen 4 myń shaqyrym qashyqta bolǵan.

Marshrýt jáne sanksıalar

Buryn «Bella 1» degen ataýmen júrgen bul tanker 2024 jyly AQSH-tyń sanksıalyq tizimine engizilgen. CNN deregi boıynsha, bastapqyda tanker Irannan Venesýelaǵa bet alǵan, alaıda shamamen bir aı buryn baǵytyn ózgertip, yqtımal ustalýdan jaltarýǵa tyrysqan bolýy múmkin.

Oqıǵadan keıin buqaralyq aqparat quraldary Venesýela jaǵalaýyndaǵy keminde bes tankerdiń múmkin arestten qaýiptenip, týlaryn Reseı týyna aýystyrǵanyn habarlady.

Resmı ýájder jáne qarsy pikir

AQSH jaǵy áreketin sanksıa rejımin qamtamasyz etý qajettiligimen túsindiredi. Al Reseı Syrtqy ister mınıstrligi tankerge «mırnyı statýsyna saı kelmeıtin shamadan tys nazar aýdarylyp otyrǵanyn» aıtyp, kemeniń halyqaralyq quqyq normalaryn saqtaı otyryp júzip kele jatqanyn málimdedi. Máskeýdiń aıtýynsha, tanker men AQSH jaǵalaýynyń araqashyqtyǵy – shamamen 4 myń shaqyrym.

Qandaı kúshter tartyldy

Reuters agenttiginiń derekkózderi operasıaǵa AQSH pen odaqtastarynyń avıasıasy qatysqanyn aıtady: olardyń qatarynda janarmaı quıýshy Boeing KC‑135T Stratotanker, AQSH ÁÁK-niń patrúldik Boeing P‑8A Poseidon, Ulybrıtanıanyń Boeing Poseidon MRA1 jáne arnaıy maqsattaǵy Pilatus U‑28A Draco ushaqtary atalady. Sondaı-aq Reseı taraby tankerdi ilesip júrý jáne qajet bolǵan jaǵdaıda qoldaý kórsetý úshin Soltústik Atlantıkaǵa súńgýir qaıyq pen ÁTK bólimshelerin jóneltkenin habarlaǵan.

Aımaqtaǵy áseri

Reuters deregi boıynsha, «Marıneramen» qatar Latyn Amerıkasy sýlarynda taǵy bir munaı tankeri de AQSH tarapynan perehvattalǵan. Sarapshylar mundaı qadamdar munaı tasymalyna táýeldi dálizderdegi táýekeldi arttyryp, sanksıalyq baqylaýdyń kúsheıgenin kórsetedi.