InfoHub Logo

Aqtaý qalasynda naýryz aıynyń 23-29 kúnderi aralyǵynda qoǵamdyq-gýmanıtarlyq baǵyttaǵy jalpy bilim beretin pánderden respýblıkalyq olımpıada ótip jatyr. Keshe, 24 naýryz kúni Mańǵystaý oblysynyń ákimi Eraly Toǵjanov olımpıadanyń saltanatty ashylý rásimine qatysty, dep habarlaıdy Mańǵystaý oblysy ákiminiń baspasóz qyzmeti.

- Bul synǵa qatysý úlken abyroı ǵana emes, ár óńir men mektep atynan kelip otyrǵan qatysýshylar úshin úlken jaýapkershilik. Sizdiń jeńisińiz qazaqstandyq bilimniń báseke qabilettiligin arttyrýǵa kómektesetin bolady. Óıtkeni sizder elimizdiń zıatkerlik áleýetin quraısyzdar. Sizdiń bilimińiz, shyǵarmashylyǵyńyz ben talantyńyz Qazaqstannyń bolashaǵyn órkendetý jolynda óte qajet, - dep ataı otyryp, Eraly Toǵjanov olımpıada qatysýshylaryna sáttilik tiledi.

N. Jantórın atyndaǵy mýzykalyq-drama teatrynyń holynda olımpıada qatysýshylary men ádilqazylar alqasyna arnap Mańǵystaý oblysynyń ulttyq taǵamdary men qoldanbaly óner buıymdarynan kórme qoıylyp, «Kıeli meken - Mańǵystaý!» atty ádebı-mýzykalyq kompozısıa oınaldy.

Sondaı-aq, Mańǵystaý óńirinde elimizdiń túkpir-túkpirinen shyqqan olımpıada  úzdikteri qaýyshty. Astana jáne Almaty qalasy, Aqmola, Aqtóbe, Almaty, Atyraý, Batys Qazaqstan, Jambyl, Qaraǵandy, Qostanaı, Qyzylorda, Soltústik-Qazaqstan, Ońtústik-Qazaqstan, Pavlodar, Shyǵys Qazaqstan oblystary, Almaty qalasyndaǵy Orynbek Jáýtikov atyndaǵy  respýblıkalyq mamandandyrylǵan fızıka-matematıkalyq orta mektep-ınternaty, Almaty, Oral, Atyraý, Óskemen qalalaryndaǵy Nazarbaev Zıatkerlik mektebi, Almaty qalasyndaǵy «Bóbek» ulttyq ǵylymı-praktıkalyq bilim berý jáne saýyqtyrý ortalyǵynyń «Ózin-ózi taný» gımnazıasy, Almaty qalasynyń Abaı atyndaǵy daryndy oqshýlarǵa arnalǵan  respýblıkalyq mektep-ınternaty atynan shyǵatyn 21 komandadan barlyǵy 586 oqýshy baq synasatyn bolady. Mańǵystaý oblysynyń namysyn 41 oqýshy qorǵaıdy.

Ótken jylǵy olımpıada jeńimpazdary onlaın-translásıa arqyly aldaǵy zıatkerlik saıys qatyýshylaryna sáttilik tiledi.

Olımpıada qoǵamdyq-gýmanıtarlyq baǵyttaǵy pánderdi qamtıdy. Oqýshylar qazaq tili men ádebıeti, orys tili men ádebıeti, qazaq mektepterinde oqıtyn oqýshylar orys tili páninen, orys tili mektebinde oqıtyn oqýshylar qazaq tili páninen, fransýz tili, nemis tili jáne aǵylshyn tili, Qazaqstan tarıhy jáne quqyqtaný negizderi pánderinen saıysqa túsetin bolady.

Olımpıadanyń İ, İİ týry 25 jáne 26 naýryz kúnderi «Bilim - ınovasıa» oblystyq lıseıiniń bazasynda ótedi.

27 naýryz kúni úılestirý jumystaryn júrgizý josparlanýda.

28 naýryz kúni olımpıada qorytyndysy shyǵyp, jeńimpazdardy marapattaý rásimi bolady.

Bos ýaqytta olımpıada qatysýshylaryna arnap mádenı-tanymdyq, sporttyq, oıyn-saýyq sharalary uıymdastyrylady.

---