InfoHub Logo

Shaǵyn as úıdi bezendirýge shyǵarmashylyq turǵyda qarap, ár nársesin jaqsylap oılastyrsa, ony naǵyz óner týyndysyna aınaldyrýǵa bolady. Biz kez kelgen as úıdi sáni men jaılylyǵyn buzbastan qalaı qaıta jasap shyǵýǵa bolatyny týraly keńestermen bólisemiz.  

1. Jaryq kóbirek bolý kerek

Qarańǵy buryshtar kórer kózge keńistikti taryltyp tastaǵandaı kórinedi. Sondyqtan as úı keń ári jaryq kóriný úshin tabıǵı jaryqtaný máselesin sheship alǵan mańyzdy. Ashyq tústi bezendirýlerge tańdaý jasaýǵa keńes beremiz. Sonda keńistik keń sıaqty kórinip, siz qıalyńyzǵa erik berip, tús aksentterin talǵamyńyzǵa qaraı ornalastyra alasyz. Mysaly, garnıtýrany qabyrǵanyń túsine sáıkes, tabıǵı materıaldardyń asa qanyq emes reńderinen tańdaýǵa bolady.

2. Jyltyr jáne aınaly better

Keńistik máselesin sheshýdegi kelesi kómekshińiz – jaryqty shaǵylystyratyn better. Jyltyr qasbetterdi (fasad) paıdalaný arqyly siz tar as úıdiń ózin vızýaldy túrde keń etip kórsete alasyz.

As úıde aınaly better tipti erekshe kórinedi. Bul úlken aına, aınaly fartýk nemese aınaly bir qabyrǵa bolýy múmkin. Bólmeniń pishini men ólshemin ózgertip kórsetýge kómektesetin kez kelgen shaǵylystyratyn bólikter oryndy jáne sony sheshim bolmaq.

3. Túster gammasyn oılastyrý

As úı bólmesin súıikti reńderińizben qoryqpastan bezendire berýge bolady. Biraq esińizde bolsan, úsh-tórt tústen artyq reńderdi paıdalanbańyz. Áıtpese dızaınnyń negizgi ıdeıasy «joǵalyp ketýi» múmkin.

Ústeldiń ústińgi taqtaıy jáne qabyrǵa paneli kereǵar tústermen erekshe kórinedi. Osylaısha siz keńistikti vızýaldy túrde aımaqtarǵa bólip, qajetti aksent bere alasyz. As úıińizdegi qandaı element negizgi róldi atqaratynyn anyqtap alyńyz. Bul perdeler, oryndyqtarǵa arnalǵan qaptamalar, dastarhan japqysh nemese ústel bolýy múmkin. Eger as úıdiń qabyrǵalaryn ashyq túspen boıaǵyńyz kelse, garnıtýralarǵa jumsaq reń berýge tyrysyńyz.

Esińizde bolsyn, qabyrǵadaǵy maıda sýretter bólmeni keń kórsetedi. Al iri sýretter kerisinshe, onyń ólshemin kishireıtedi. Eger siz tóbeniń bıik kórsetkińiz kelse, tik geometrıalyq sýretterdi tańdańyz.

4. Jaryqtandyrýdy kemshiliksiz jasańyz

As úıde jasandy jaryqtandyrýdan mańyzdy eshnárse joq. As úıdi jaryqtandyrýdaǵy eń basty qaǵıda — kóp deńgeılilik. Demek, árbir fýnksıonaldy aımaq óziniń jaryq kózimen jabdyqtalýy qajet. Áıtpese as úı qarańǵy ári jaısyz bolyp qalady.

As úıdi jalpy jaryqtandyrýdyń eń sátti sheshimi — tóbeniń qaq ortasyndaǵy bir lústranyń ornynan tóbege ornatylǵan shamdaldardy paıdalaný. Eger siz jaryqtyń jaryǵyn retteıtin qosqysh ornalastyrsańyz, odan esh utylmaısyz.

Jumys aımaǵyn óte saýatty túrde jaryqtandyrý qajet. Bul jaryq dıodty kómeski jaryq ornatylǵan áınek fartýk, plasık pishindegi jaryqdıodty taspa nemese ilinip turǵan as úı shkaftarynyń tómengi jaǵyna ornatylǵan qarapaıym jıhaz shamdaldary bolýy múmkin.

5. Tereze aldyndaǵy aımaqqa nazar aýdaryńyz

Kóptegen as úılerde tereze ornatylǵan qabyrǵa paıdalanylmaıdy. Másele mindetti túrde terezeniń astyna ornatylatyn batareıada.

Batareıany «jaýyp tastaıtyn» eń qarapaıym ári tıimdi ádis — bos keńistikti tolyqtaı paıdalaný. Torlamany metalprofılden jasap, bárin gıpsokartonmen tartyp tastaý kerek.

Osylaısha qabyrǵa jınaqy kórinedi. Al siz terezeniń aldyńǵy jaǵyna jıhaz nemese tipti as ishetin ústeldi qoıýyńyzǵa bolady. Eger terezeńizden ádemi kórinister kórinetin bolsa, kún sáýlesine bólenip, ásem tabıǵatqa tamsanyp tańǵy as ishýdiń ózi bir ǵanıbet.

6. Saqtaý júıesin oılastyryńyz

As úı keńistigin saýatty uıymdastyrý — retsizdikten qashyp, bólmeni keń jáne eń bastysy jaıly etýdiń jalǵyz amaly. Saqtaý júıesin oılastyrý arqyly kúndelikti paıdalanatyn ydystar men quraldardy qalaı alatynyńyzdy qaıta qarastyryńyz. Buryshtaǵy shkaftar, ashyq aspaly sóreler, konteınerler men organaızerlerdiń barlyǵy sizge osy máseleni sheshýge kómektesedi.

Qabyrǵalardy da paıdalanyńyz: ilgekter men reılıngter (sharbaqtar) az oryn alady. Biraq olar as úıdiń kóp zattaryn saqtaýǵa jaqsy kómekshi bolady.

7. Yqsham ornatylǵan tehnıkany tańdańyz

Altyn ýaqytyńyzdy únemdeýge ornatylǵan tehnıkalar kómektesedi. Sol kezde sizdiń bos ústel beti sıaqty qosymsha jumys keńistigińiz bolady. Siz ornatylǵan tamaq pisiretin betterdi (nemese as pisiretin peshti) jáne ydys jýatyn mashınany tańdaý arqyly as úıińizdi yqshamdy ete alasyz. Garnıtýraǵa ornatylǵan tońazytqysh erekshe sándi kórinedi.

8. Jıhazdy tapsyryspen jasatyńyz

Eger as úıińizge ádettegi jıhazdardy ornalastyrý múmkin bolmasa, erekshe sheshim qabyldaýdan qoryqpańyz. Ondaı sheshimderdiń biri — jıhazdy tapsyrys berip jasatý.

Shkaftardyń eni men bıikigin ózińiz retteı otyryp, jıhazdy jaıly ornalastyryp, keńistikti tıimdi paıdalana alasyz. Al eń keremeti — sizdiń as úıińiz eshkimdikine uqsamaıtyndaı erekshe bolady.

9. Mýltıfýnksıonaldy gadjetterdi izdeńiz

Qazirgi as úılerde sán men jaılylyq úılesim tabýy kerek. Buǵan mýltıfýnksıonaldy gadjetter kómektesedi. Olar aqshańyzdy ǵana emes, paıdalanylatyn keńistikti únemdep, as pisirýdi qyzyqty ári kóńildi etedi. Mysaly, negizgi turmystyq tehnıkalardan ózge qazirgi as úı bıkeleri blendersiz, mýltıvarkasyz, elektrli ettartqyshsyz jáne kofeýatqyshsyz as daıyndaı almaıdy.

As úıge kópfýnksıonaldy usaq-túıekterdi alý kezinde siz tipti dızaınyńyzdy baıytyp, ıntererge jańa aksentter qosasyz. Keskish taqtaılar, ystyq tamaqtyń astyna qoıatyn toztabandar, sý quıatyn ádemi qumyralar, ınteraktıvti as úı devaıstary — as úıińizdi keremet ári jaıly etý úshin barlyq múmkindikti paıdalanyńyz.

10. Ydys-aıaq tańdaýǵa erekshe nazar aýdaryńyz

As úı ıntereriniń áserin kóbinese ydys-aıaqtar anyqtaıdy. Ártúrli pishinder men túster armanyńyzdaǵy as úıdi jasaýdy aıaqtaýǵa kómektesedi. Ydystardyń birneshe túri bolǵany durys. Sonda siz sándi saqtap qalasyz, ári birsaryndylyqtan jalyǵyp ketpeısiz. Alabajaq emes ashyq tústi as úıde ashyq, birtústi servızder erekshe ári tartymdy kórinedi.

Ydys-aıaq tańdaǵan kezde jyly reńderdiń tábetti ashatynyn, al ahromatıkalyq reńderdiń sándi kórinse de (mysaly, qara tárelkeler) kerisinshe, tábetti basatynyn esten shyǵarmańyz. Oıý-órnegi bar ydystar jaqsy aksent berip, bólmege qosymsha jaılylyq ornatady. Al kógildir jáne jasyl reńder adamdy tynyshtandyryp, as úıde uzaq otyrýǵa májbúrleıdi.

---