InfoHub Logo

Astanadaǵy oń jaǵalaýda ornalasqan «Atameken» etno-memorıaldyq kesheniniń demontajy bastaldy. Keshenniń ornyna ne salynatyny ázirge belgisiz, jurt áleýmettik jelilerde boljam jasap jatyr.

Bul týraly Infohub.kz aqparat agenttigi habarlaıdy.

Keıbir kýágerlerdiń aıtýynsha, keshen ornynda arnaıy tehnıka jumys istep jatyr. Demontaj jumystarynyń sebebi men bolashaq qurylys josparlary týraly resmı aqparat áli jarıalanǵan joq.

Boljamdar men alańdaýshylyqtar

Astanalyq bloger Nursultan Qamzebaev «Atameken» ornyna Oqýshylar saraıy salynýy múmkin degen boljam aıtty. Alaıda, onyń pikirinshe, bul sheshim qala úshin tıimsiz bolady, sebebi elordada aǵashtary bar parkter jetispeıdi.

«Atameken» kesheni 2001 jyly ashylǵan bolatyn. Bul keshen kóp jyldar boıy elordanyń týrısik nysandarynyń biri sanaldy. Ol Qazaqstan kartasynyń ashyq aspan astyndaǵy nusqasy retinde jasalyp, elimizdiń sáýlet jáne tabıǵı eskertkishteriniń kishireıtilgen kóshirmelerimen bezendirilgen edi.

Resmı jaýap

Ótken jyly Astana qalasy ákimdigi «Atameken» keshenin buzýǵa daıyndalyp jatqanyn rastaǵan bolatyn. Alaıda, ornyna ne salynatyny týraly naqty jaýap berilmegen edi.

Ákimdiktiń resmı jaýabynda keshen ǵımarattarynyń avarıalyq jaǵdaıda ekendigi jáne 2002 jyly salynǵan nysandardyń moraldyq jáne tehnıkalyq turǵydan eskirgeni aıtylǵan. Keshendegi jumyskerler basqa jerge aýystyrylyp, nysandardy buzýǵa ruqsat qujattary rásimdelýde ekeni habarlanǵan. Jańa nysannyń ornalasý máselesi ákimdik basshylyǵynyń qaraýynda ekeni jáne qala qurylysy erejeleri eskerile otyryp sheshim qabyldanatyny kórsetilgen.

«Atamekenniń» mańyzy

Sáýletshi-zertteýshi Temirtas Ysqaqovtyń aıtýynsha, «Atamekenniń» qundylyǵy tek ashyq aspan astyndaǵy murajaı formatynda ǵana emes, sonymen qatar onyń ornalasqan jerinde de bolǵan. Keshen jasyl jelekteri mol saıabaq aımaǵynda, dendrosaıabaq pen Ortalyq saıabaqtyń janynda ornalasqan.

«Shaǵyn aýmaqta búkil el – ár qala, ár oblys óziniń eskertkishterimen jáne kıeli nysandarymen kórsetilgen. Astanaǵa kelgen kez kelgen qonaq óziniń «aımaǵyn» taba alatyn edi. Bul shynymen de jas Astananyń vızıt kartochkasy boldy. Munda oqýshylar tájirıbeden ótip, ekskýrsıalar júrgizip, alǵashqy aqshasyn tapqan. Bul jaı ǵana dekorasıa emes, naǵyz ınstıtýsıa edi», — dep atap ótti ol.

Zertteýshiniń pikirinshe, eger murajaıdyń jabylýyna onyń tanymal bolmaýy sebep bolsa, ony joıýdyń ornyna konsepsıasyn qaıta qarap, jańa mazmunmen tolyqtyryp, zamanaýı jumys formattaryn izdegen jón bolar edi.