InfoHub Logo

Májilis depýtaty Asqat Aımaǵambetov ustazdardyń áleýmettik jelidegi áreketterine qatysty pikir bildirip, olardyń qoǵamdaǵy beınesi men bedeline nuqsan keltirmeýge shaqyrdy. Bul týraly ol Adal Adam YouTube arnasyna bergen suhbatynda aıtty.

«Iá, qazirgi zaman — TikTok, Instagram, Netflix dáýiri. Biraq muǵalimniń beınesi, dırektordyń beınesi degen uǵym bar. Balalarǵa jaqyn bolý mańyzdy, biraq ustaz — tárbıe men bilim berýdiń sımvoly. Sol beıneni saqtaý kerek», — dedi depýtat.

Asqat Aımaǵambetov TikTok-qa jappaı enip ketken muǵalimderdiń keıbir áreketteri qoǵamda suraq týǵyzatynyn jetkizdi. Onyń sózinshe, oqýshylarmen qarym-qatynas jasaýda jańashyldyq qajet, alaıda ol ar-namys pen kásibı etıka sheńberinen shyqpaýy tıis.

«Rıls túsirý — óz aldyna bir baǵyt. Biraq ár nárseniń orny bar. Balalarmen ázil aıtyp, trend qýyp ketýdiń qajeti joq. Bul máselede mınıstrlik naqty ustanym qalyptastyrýy kerek», — dedi Aımaǵambetov.

Eks-mınıstr qazirgi ýaqytta ózi de ustazdyq qyzmet atqaryp júrgenin aıtyp, ustazdyń bedeli men ımıji — tek bilim emes, tárbıeniń de ólshemi ekenin eske saldy.