InfoHub Logo

Astana men Qosshy qalalaryn jalǵaıtyn jeńil relsti kólik (LRT) jobasynyń ekinshi kezeńine qatysty jańa málimetter jarıalandy. Jobanyń qurylys merzimi men egjeı-tegjeıi týraly aqparatty elordalyq kólik kompanıasy – City Transportation System (CTS) taratty.

Bul týraly Infohub.kz aqparat agenttigi habarlaıdy.

Qurylys merzimi men jobanyń erekshelikteri

Joba qujattaryna sáıkes, LRT-nyń ekinshi kezeńindegi qurylys-montaj jumystarynyń naqty bastalý kúni tıisti ruqsat qujattary men jobalyq materıaldardy kelisýge baılanysty bolady. Degenmen, jobany iske asyrýdyń shamamen 2026 jyldyń ekinshi toqsanynda bastalýy josparlanǵan. Qurylys jumystarynyń ózi shamamen 68 aıǵa, ıaǵnı bes jyldan astam ýaqytqa sozylady dep kútilýde. Obektini paıdalaný merzimi 100 jylǵa jýyqtaıdy dep boljanýda.

Ekinshi kezeńniń aýmaǵy men baǵyty

LRT-nyń ekinshi kezeńi eki ýchaskeden turady. Birinshi ýchaske Astana qalasynyń Saryarqa, Nura, Esil aýdandaryn qamtyp, Qabanbaı batyr dańǵylynan bastap Syǵanaq, Sh. Aıtmatov kósheleri, Turan, Saryarqa, Jeńis dańǵyldary arqyly temirjol vokzalyna deıin jetedi. Ekinshi ýchaske Qabanbaı batyr dańǵylynan Qarqaraly tas jolymen qala shekarasyna deıin sozylady. Bul baǵyttyń jalpy uzyndyǵy shamamen 26,5 shaqyrymdy quraıdy. Onyń 25,2 shaqyrymy Astana qalasynyń aýmaǵymen ótedi, al 1,3 shaqyrymy Aqmola oblysyndaǵy Qosshy qalasyna tıesili bolady.

Tehnıkalyq sıpattamalary

Joba aıasynda eki qosymsha depo salynady. Ekinshi kezeńdegi barlyq jeliler birinshi kezeńdegi jelilermen úılesimdi bolyp, kres tárizdi radıaldy temirjol jelisin quraıdy. Poıyzdardyń maksımaldy jyldamdyǵy saǵatyna 80 km jetedi. Qorektendirý 750 V turaqty tokpen úshinshi rels arqyly júzege asyrylady. Sondaı-aq, jobada gazben jabdyqtaý júıesi de qarastyrylǵan.

Ekologıalyq aspektileri

Jobanyń ekinshi kezeńi Astanadaǵy Taldykól kólinen shamamen 510 metr qashyqtyqta ótedi jáne Esil ózenin kesip ótedi. Qosshy qalasy aýmaǵyndaǵy ýchaskede sý obektileri joq ekeni aıtylǵan.

Buǵan deıin Astana ákimi Jeńis Qasymbek Qosshyǵa baǵyttalǵan LRT jelisiniń qurylysy 2026 jyldyń basynda bastalyp, 1,5 jyl ishinde aıaqtalatynyn málimdegen bolatyn.