InfoHub Logo

Astanadaǵy mektep asqanalaryn brakerajdy komısıa quramyndaǵy ata-analar qadaǵalaı alady, dep habarlaıdy elorda ákimdiginiń medıa ortalyǵy.

«Astana qalasynyń bilim berý uıymdarynda brakerajdy komısıalar jumys isteıdi. Brakerajdy komısıa quramyna mektep dırektory, áleýmettik pedagog, meıirbıkeler  men onǵa jýyq ata-analar komıtetiniń músheleri kiredi. Olar apta saıyn mektep asqanasynyń sanıtarlyq talapqa saı bolýy men tamaqtyń salmaǵynyń normaǵa sáıkestigin tekserip otyrady»,  - dedi medıa ortalyqtyń tilshisine bergen suhbatynda bilim basqarmasynyń bas mamany Ásem Úsenova.

Onyń aıtýynsha, mektep oqýshylary elordalyq qoǵamdyq densaýlyq saqtaý departamentimen 4 aptaǵa bekitilgen mázir boıynsha tamaqtanady. Atalǵan mázirdi bekitken kezde Qoǵamdyq tamaqtaný ınstıtýtynyń usynystary eskeriledi.

«Mektep oqýshylarynyń máziri jyldyń basynda qańtar aıynda bekitiledi. Tamaq tórt aptaǵa bekitilgen mázir boıynsha daıyndalady. Jergilikti búdjet esebinen balalardy tegin tamaqpen qamtamasyz etý maqsatynda 3,5 mlrd teńgege jýyq qarjy bólindi. Bul qarjy jyl sońyna deıin mektep oqýshylaryn tegin tamaqtandyrýǵa jetkilikti», - dedi bas maman.

Aıta keteıik, jańa oqý jylynda Astanada 73 myńǵa jýyq mektep oqýshysy tegin ystyq tamaqpen qamtamasyz etiledi. Qaladaǵy barlyq mektep asqanalarǵa aǵymdaǵy jóndeý jumystary júrgizildi.

---