InfoHub Logo

Astanadaǵy tarıhı Astana-1 vokzalynyń rekonstrýksıasy merziminen buryn aıaqtalýy yqtımal. Bul týraly úkimet otyrysynyń kýlýarynda QR Indýstrıa jáne ınfraqurylymdyq damý mınıstriniń orynbasary Maqsat Qalıakparov málimdedi.

Bul týraly Infohub.kz aqparat agenttigi habarlaıdy.

Bastapqyda vokzal 2026 jyldyń sońyna deıin paıdalanýǵa berilýi tıis bolǵan. Alaıda, qurylys jumystarynyń jedeldetilgenine baılanysty, nysandy kúzde, ıaǵnı qysqy kezeń bastalǵanǵa deıin ashý josparlanýda.

Strategıalyq mańyzdy nysan

Maqsat Qalıakparovtyń aıtýynsha, vokzal – el úshin strategıalyq mańyzdy nysan bolǵandyqtan, ony salý jumystary jobalaýmen qatar júrgizilip, merzimdi barynsha qysqartýǵa tyrysýda.

«Biz munyń strategıalyq nysan ekenin bilemiz, sondyqtan barynsha qysqa merzimde aıaqtaý úshin jobalaý jáne qurylys jumystaryn qatar júrgizip jatyrmyz», - dep túsindirdi ol.

Jobanyń quny men jańalyqtary

Mınıstr orynbasary jobanyń qunynyń ósýine qatysty suraqtarǵa da jaýap berdi. Onyń aıtýynsha, «rezkoe ýdorojanıe» týraly aıtýǵa bolmaıdy, biraq ákimdiktiń qosymsha talaptary, sonyń ishinde vokzaldyń ótkizý qabiletin arttyrýǵa qatysty usynystar bolǵanyn joqqa shyǵarmady.

Sondaı-aq, jańartylǵan vokzal aýmaǵynda zamanaýı fýd-kort aımaǵyn ornalastyrý josparlanýda. Bul jańa konsepsıa boıynsha, asqana aımaǵy bólek bolyp, ıis zaldyń basqa bólikterine taramaıtyndaı etip jasalmaq.

Eske sala keteıik, buǵan deıin Astana-1 vokzalynyń rekonstrýksıasynyń quny úsh esege jýyq óskeni habarlanǵan edi. Eger 2024 jyly bul soma 6 mıllıard teńge bolsa, keıinnen 16,6 mıllıard teńgege deıin kóterildi. Bul kórsetkishter nysanǵa qoıylǵan talaptardyń artqanymen, jumys kóleminiń keńeıgenimen jáne jańa platformanyń salynýymen baılanystyrylǵan bolatyn.