InfoHub Logo

Astanadaǵy Q. Qýlajanov atyndaǵy Tehnologıa jáne bıznes ýnıversıtetinde joǵary laýazymdy tulǵalardyń aılyq jalaqysy belgilendi. Mundaǵy eń joǵary jalaqy alatyn qyzmetkerler – bir áýlettiń úsh býyny. Bul týraly ýnıversıtettiń depozıtarııindegi málimetterden kórýge bolady.

Bul týraly Infohub.kz aqparat agenttigi habarlaıdy.

Ýnıversıtettiń dırektorlar keńesiniń tóraǵasy, oqý ornyna esimin bergen Qýralbek Qýlajanov aıyna 1,5 mıllıon teńge jalaqy alady. Onyń uly Talǵat Qýlajanov dırektorlar keńesiniń múshesi retinde sondaı jalaqyny ıelense, nemeresi Ernur Qýlajanov (sondaı-aq keńes múshesi) aıyna 700 myń teńge alady. Osylaısha, Qýlajanovtar áýletiniń ýnıversıtettegi jalaqysy bir aıda 3,7 mıllıon teńgege jetti.

Basqa basshylardyń jalaqysy

Qýlajanov tegin ıelenbeıtin basqa top-menedjerlerdiń jalaqysy bulardan aıtarlyqtaı tómen. Mysaly, dırektorlar keńesiniń taǵy bir múshesi Lázzat Baıbolova aıyna 500 myń teńge, al táýelsiz dırektorlar Laslo Ýngvarı men Erdaýlet Abjanov árqaısysy 400 myń teńge alady.

Qýralbek Qýlajanov kim?

Qýralbek Qýlajanov – Keńes Odaǵy men Qazaqstannyń belgili hımıgi, profesor, Ulttyq ǵylym akademıasynyń múshesi. Ol 1967 jyly S.M. Kırov atyndaǵy QazMÝ-di bitirip, Almaty tehnologıalyq ýnıversıtetiniń prezıdenti qyzmetine deıin jetken. Onyń 500-ge jýyq ǵylymı eńbegi, sonyń ishinde taldamalyq jáne bıoorganıkalyq hımıa boıynsha irgeli oqýlyqtary bar. Akademık 54 ónertabysqa avtorlyq kýálik pen patent ıelenedi.

Talǵat Qýlajanov – tehnıka ǵylymdarynyń doktory, profesor jáne akademık. Al Ernur Qýlajanov týraly ýnıversıtet saıtynda ( «Basshylyq» bóliminde) aqparat joq.

Ýnıversıtettiń menshik ıeleri

Adata derekterine sáıkes, Q. Qýlajanov atyndaǵy Tehnologıa jáne bıznes ýnıversıteti Almaty tehnologıalyq ýnıversıtetine tıesili. Almaty tehnologıalyq ýnıversıtetiniń 49%-y ERTAM kompanıasy arqyly tórt adamǵa – Qýralbek, Talǵat, Ernur jáne Qýralbektiń jubaıy Jáýken Qýlajanovaǵa tıesili.