InfoHub Logo

Astana ákimdigi muǵalimderge 1000 turǵyn úı kýáligin berýdi kózdeıdi. Árbir kýáliktiń mólsheri - 1 mıllıon teńge. Ony baspananyń alǵashqy jarnasy retinde paıdalaný qajet.

Qalalyq bilim basqarmasynyń basshysy Ánýar Janǵozınniń aıtýynsha, ótken jyly elordada 100 adamǵa turǵyn úı kýáligi tabystaldy. Onyń ishinde 80-ge jýyǵy - muǵalimder.  

«Negizi, atalǵan sharanyń negizgi maqsaty da sol, muǵalimderdi qoldaý, olardyń turǵyn úı máselesin sheshý. Bıyl Astana ákimdigi 2000-ǵa jýyq turǵyn úı kýáligin taratýdy kózdeıdi. Sonyń jartysy ustazdarǵa arnalǵan. Onyń ishinde kolej, mektep jáne joǵary oqý oryndarynyń oqytýshylary bar», - dedi Á.Janǵozın.

Aıta keteıik, ótken jyldyń sońynda qala ákimi Baqyt Sultanov 100 adamǵa turǵyn úı kýálikterin tabystaǵan bolatyn. Árbir kýáliktiń mólsheri - 1 mıllıon teńge. Atalǵan aqshany ıpotekalyq baspananyń alǵashqy jarnasy retinde qoldaný qajet. Al páterdi úsh aıdyń ishinde tabý qajet. Demek, osy jyly naýryzdyń aıaǵyna deıin páter tabylmasa, aqshany búdjetke keri qaıtarýǵa týra keledi.

«Bul «7-20-25» baǵdarlamasy emes. Degenmen, banktiń ishki sharttary soǵan uqsas. Salymshy alǵashqy jarnanyń 20 prosentin jınaýy tıis. Sodan keıin 7 prosenttik ıpoteka 25 jylǵa beriledi. Biraq páterdi úsh aıdyń ishinde taýyp, ıpotekany rásimdep alý qajet. Úı jańa turǵyn úıden alynýy shart. Áıtpese, ákimdiktiń aqshasy búdjetke keri qaıtarylady. Ázirshe ol aqsha arnaıy esepshotta jata beredi. Barlyq sharttar oryndalǵannan keıin esepshot ashylady da, alǵashqy jarna retinde salymshynyń qarjysyna qosylady», - deıdi «Turǵyn úı qurylys jınaq bankiniń» Astana qalasyndaǵy ortalyq fılıalynyń dırektory Jansultan Mataev.

QazAqparat

---