InfoHub Logo

Atyraýda áıel ustazdarǵa arnalǵan tegin STEM HANYM kýrstary bastalmaq,-dep jazady Infohab tilshisi.

Atyraý oblysynda alǵash ret áıel muǵalimder men pedagogıkalyq mamandyq ıelerine arnalǵan tegin STEM HANYM kýrstary iske qosyldy. Joba zamanaýı bilim men daǵdylardy ıgerýge, kásibı biliktilikti arttyrýǵa jáne jańa múmkindikterge jol ashýǵa baǵyttalǵan.

Kýrs onlaın jáne oflaın formatta ótedi. Onlaın bóliginde qatysýshylar ǵylym, tehnologıa, ınjenerıa jáne matematıka (STEM) baǵyttarymen tanysady. Oflaın hakaton-sabaqtar Qurmanǵazy, Mahambet, Maqat, Jylyoı aýdandarynda jáne Atyraý qalasynda uıymdastyrylady. Jobaǵa qatysqan eń úzdik 100 áıel sertıfıkattalǵan STEM-trener atanyp, biliktilikterin arttyrý, jańa oqytý ádisterin meńgerý jáne olardy tájirıbede qoldaný, balalarǵa STEM baǵytynda bilim berý múmkindigine ıe bolady.

Jobaǵa kelesi sanattaǵy áıelder qatysa alady:
- Jaratylystaný-matematıkalyq nemese gýmanıtarlyq pán muǵalimderi;
- Balabaqsha tárbıeshileri;
- Pedagogıkalyq fakúltet stýdentteri (3–4 kýrs);
- Pedagogıkalyq bilimi bar, biraq mamandyǵy boıynsha jumys istemeıtin áıelder;
- Múmkindigi shekteýli áıelder men erekshe balasy bar analar.
Jobanyń eń úzdik eki komandasy mentorlyq qoldaý alyp, Ortalyq Azıadaǵy STEM chempıonatynyń fınalyna qatysady.

STEM – álemde eń jyldam damyp kele jatqan jáne joǵary aqy tólenetin mamandyqtar qataryna kiredi. Bul baǵdarlama qatysýshylarǵa kásibı kókjıegin keńeıtýge ǵana emes, sonymen birge qoǵamda tehnıkalyq salanyń damýyna úles qosatyn jańa býyndy tárbıeleýge múmkindik beredi.

Joba «Samuryq-Qazyna» AQ kompanıalar toby atynan «Samruk-Kazyna Trust» korporatıvtik qory men «ExxonMobil» kompanıasynyń qarjylaı qoldaýymen, USTEM Foundation qoǵamdyq qorymen júzege asyrylady.

Qatysýǵa ótinimder 10 tamyzǵa deıin qabyldanady (www.stemhanym.kz).