InfoHub Logo

Atyraý oblysynda Altyn Orda dáýirinen syr shertetin Aqtóbe-Laetı qalashyǵy ashyq aspan astyndaǵy murajaıǵa aınalady. Bul bastama oblys ákiminiń tapsyrmasymen qolǵa alynyp, bıylǵy jyldyń sońyna deıin aıaqtalýy tıis.

Bul týraly Infohub.kz aqparat agenttigi habarlaıdy.

Joba aıasynda kireberis mańynda ákimshilik ǵımaraty salynyp, 2018-2019 jyldary júrgizilgen arheologıalyq qazbalar kezinde tabylǵan tarıhı nysandarda ǵylymı-restavrasıalyq jumystar atqarylady. Eskertkishterdi saqtaý úshin olardyń ústine arnaıy qorǵanysh qurylymdary ornatylady.

Týrıserge arnalǵan nysandar

Aýmaqta týrıser men jastardy tartý maqsatynda abattandyrý jumystary júrgizilip, sadaq atý alańy da salynady. Bul qalashyq Altyn Orda dáýirindegi iri qolóner jáne saýda ortalyqtarynyń biri bolǵan. Sondyqtan bul joba tek bir nysandy jańartyp qana qoımaı, tutas tarıhı kezeńniń kelbetin qalpyna keltirýge baǵyttalǵan.

Tarıhı mańyzdylyǵy

Tarıhı-mádenı murany zertteý ortalyǵynyń basshysy Tolybaı Dostybaevtyń aıtýynsha, Aqtóbe-Laetı eskertkishi ata-babamyzdyń turmys-tirshiligin, ekonomıkalyq jáne mádenı baılanystaryn aıqyn kórsetetin biregeı mura bolyp tabylady. Ony saqtaı otyryp, jas urpaqqa ótkenniń baı murasyn jetkizemiz jáne óńirimizdiń tarıhı mańyzdylyǵyn aıshyqtaımyz.

Aqtóbe-Laetı qalashyǵy 13-15 ǵasyrlarǵa jatady. Ol Atyraý qalasyna qarasty Tomarly aýylynan shyǵysqa qaraı eki shaqyrymdaı jerde ornalasqan. Bul nysan Altyn Orda dáýiriniń mańyzdy eskertkishteriniń biri sanalady.

2024 jyly jalpy aýmaǵy 52,7 gektardy quraıtyn qalashyq aýmary tolyq qorshalyp, oǵan 74,3 mıllıon teńge jumsaldy. Perımetriniń uzyndyǵy – 2935 metr.

Buǵan deıin 2024 jyly Aqtóbe-Laetı qalashyǵy ornynda murajaı men pavılon salynatyny habarlanǵan bolatyn. Kelisimshart quny 606 mıllıon 320 myń teńgeni qurady. Alaıda, qujattama bank rásimderinen ótpeı, kelisimshart buzylyp, joba 2026 jylǵa arnalǵan is-sharalar josparyna qarjylandyrýy rastalmaı engizildi.