InfoHub Logo

Atyraýda ınternetten «ońaı aqsha» tapqysy kelgen azamattarǵa eleýli eskertý jasaǵan mańyzdy sot úkimi shyqty. Bul – óńirde alǵash ret azamattyń bank shotyn úshinshi tulǵalarǵa aqshalaı syıaqy úshin bergeni úshin qylmystyq jaýapkershilikke tartylýy.

Bul týraly Infohub.kz aqparat agenttigi habarlaıdy.

Bank shotyn «jalǵa berý» – qylmys

Sot anyqtaǵandaı, ótken jyldyń sońynda Atyraý qalasynyń turǵyny A.M. messendjerler arqyly jyldam aqsha tabý týraly usynysqa kelisip, óz banktik shotyna tolyq qoljetimdilikti beıtanys adamdarǵa bergen. Keıinnen, bul shotty qylmystyq jolmen alynǵan aqshalaı qarajatty aýdarý úshin paıdalanǵan.

Bul áreketter saldarynan jábirlenýshi tarap materıaldyq shyǵynǵa ushyraǵan.

Jańa zańnama jáne onyń mańyzy

Atyraý qalasynyń №2 soty A.M.-di kináli dep tanyp, aıyptaý úkimin shyǵardy. Oblys prokýratýrasynyń málimetinshe, 2025 jyldyń 16 qyrkúıeginen bastap Qazaqstan Respýblıkasy Qylmystyq kodeksiniń 232-1-baby kúshine engen. Bul bap bank shottaryn, tólem kartalaryn nemese olarǵa qol jetkizýdi syıaqy úshin úshinshi tulǵalarǵa berýmen aınalysatyn zańsyz qarjylyq deldaldyqpen kúresýge baǵyttalǵan.

Azamattyń qylmystyq sqemanyń aýqymyn túsingen-túsinbegenine nemese qansha tabys tapqanyna qaramastan, bank kartasyn nemese oǵan qol jetkizýdi úshinshi tulǵaǵa berý faktisiniń ózi qylmystyq jaýapkershilikke ákep soǵady.

Prokýratýra mundaı áreketterdiń kez kelgen túri, ıaǵnı bank kartasyn «jalǵa berý» azamatty qylmysqa ortaq etetinin jáne sottylyqqa ákep soǵatynyn atap ótti. Atyraýda mundaı faktilerdi anyqtaý jáne jolyn kesý boıynsha jumystar kúsheıtilgen rejımde júrgizilip, jalǵasa beredi.