InfoHub Logo

Atyraý oblysyndaǵy Jangeldi aýylynda oryn alǵan otbasylyq qyrǵynǵa qatysty sot otyrysynda prokýror Mıras Baýyrjanov qylmystyń mán-jaıyn tolyq baıandady. Bul qylmysty jasady degen kúdikpen Sultan Sársemálıev sot aldynda jaýap berip otyr.

Bul týraly Infohub.kz aqparat agenttigi habarlaıdy.

Prokýrordyń aıtýynsha, Sársemálıev 2025 jyldyń naýryz aıynda Atyraýdaǵy Munaıshy yqsham aýdanyndaǵy úıinde áıeliniń inisi Naýryz Muqanǵalıevti óltirgen. Odan keıin marqumnyń atynan uıaly qosymsha arqyly 4 mıllıon teńge nesıe rásimdegen. Birneshe kún ótken soń, Naýryzdyń telefonymen WhatsApp arqyly Nasıp Óteshqalıevadan 350 myń teńge suraǵan. Aqshany taksı qyzmetin atqaratyn er adam arqyly aldyrǵan. Taksı júrgizýshisi termınal arqyly aqshany Naýryz Muqanǵalıevtiń nómirine aýdarǵan.

Otbasylyq janjal jáne qos adamnyń ólimi

2025 jyldyń qarasha aıynda Sultan Sársemálıev áıeli jáne eki qyzymen birge Qyzylqoǵa aýdanyndaǵy Jangeldi aýylyna qonaqqa barǵan. Sol kezde otbasy músheleri arasynda janjal týyndaǵan.

Kúdikti úıdiń aýlasyndaǵy qorada sharýamen aınalysyp júrgen Nasıp Óteshqalıevany baıqap, ony pyshaqtap óltirgen. Sodan keıin óziniń qaıyn atasyn jaralap, qoraǵa kómip tastaǵan.

Sot prosesi ashyq túrde ótip jatqany aıtyldy. İsti Atyraý oblysynyń qylmystyq ister jónindegi mamandandyrylǵan aýdanaralyq sotynyń sýdıasy Zárema Hamıdýllına qarap jatyr.

Kúdiktige buǵan deıin QR QK-niń 99-baby 2-tarmaǵynyń 1-tarmaǵy («Eki nemese odan da kóp adamdy óltirý») boıynsha, sondaı-aq 188-baby («Urlyq») jáne 190-baby («Alaıaqtyq») boıynsha mal satý jáne bank kartalaryn urlaý faktileri boıynsha qylmystyq is qozǵalǵan.

Buǵan deıin bolǵan oqıǵalar

Esterińizge salsaq, 2025 jyldyń sońynda Jangeldi aýylynan búkil otbasy belgisiz jaǵdaıda joǵalyp ketken bolatyn. Keıin, 2026 jyldyń 6 qańtarynda Atyraý oblysynda joǵalǵan otbasynyń eki múshesiniń – otbasy basshysy Maqsot Qarabalın men onyń áıeli Nasıp Óteshqalıevanyń máıitteri sharýashylyq qorasynan tabylǵan edi. Keıin olardyń denelerinde pyshaq jaraqaty bolǵany anyqtaldy.

Sot-medısınalyq saraptama qorytyndysy men tergeý barysynda anyqtalǵan dáleldemelerge sáıkes, Naýryz Muqanǵalıev 2025 jyldyń mamyr aıynda, al qalǵan úsheýi – otbasy basshysy, onyń áıeli jáne qyzy qarasha aıynda qaıtys bolǵany belgili boldy.

2026 jyldyń 9 qańtarynda otbasy múshelerin óltirdi degen kúdikpen olardyń kúıeý balasy Sultan Sársemálıevtiń izdestirilip jatqany resmı túrde habarlandy. Qaıtys bolǵandardyń qyzdary da kúdikti retinde tanyldy.

Aqpannyń 24-i kúni Sársemálıev pen Muqanǵalıeva Indonezıanyń Lombok aralyndaǵy Senarý aýylynda ustalǵany belgili boldy. Naýryz aıynda olardy Atyraýǵa jetkizdi.

Keıinnen polısıa qyzmetkerleri Sultan Sársemálıevti qaıyn atasy men enesi óltirilgen úıge alyp keldi. Sol jerde ol tergeýshilerge qylmysty qalaı jasaǵanyn kórsetip, suraqtarǵa jaýap berdi.

Sottalýshyǵa QR QK-niń 99-baby 2-tarmaǵynyń 1-tarmaǵy – «Eki nemese odan da kóp adamdy óltirý» boıynsha qylmystyq is qozǵaldy. Buǵan qosa, oǵan marqumdardyń maldaryn satý jáne bank kartalaryn paıdalanýmen baılanysty urlyq jáne alaıaqtyq týraly baptar da taǵyldy.

Atyraý oblystyq prokýratýrasy bolsa, Aqbaıan Muqanǵalıevanyń óz otbasy músheleriniń ólimine qatysy joq ekenin habarlady. Oblys prokýrorynyń kómekshisi Jandar Bolatbektiń aıtýynsha, oǵan qatysty qylmystyq qýdalaý toqtatyldy.

Sondaı-aq, Almatyda Aqbaıan Muqanǵalıevaǵa psıhıatrıalyq saraptama júrgizilgeni belgili boldy.