InfoHub Logo

Atyraý qalasyndaǵy "Avangard" yqsham aýdanynyń turǵyndary avtobýstardyń sońǵy aıaldamasyn turǵyn úılerdiń mańynan áketýdi talap etip, narazylyq bildirdi. Buǵan deıin bul másele boıynsha birneshe ret shaǵym túskenmen, tıisti sheshim qabyldanbaǵan soń, halyq óz betinshe jaǵdaıdy baqylaýǵa aldy.

Bul týraly Infohub.kz aqparat agenttigi habarlaıdy.

Turǵyndardyń aıtýynsha, kún saıyn tańerteń erte oıanyp, avtobýs qozǵaltqyshtarynyń gýili men kúrt úderetin kólikterdiń daýysynan tynysh uıyqtaı almaıdy. Kúndiz de tynyshtyq bolmaı, avtobýstardyń kirip-shyǵýy, dybys sıgnaldaryn berýi, jumys istep turǵan qozǵaltqyshtardyń ıisinen úı ishindegi aýa lastanyp, tereze aldyna shań jınalady.

Avtobýs qozǵalysynyń qarqyndylyǵy

Turǵyndar júrgizgen baqylaý boıynsha, kúndizgi bir saǵat ishinde (13:00-14:00) 43 ret avtobýs kirip, 47 ret shyqqan, ıaǵnı barlyǵy 90 mánevr jasalǵan. Kelesi kúni bul kórsetkish 53 kiris jáne 49 shyǵyspen 102 mánevrge jetken. Avtobýstardyń arasyndaǵy ınterval shamamen bir mınýtty quraǵan. Eki saǵat ishinde aıaldamadan 96 avtobýs ótken.

Tańǵy saǵat 05:50-de alǵashqy kólikter kelip, 06:30-ǵa qaraı olardyń sany onnan asady. Al resmı keste boıynsha, qozǵalys 06:40-ta bastalýy tıis.

Marshrýttar men shý deńgeıi

Aıaldama arqyly 12 baǵyt ótedi: №10, 11, 12, 14, 15, 50, 52, 61, 63, 64, 65 jáne 67. Avtobýstar suıytylǵan gazben jumys isteıdi. Turǵyndardyń aıtýynsha, avtobýstar turaq kezinde qozǵaltqyshtaryn 10-15 mınýtqa deıin óshirmeı qoıady.

Olardyń sózinshe, avtobýstyń údetýi kezinde shý deńgeıi 85-95 desıbelge jetedi, al eki bes qabatty úıdiń arasyndaǵy tar keńistikte dybys kúsheıedi. Turǵyn aımaqtarda kúndizgi ruqsat etilgen deńgeı – 55 desıbel, al túnde 45 desıbel bolýy kerek.

Normatıvtik talaptar men naqty jaǵdaı

Sanıtarlyq organdardyń jaýaptarynda aıaldamalar men turaqtardyń turǵyn aımaqtan keminde 50 metr qashyqtyqta ornalasýy kerektigi aıtylǵan. Alaıda, baǵyttardyń sany men qozǵalys qarqyndylyǵyna qatysty naqty normalar joq.

Turǵyndar bul qashyqtyq normasynyń formaldy túrde saqtalýyna baılanysty aıaldamanyń burynǵy ornynda qalýyna sebep boldy dep sanaıdy. Biraq olardyń aıtýynsha, naqty qozǵalys kólemi eskerilmegen.

Sonymen qatar, "Avtobys" qosymshasynda №10 baǵytynyń aıaldamaǵa kirmeıtini kórsetilgenimen, avtobýstar áli de sol jerge toqtap, jolaýshylardy túsirip, turaqtap jatqany aıtylady.

Kelesi qadamdar

Qazirgi tańda ujymdyq shaǵym Sanıtarlyq-epıdemıologıalyq baqylaý komıtetinde qaralýda. Shý men atmosferalyq aýany ólsheý jumystary taǵaıyndaldy.

Alaıda, turǵyndar jumys rejımin ózgertýdi emes, aıaldamany múldem basqa jerge kóshirýdi talap etedi. Olardyń pikirinshe, turǵyn úılerdiń terezesiniń astynda mınýt saıyn kólikter qozǵalatyn kólik toraby jumys istemeýi tıis.

"Biz avtobýstarǵa qarsy emespiz. Biz aıaldamanyń osynda ornalasqanyna qarsymyz", - deıdi olar.

Redaksıa qala ákimdigi men tıisti qyzmetterge qosymsha saýal joldap, naqty júktemeni eskere otyryp, aıaldamanyń ornalasýyn qaıta qaraý josparlanyp otyrǵany týraly túsinikteme berýdi surady.