InfoHub Logo

Atyraý oblysy Jangeldın aýylyndaǵy Qarabalınder otbasynyń qazasyna qatysty is boıynsha kúdikti Sultan Sársemálıevke jańa aıyptar taǵyldy. Buǵan deıin eki nemese odan da kóp adamdy óltirý babymen tergelgen is endi qylmysty birneshe ret jasaǵany úshin de aıyptalýda.

Bul týraly Infohub.kz aqparat agenttigi habarlaıdy.

Atyraý oblystyq polısıa departamentiniń habarlaýynsha, Sultan Sársemálıevke Qylmystyq kodekstiń 99-baby 2-bóliginiń 1-tarmaǵymen qatar, 13-tarmaǵy – "birneshe ret jasalǵan adam óltirý" baby qosylǵan. Buǵan qosa, is materıaldarynda burynǵydaı 188-baptyń 2-bóligi boıynsha "aldyn ala sóz baılasý arqyly adamdar toby jasaǵan urlyq" jáne 190-bap boıynsha "alaıaqtyq" derekteri de qarastyrylyp jatyr. Prokýratýra bul epızodtardyń marqumdardyń jeke múlkin ıemdený jáne malyn zańsyz satý faktilerimen baılanysty ekenin málimdedi.

Qylmystyq kodekstegi saralaý

Advokat Abzal Qasymjanovtyń aıtýynsha, Qazaqstan Respýblıkasynyń Qylmystyq kodeksinde "eki nemese odan da kóp adamdy óltirý" jáne "birneshe ret jasalǵan adam óltirý" degen eki túrli saralaý belgisi bar. Birinshisi – bir oqıǵa aıasynda birneshe adamnyń óltirilýin bildirse, ekinshisi – ártúrli ýaqytta jáne ártúrli jaǵdaıda jasalǵan qylmystardy qamtıdy.

Qandaı jaza kútip tur?

Advokat Abzal Qasymjanov istiń qoǵamda úlken rezonans týdyrýy men kúdiktiniń shetelge qashýǵa árekettenýin eskere otyryp, sottyń eń qatań jaza qoldanýy múmkin ekenin aıtty. Qalyptasqan sot tájirıbesine súıensek, kúdiktige ómir boıyna bas bostandyǵynan aıyrý jazasy taǵaıyndalýy yqtımal.

Ekinshi advokat, Samat Ábýev, adam óltirýmen qatar urlyq jáne alaıaqtyq boıynsha aıyptardyń sot úkimine qalaı áser etetinin túsindirdi. Onyń sózinshe, jaza qylmystar jıyntyǵy negizinde belgilenedi, ıaǵnı jeńilirek jazalar qatań jazaǵa qosylyp esepteledi. Eger qylmystyń asqan qatygezdikpen jasalǵany dáleldense, sot ómir boıyna bas bostandyǵynan aıyrý jazasyn taǵaıyndaýy múmkin. Degenmen, naqty sanksıany sot istiń mán-jaıyna qaraı jeke belgileıtinin atap ótti.