InfoHub Logo

Atyraý oblysyndaǵy Jangeldın aýylynda bolǵan Qarabalınder otbasynyń tragedıasyna qatysty qylmystyq is boıynsha jańa mán-jaılar anyqtaldy. Bul qandy oqıǵaǵa kúdikti retinde tanylǵan 29 jastaǵy Sultan Sársemalıevke taǵylǵan aıyptar kóbeıip, iske jańa baptar qosyldy. Onyń áıeli, marqumdardyń qyzy Aqbaıan Muqanǵalıeva sot-psıhologıalyq-psıhıatrıalyq saraptamadan ótý úshin medısınalyq mekemege jiberildi.

Bul týraly Infohub.kz aqparat agenttigi habarlaıdy.

İske jańa aıyptar qosyldy

Bastapqyda is Qylmystyq kodekstiń 99-baby 2-bóligi, 1-tarmaǵy boıynsha, ıaǵnı eki nemese odan da kóp adamdy óltirý faktisi boıynsha tergelip jatqan edi. Alaıda, tergeý barysynda jábirlenýshilerdiń malyn satý jáne múlkin ıemdený derekteri anyqtaldy. Osyǵan baılanysty Qylmystyq kodekstiń 188-baby («Urlyq») jáne 190-baby («Alaıaqtyq») boıynsha bólek qylmystyq ister qozǵaldy. Bul oqıǵaǵa alaıaqtyq boıynsha úshinshi epızodtyń qosylǵanyn bildiredi.

Áıeli saraptamaǵa jiberildi

Qadaǵalaý organynyń habarlaýynsha, kúdiktiniń jubaıy Aqbaıan Muqanǵalıevanyń áreketterine ázirge quqyqtyq baǵa berilmegen. Oǵan qatysty eshqandaı bultartpaý sharasy tańdalmaǵan. Eger onyń psıhıkalyq aýytqýlary anyqtalsa, Almatydaǵy Sot saraptamalary ınstıtýtynda stasıonarlyq keshendi saraptama taǵaıyndaý máselesi qarastyrylady.

Tergeý jalǵasýda

Prokýratýra barlyq mán-jaılar anyqtalyp, saraptama qorytyndylary alynǵannan keıin kúdiktilerdiń áreketterine túpkilikti quqyqtyq baǵa beriletinin málimdedi. Tergeýdiń aıaqtalý merzimi júrgizilip jatqan saraptamalar men tergeý áreketteriniń aýqymyna baılanysty bolady.

Esterińizge sala keteıik, 6 qańtarda sharýashylyq qurylys astynan marqumdar Maqsot Qarabalın men Nasıpa Óteshqalıevanyń máıitteri tabylǵan bolatyn. Keıinnen joǵalǵan balalardy izdeý barysynda taǵy eki adamnyń, Mıramgúl Qarabalına men Naýryz Muqanǵalıevtiń máıitteri tabyldy. Kúdikti retinde tanylǵan Sultan Sársemálıev Indonezıada ustalyp, Qazaqstanǵa jetkizilgen bolatyn.