InfoHub Logo

Atyraý oblysynda týystaryn asa qatygezdikpen óltirdi dep aıyptalǵan Sultan Sársemálıevke qatysty sot prosesi jalǵasyp jatyr. İs dáleldemelerdi zertteý kezeńine ótip, sot otyrysynda tergeý barysynda túsirilgen beınematerıaldar kórsetildi.

Bul týraly Infohub.kz aqparat agenttigi habarlaıdy.

Marqumdardyń denesi qalaı tabylǵan?

Sotta 2025 jyldyń jeltoqsanynda joǵalyp ketken erli-zaıypty Maqsot Qarabalın men Násip Óteshqalıevanyń deneleri tabylǵan sátke qatysty kadrlar usynyldy. Tergeý málimetinshe, olardyń máıitteri jeke úıdiń aýlasyndaǵy qora ishinde shamamen 1,3 metr tereńdikke kómilgen. Jerlengen orynnyń ústi lınoleýmmen jabylǵany aıtyldy.

Beınematerıalda tergeýshiler aldymen er adamnyń, keıin onyń astynan áıeliniń denesin shyǵarǵany kórsetilgen. Buǵan deıin polısıa, Ulttyq ulan qyzmetkerleri men arnaıy tehnıka jumyldyrylǵan izdeý jumystary júrgizilgenimen, nátıje bolmaǵan. Tergeý dereginshe, jasyryn kómilgen oryn 2026 jylǵy 9 naýryzda tergeý eksperımenti kezinde anyqtalǵan.

Sot zalynda kórsetilgen bul kadrlar marqumdardyń týystaryna aýyr áser etti. Al aıyptalýshy Sultan Sársemálıev beınematerıaldardy únsiz qarap otyrdy.

Kúdiktiniń Balıge qashý áreketi

Sotta aıyptalýshynyń Atyraýdaǵy "Dına" bazaryndaǵy lombardqa barǵan sáti de kórsetildi. Baqylaý kameralaryndaǵy kadrlarda onyń zergerlik buıymdar salynǵan qyzyl qorapshany ótkizip, keıin aqsha alyp shyqqany baıqalady. Tergeý tarapy bul áshekeıler qaza tapqan otbasynyń úıinen alynǵan bolýy múmkin dep esepteıdi.

Budan bólek, sotta Sársemálıev pen onyń jubaıy Aqbaıan Muqanǵalıevanyń Qazaqstannan ketken baǵyty týraly da aıtyldy. Tergeý málimetine sáıkes, olar 2025 jylǵy 9 jeltoqsanda "Qaplanbek" ótkizý beketi arqyly Ózbekstanǵa ótken. Keıin Tashkentten Kýala-Lýmpýr arqyly Indonezıanyń Balı aralyna barǵan.

Erli-zaıypty birneshe aı boıy Indonezıada bolǵan. Alaıda 2026 jylǵy 24 aqpanda jergilikti kóshi-qon qyzmeti olardy vızalyq rejımdi buzǵany úshin ustaǵan. Keıin ekeýi Qazaqstanǵa deportasıalanyp, quqyq qorǵaý organdaryna tapsyrylǵan.

Qazir sot prosesi jalǵasyp jatyr. İstiń tolyq mán-jaıy sot barysynda anyqtalmaq.