InfoHub Logo

Áleýmettik jelide «Atyraýdyń hakeri» degen atpen tanymal bolǵan azamat Túrkıa aýmaǵynda ustaldy. Bul týraly aqparattyq agenttikter habarlady.

Operasıa Túrkıanyń Samsýn qalasynda ótti. Kúdiktini Interpol qyzmetkerleri ustap, Qazaqstanǵa ekstradısıalaý máselesi qarastyrylýda.

Buǵan deıin polısıa bul azamattyń birneshe alaıaqtyq áreketke qatysy bar ekenin málimdegen. Oǵan Qazaqstan Respýblıkasy Qylmystyq kodeksiniń 190-baby — «Alaıaqtyq» boıynsha qylmystyq is qozǵalǵan.

Tergeý nusqasyna sáıkes, Qurmanǵazy aýdanynyń turǵyny ózin ártúrli qyzmet kórsetýshi retinde tanystyryp, azamattardy aldap kelgen. Investısıa tartý, IT salasynda oqytý, buǵattalǵan akkaýnttardy ashý, aqshalaı qarajatty sheshý jáne tehnıka satý sekildi ýádelermen adamdardyń senimine kirgen. Aldyn ala esep boıynsha, keltirilgen shyǵyn kólemi 13 mıllıon teńgeden asqan.

Qańtar aıynda Atyraý qalasynyń mamandandyrylǵan tergeý soty kúdiktige qatysty syrttaı qamaýǵa alý túrindegi bultartpaý sharasyn sanksıalaǵan. Oblystyq prokýratýranyń málimetinshe, ol halyqaralyq izdeýge jarıalanǵan bolatyn.

Aqpan aıynda Túrkıanyń Samsýn qalasynda ustalǵan kúdiktini ekstradısıalaý týraly suraý salýdy ázirleý úshin tıisti ótinish joldandy.

Aıta keteıik, bul azamat buǵan deıin Atyraý oblysyndaǵy bir otbasynyń joǵalyp ketýine baılanysty rezonansty oqıǵadan keıin áleýmettik jelide keńinen tanylǵan. Sol kezde ınternette onyń ózin «Atyraýdyń hakerimin» dep tanystyryp, isti óz betinshe zerttep júrgenin aıtqan vıdeolary taraǵan.