InfoHub Logo

Áleýmettik jelide Qazaqstannyń Tuńǵysh prezıdenti Nursultan Nazarbaevqa arnalǵan jazba jurtshylyqtyń nazaryn aýdardy. Instagram qoldanýshysy Lázzat Asanova el aǵasyna saýlyq tilep, "Aýyrmańyz, Nursultan aǵa!" degen jazba jarıalady.

Bul týraly Infohub.kz aqparat agenttigi habarlaıdy.

Elbasynyń eńbegine toqtalyp ótti

Avtor óz jazbasynda el basqarýdyń qanshalyqty aýyr jaýapkershilik ekenin atap ótip, táýelsizdiktiń alǵashqy jyldaryndaǵy qıyn kezeńderde memleket tizginin ustaǵan tulǵalardyń eńbegi eshqashan umytylmaıtynyn aıtty. Onyń pikirinshe, Nursultan Nazarbaev eldiń qalyptasýyna, ekonomıkany, syrtqy saıasatty damytýǵa jáne elordany kórkeıtýge zor úles qosqan.

Halqymyzdyń izgi dástúri

"Halyqtyń alǵysy men aq batasy – elge qyzmet etken azamat úshin eń úlken marapat. Densaýlyq – adamǵa berilgen eń qymbat nyǵmetterdiń biri. Sondyqtan el aǵasyna saýlyq pen uzaq ǵumyr tileý – halqymyzdyń izgi dástúri", – dep jazdy Lázzat Asanova.

Jeli qoldanýshysy jazbasynda el ishinde birlik pen turaqtylyq saqtalyp, kók baıraqtyń árdaıym bıikte jelbireýin tiledi. Alaıda, jazbaǵa jasandy ıntellekt arqyly jasalǵan, Nazarbaevtyń aýrýhanada jatqandaı kórinetin sýretin qosqany kópshiliktiń talqysyna sebep boldy. Bul sýrettiń naqty jaǵdaımen baılanysy bar-joǵy ázirge belgisiz.

Densaýlyǵy týraly jalǵan aqparattar

Buǵan deıin Nursultan Nazarbaevtyń densaýlyǵyna qatysty túrli aqparattar áleýmettik jelide taraǵan bolatyn. Astanadaǵy University Medical Center (UMC) medısınalyq ortalyǵy Nazarbaevqa júregine operasıa jasaldy degen qaýesetterge qatysty túsinikteme berip, bul málimetterdiń eskirgenin jáne ózektiligin joǵaltqanyn habarlaǵan edi. Ortalyq qoǵamdy tekserilmegen aqparattardy taratpaýǵa shaqyrdy.

UMC-nyń málimetinshe, Nazarbaevqa jasalǵan sońǵy operasıa týraly resmı aqparat 2023 jyly jarıalanǵan. Sol kezde belgili kardıohırýrg Iýrıı Pá operasıany júrgizgeni habarlanǵan bolatyn.