InfoHub Logo

Kólik satarda baǵany ádeıi tómendetip kórsetý – salyqtan jaltarǵysy keletinderdiń jıi qoldanatyn ádisi. Alaıda, Memlekettik kirister komıtetiniń mamandary bul árekettiń qandaı saldarǵa ákep soqtyratynyn eskertti.

Bul týraly Infohub.kz aqparat agenttigi habarlaıdy.

Nege baǵany tómendetýge bolmaıdy?

Keıbir satýshylar kóligin nemese basqa da múlikterin satqanda, onyń qunyn 1-2 myń teńge dep kórsetip jatady. Mundaı jaǵdaılarda salyq organdary satýshynyń ózi jaýapty bolady. Máselen, siz kóligińizdi myń teńgege satyp, keıin arada bir apta ótpeı jatyp jańa kólik satyp alsańyz, ondaǵy aqshanyń qaıdan kelgeni týraly suraq týyndaıdy.

«Sondyqtan árqashan múlikterińizdi satqanda naqty baǵasyn, sondaı-aq satyp alǵandaǵy qunyn kórsetýge keńes beremiz. Bul bolashaqta týyndaıtyn suraqtardyń aldyn alady», - deıdi Memlekettik kirister komıtetiniń Tólemsiz kiristerdi ákimshilendirý basqarmasynyń basshysy Dına Qusaıynova.

Salyqtyq saldary qandaı?

Eger siz kólikti myń teńgege satyp, keıin ony 15 mıllıon teńgege satsańyz, onda sizdiń paıdańyz 15 mıllıon teńge bolyp esepteledi (myń teńgeni shegergende). Bul somaǵa salyq tóleýge týra keledi.

Esterińizge sala keteıik, 2026 jyldyń 1 qańtarynan bastap Qazaqstanda jańa Salyq kodeksi kúshine endi. Endi múlik satqanda jeke tabys salyǵyn (JTS) tólemeý úshin ony 2 jyldan astam ýaqyt ıelený qajet (buryn 1 jyl bolatyn). Eger turǵyn úıdi nemese basqa da menshikti bul merzimnen buryn satsańyz, JTS tóleısiz.

Mańyzdy: eger múlik satýdan alynǵan paıda somasy 36 mıllıon teńgeden aspasa, onda 10 paıyz, al bul somadan joǵary bolsa, salyq mólsheri 15 paıyz bolady.