InfoHub Logo

Halyq ańyzy boıynsha, Aısha Bıbiniń kórkine aqyly saı sulý bolǵan. Qarahan eliniń batyry Aıshaǵa ǵashyq bolady. Qyz da jigitti unatyp júredi. Toıǵa jaqyn qalǵanda shyǵystan shapqan jaýǵa batyr attanyp ketedi. Sol soǵystan qaıtyp kele jatqan jigitti Aısha kútip almaqshy bolyp, qarsy shyǵady. Asy ózenine kelip, Aısha bıbi sýǵa shomylmaqshy bolady. Sýdan shyǵyp, kıimin kıip jatqanda sáýkele ishine kirip ketken jylan qyzdy shaǵyp alady. Óler aldynda batyr ekeýi jolyǵyp, nekelesedi. Batyr jigit súıgen jary Aıshaǵa arnap záýlim kúmbez ornatypty. Osy kúmbez Taraz qalasynyń mańynda ornalasqan.

Ǵımarattyń saqtalǵan jalǵyz qabyrǵasynyń ózin zertteý barysynda XI - XII ǵasyrlarǵa tán qurylystyń oıý-órnekteriniń ásemdigine, qurylysshylardyń sheberligine tań qalarlyqtaı. Ǵımarattyń tórt qabyrǵasy da áshekeıli etip oımyshtalǵan kirpishtermen bir-birine úshkildep, qıystyra qalanǵan. Esik-terezeleriniń mańdaıshalary shyǵys úlgisinde tekshelene órilip, shatyr arqalyǵymen baılanystyrylǵan. Bulardyń barlyǵy da órnekti taqtashalarmen kómkerilgen. Aısha bıbi mazaryndaǵy qoldanylǵan oıý-órnekter búkil qazaq dalasyna tán qurylystardy bezendirýdiń jıyntyǵy deýge de bolady. Mazar qabyrǵasynyń syrt betine qalanǵan tórt buryshty kirpishterge oıylyp salynǵan oıý-órnekter úlgi-bitimi jaǵynan birdeı bolǵanmen, kóleminde eptep te bolsa aýytqý bar. Munyń ózi árbir kirpishtiń qalypta quıylmaı, qoldan oıylǵanyn kórsetedi. Búginde týǵan ólkemizdegi sáýlet óneriniń injý-marjandarynyń biri — Aısha bıbi mazaryn qalpyna keltirý jumystary júrgizildi.

---