InfoHub Logo

Álemge tanymal qazaqstandyq ánshi Dımash Qudaıbergen jeke ómiri týraly qaýesetterge tosqaýyl qoıdy. Instagram jelisindegi tikeleı efırde ánshi ózi týraly aıtylyp júrgen ártúrli áńgimelerge qatysty shyndyqty aıtty.

Bul týraly Infohub.kz aqparat agenttigi habarlaıdy.

Dosy ári áriptesi Rasýl Ýsmanovpen birge ótkizgen onlaın kezdesý barysynda Dımashqa oqyrmandardan jeke ómirine qatysty suraqtar kelip túsken. Sonyń birinde onyń «qyzy» týraly suraq qoıylǵanda, ánshiniń jaýaby kópshilikti kúlkige qaryq qyldy.

Dımash: «Qyzym bar ekenin bilsem, ózim de suraımyn»

Ánshi bul suraqqa ázilmen jaýap berip, «Qyzymnyń atyn qalaı qoıǵanymdy surap tursyz ba? Eger meniń qyzymdy bilseńizder, maǵan da aıtyp jiberińizdershi, ózime de qyzyq, onyń qaıdan paıda bolǵany», – dedi.

Dımash ózi týraly túrli qaýesetterdiń jıi aıtylatynyn moıyndady. Keıbir jankúıerler ánshiniń otbasy men balalary bar dep oılasa, endi bireýleri tipti birneshe áıeli bar degen sıaqty jalǵan aqparattar taratady eken.

«Meniń balalarym, otbasym bar dep oılaıdy»

«Nege ekenin bilmeımin, adamdar meniń balalarym, otbasym bar dep oılaıdy. Keıbiri tipti birneshe áıelim bar deıdi», – dep aǵynan jaryldy ánshi.

Dımash óziniń áli úılenbegenin jáne bar ýaqytyn shyǵarmashylyqqa arnap júrgenin atap ótti. «Kúni boıy stýdıada jumys isteımin, konsertterge shyǵamyn. Qazirdiń ózinde stýdıadamyz, dostar… Ázirge úılengen joqpyn», – dedi ol.

Sonymen qatar, ánshi bolashaqta otbasy qursa da, jeke ómirin kópshilikke jarıa etkisi kelmeıtinin jetkizdi. Onyń pikirinshe, «baqyt tynyshtyqty jaqsy kóredi».