InfoHub Logo

Aqyn Serikzat Dúısenǵazy óziniń YouTube arnasyndaǵy suhbatynda basynan ótkergen eń qıyn kezeńderin, ásirese ulynan aıyrylǵandaǵy jan kúızelisin jasyrmaı aıtyp berdi. Bul týraly Stan.kz saıty Ozgeris.info-ǵa silteme jasap habarlaıdy.

Aqynnyń aıtýynsha, ulynyń qaıtys bolǵanynan keıin ol biraz ýaqyt eseńgirep qalǵan. Keıinnen marqum ulynyń jazǵan óleńderin taýyp alǵanda, onyń taǵdyryn aldyn ala sezingendeı áserge bólengenin jetkizdi. 15 jasar ulynyń tereń fılosofıalyq oılarǵa toly týyndylary aqyndy qatty oılandyrǵan.

«Qaıǵy – synaq. Qudaı synaqty da beker bermeıdi, onyń fılosofıalyq astary bar shyǵar. Keıin balamnyń óleńderin taýyp aldym. Sol óleńderinde óziniń taǵdyryn sezgendeı jazady. 15 jasynda tereń fılosofıalyq týyndylar jazǵan. Oılanyp qaldym, bul jaı nárse emes qoı dep», – dedi Serikzat Dúısenǵazy.

Aqyn bul aýyr kezeńde oǵan qoldaý kórsetken aǵa býyn ókilderine alǵys bildirdi. Olar mundaı qasiretti kótere almaı, ómirden ozǵan jandardy mysalǵa keltirip, aqyndy jubatqan.

Serikzat Dúısenǵazy úshin anasynyń dúnıeden ketýi de úlken soqqy bolǵan. Ol anasyn «áýlettiń bar qaıǵysyn ózimen birge alyp ketkendeı boldy» dep sıpattady.

Suhbatta aqyn ulynyń anasy, jary Aınurdyń bul jaǵdaıdan áli kúnge deıin tolyq shyǵa almaı júrgenin de aıtyp ótti.

Aıta keteıik, Serikzat Dúısenǵazynyń uly Álıhan qaıtys bolǵannan keıin 9 aı ótken soń Álimhan esimdi perzenti dúnıege kelgen. Aqyn bul sábıdiń josparlanbaǵan, kóptiń batasymen kelgenin atap ótti.