InfoHub Logo

Joldyń osy bir bóligi Berik úshin asa almas asý, tym qıyn. Aıańdap kelip, osy tusqa jetkende ózimen ózi arpalysyp, tabanyna tas batqandaı kibirtikteıdi de qalady. Jaı ári-sári bolsa jaqsy ǵoı, tusalyp qalǵandaı alǵa qaraı attap basa almaı, qaradaı qınalady. Júrmeıin dese taǵy pále, basqa jol joq. Amalsyz adymdap, ilgeri jyljıdy.

Mine, búgin de sol múshkil hal. Súıretile basyp, syrǵyp keledi. Bir jaq janyna qaramaýǵa tyrysty. Bar pále sol jaqta tur ǵoı, óıtkeni. Ózin ápjylandaı arbap, aqylynan aýdaryp bara jatqan sıqyr sol tarapta. Qol sozymda ǵana. Sál bosaı qalsa boldy, ózine qaraı julqa tartyp, jutyp áketpek. Onda saýdasynyń bitkeni. Bolǵan buryn ondaı jaı... Kibirtikteı basyp jyljyp kele jatqany sol edi, ne bolǵanyn ańdamaı qaldy, azdan soń esin jıǵanda, jyn tıgendeı elirip, shıqyldaǵan oıyn avtomatynyń aldynda otyrǵanyn biraq bildi. Bilgen sátte shoshydy. Óıtkeni, bergen ýádesi bar ǵoı ákesine. Endi ne bolmaq?

Biraq, keshirim boldy. Tek bir ǵana shartpen. Oryndalmaıtyn qurǵaq ýaǵdalarǵa endigary senbes bolǵan ákesi qadalyp otyryp qolhat jazdyryp aldy. «Osylaı da osylaı, endi qaıtalasam, aıaýshylyq bolmasyn dep». Endi shynymen-aq aıaý bolmaıdy. Ne jaza qoldanylatynyn bilmeıdi, biraq, keńshilik bolmaıtyny anyq... Tek osydan qoryqqannan ǵana esin joǵaltpaı jyljyp keledi. Áıpese...

Keıde osy úlkenderdi túsinbeıdi. Keıbir qylyqtaryn oılaǵanda, tipti, jek kórip ketedi. «Ne tur eken kishkene oınaǵanda» deıdi ishinen kijinip. Degenmen, artynan ákesiniń «sabaq qaıda... sabaq? Úlgerimi tómendep ketti dep apaıyń kúnde telefon soǵady.. ne boldy saǵan?» degen sózi esine túskende baryp ne derin bilmeı tosylyp jalady. Sebebi, ne bolyp jatqanyn ózi jaqsy biledi ǵoı. Qyńq ete almaıdy.

Eshteńeni eskermegen bolyp kózin jerge salyp aldy. Biraq, ishteı taıaý jerdegi jalmaýyzdyń ózin áldene sıqyrymen arbap, tartyp bara jatqanyn sezip keledi. Moınyn burmaýǵa, shydaýǵa tyrysty. Degenmen, arjaǵynda tolyq senim joq. İshteı qalt-qalt etedi.

Bolmaı bara jatqan soń, buryla jóneleıin dep bir toqtady da, qaıta bógeldi. «Sońǵy ret bir baryp alyp, sonan soń múlde qoısam ba eken?» degen bir oı kelgen-di basyna. Biraq óıte almady. Óıtkeni, ol ár kúni aıtylatyn sóz ǵoı. Qazir sóıtip oılaǵanymen, ertesi bári bir taǵy «sońǵy ret» oınaǵysy kelip qalady. Nege olaı bolatynyn ózi de anyq túsinbeıdi. Áıteýir, qashanda solaı bolyp shyǵatyn, bárine artynan ózi ókinetin. Keshkesheıin urys estigenniń nesi jaqsy, mundaı qylyqty qaıtalamaýǵa qansha bekingenmen, ertesi jeńilip qalatyn. Mine, búgin de belgisiz bir pále murnynan jetektep, súırep barady. Tipti, erkine qoıatyn emes...

«Joq! — dedi bul ishteı bulqynyp. — Barmaımyn! Barsam, ákem urady... » dedi artynsha ashýlanyp. Kóz aldyna ákesiniń susty beınesi elestedi. Sońǵy ret ákesi shynymen-aq aıaýshylyq degendi bilmeıtin, qatýly adamǵa ózgergen edi. Mundaıyn buryn kórmegen bul ári tań qalyp, ári sumdyq shoshyǵan-dy. Bosap bara jatqan bir sátte sol úreı kelip, júregine diril júgirtti. Dál sol keshegindeı bolyp tiksinip, tez es jıdy. Áldıine alyp bara jatqan «Meni qorqytý úshin áteı qabaǵyn túıgen shyǵar, az oınap alyp, artynan barsam, eshteńe etpes» degen aldamshy oıy short tıyldy. Aqylyn tapty. Qarasa, áli joldan shyǵa qoımapty. Jiti basyp, alǵan qaraı adymdaı jóneldi. Aıdaharsha arbap, torǵaıdaı shyryldatyp bara jatqan qarǵys atqan jerden jyldam alystap ketkisi keldi. Artynsha uzap ta bara jatty.

Tek bir sátten keıin ǵana ózin erkin sezine bastady. Belin bekem býyp, odan saıyn nyǵaıa tústi. Sonyń arasynsha bolǵan joq, ishinen «Berik! Berik! Seniń atyń — Berik» dep kele jatqanyn bildi. İle tıyla qoıdy. Ózin páleden neniń qutqarǵanyn sol mezette anyq shamalydy. Bul keshe aıtqan ákesiniń sońǵy sózi edi. «Men seniń atyńdy, ýádesine berik bolsyn, esh qıyndyqtan jeńilmesin dep, Berik qoıǵam! Bilip qoı, seniń atyń — Berik!» degen.

«Iá, meniń atym — Berik! Men jeńilmeımin!» dedi artynsha ózine ózi. İshteı qatty qýandy. Biraq nege sonsha qýanǵanyn ózi anyq bilgen joq.

---