InfoHub Logo

Kishkentaı Dáýlet bazar qaıdasyń dep ushyp keledi. Maqsaty sońǵy sátke bolsa da úlgerý. Al kóńilinde kezektesken bir úmit, bir kúdik. Úmiti — janqaltasyndaǵy otyz teńge. Al kúdigi — qajetti aqsha tolyq emes, tek jartysynan áreń asady. Kúte turý kerek edi, biraq oǵan taǵaty jetpedi. Óıtkeni erteń — jarys. Ári oǵan qatysam dep ýáde berip qoıǵan. Odan qalý — jurtta qalý degen sóz. Ólimmen birdeı. Sony oılap, ne de bolsa baryp kóreıin dep kúnniń kesh kirgenine qaramaı zytyp keledi. Shamalaýynsha, bazar endi-endi jabylýǵa tıis. Mine, eki aıaǵy jerge tımeı ushyp keledi. Júreginde eptegen qobaljý bar. Biraq, soǵan qaratpaı, ózi de bilmeıtin áldene dedektetip jetektep keledi. Tez jetpese, kerekti zatyn bireý kelip alyp ketetindeı. Tipti, alyp ketken bolýy da múmkin, oıda joqta kórip, «alam» dep bekingenine qashan. Apasymyn birge bazar aralap júrgen bolatyn, tosyn kózi tústi. Janary jarq etti. Jaqyndap baryp qarap edi, astyndaǵy qatty qaǵazda baǵasy jazýly tur eken. Elý teńge. Sumdyq kóp aqsha. Eki álde úsh nannyń quny. Ózi biletin jáne qaǵystyryp-soǵystyryp shetinen bolmashy tıyn-teben túsiretin belgili zattyń qunymen ólshedi. Biraq alǵashqy qýanyshy sý sepkendeı basyla berdi. Mynandaı aqsha jıý úshin az degende bir aı kerek. Apasy beretin bir nannan uzasa bir ne eki teńge únemdeýi múmkin. Odan kóp eshqashan bola qoımaıdy.

«Apama aıtyp kórsem be eken» dep bir oqtaldy artynsha. Biraq ol oıynan tez aınydy. Muǵalim ákelýdi tapsyratyn eki júz teńgeniń ózin qaltalaryn aqtarystyryp júrip áreń taýyp beretin adamda qaıdaǵy artyq aqsha. Sony eske alyp, saly sýǵa ketkendeı basyla berdi. Artynan baıqady, qıal soǵyp turǵanda apasy áldeqashan uzap ketipti. Artynan tura júgirdi.

Sodan beri oıynda elý teńge. Kúndiz esinen, túnde túsinen shyqpaıdy. Talaı ret kókeıtesti armanyna qol jetkizdi. Biraq, oıana kelgende, onysy jaı kórgen túsi bolyp shyǵyp, jer sıpap qalyp júrdi.

Sóıtip júrgen kúnderdiń birinde elý teńge tabýdyń joly da tabyldy-aý, áıteýir. Aýylǵa ómiri kelmeıtin bótelke jınaýshy keldi. Ozandaı aıǵaılap kóshe-kósheni basyna kóterdi. Biraq ne aıtyp jatqany túsiniksiz. Sol uǵynyqsyz sózderdiń  arasynan «býtylka» degen sózdi qulaǵy shalǵanda baryp, bári saırap júre berdi. Qýanyp ketti. Biraq beretin aqshasy mardymsyz eken. Ony artynan bildi. Aýyldyń túkpir-túkpirin tintip shyǵyp, áreń tapqan bos qumyralaryn ákep ótkizip edi, bar-joǵy otyz teńge boldy. Úsh on teńgelik syldyr etip alaqanyna túskende asa shattana qoıǵan joq. Onyń taǵy bir sebebi bótelke izdep tentireýdi ary jalǵastyrýǵa ýaqyt joq edi — kún eńkeıip, kesh kirip barady. Kerekti dúnıesin búgin baryp almasa, erteń kesh. Tań atsa — jarys. Keshigýge bolmaıdy. Kóp oılanyp turǵan joq, bazar qaıdasyń dep tartyp otyrdy. Sodan kele jatqan beti osy. Kóńilinde bir úmit, bir kúdik.

Bazarǵa taıap qalǵanda kúdigi múlde basym orynǵa shyqty. Kóńili qobaljyp, qaımyǵa berdi. Al mezgeýli jerge taqap barǵanda múlde dármeni quryp, boıyn úreı aldy. Biraq sonda da toqtamaı qybyrlaı berdi. Jyljı berdi. Joq, kórgen zaty ornynda eken. Alystan kóz salyp, kádimgideı qýanyp qalǵanymen, baǵasy jazylǵan qaǵazdyń ornynda joǵyn kórgende júregi bir aýnap tústi. «Tipti de qymbattap ketti me» degen qorqynysh edi onysy. Janyn eljiretken bir muqtaj sezim bıledi boıyn. «Bir tilegimdi bere kór!» dedi ishinen kimnen ótingenin ózi bilmeı. Jaqyndaı bere satýshydan zárý zattyń baǵasyn surady. «Otyz teńge» dedi satýshy. Dúnıe nurlanyp júre berdi. Sol sát kózinen eki tamshy jastyń yrshyp ketkenin artynan bildi. Bir táýiri satýshy ony baıqaǵan joq. Bireýmen sóılesip tur eken, sol kúıi nazar aýdarmady. Qolyndaǵy aqshany ornyna qoıdy da, keregin qolyna aldy. Artyna qaraı burylǵanda jer betindegi jalǵyz baqytty adamdaı sezindi ózin.   

---