InfoHub Logo

Aıdar bıyl ekinshi synypta oqıdy. Mektebi jaqyn, irgede tıip tur. Úılerinen shyǵyp túzý kósheni boılap, eki qıylystan ótken soń, ońǵa burylsa — qaqpadan enedi. Biraq, sonǵan qaramaı, ótken jyly ájesi áldeneden alańdap, ózi aparyp, ózi ákelip júrdi. Óz betimen baratyn bolǵany tek bıyl ǵana.

— Sen bıyl segizge toldyń. Meni salpaqtatpaı endi óziń baryp-kel. Biraq, esińnen shyǵarýshy bolma, sen umytshaqsyń. Kerekti zattaryńa yqtıatty bol! — dedi ájesi qyrqúıektiń biri kúni mektepke ákele jatyp. — Ana arqańdaǵy boqshańdy bir jerge qoıyp, sol kúıi tastap ketip júrme.

Bul sózderden Aıdar ájesiniń ózine nege sonsha sharshamaı erip júretininiń syryn ǵana emes, óz boıyndaǵy buryn ańǵarmaǵan bir kemistigin de bilgendeı boldy. Biraq, moıyndaǵysy kelmedi.

— Joq, áje, men umytshaq emespin. Osy kúnge deıin eshteńemdi joǵaltyp kórgen joqpyn ǵoı. Men qalaı umytshaq bolam...

Nemeresiniń betine barlaı qaraǵan áje onyń ózi bilmeıtin kemshiligin moıyndaǵysy keleıtinin ári jasaǵan eskertýine kádimgideı namystanyp qalǵanyn sezip, odan ary qutqýyrlaǵysy kelmedi.

— Jaqsy. Sen — umytshaq emessiń. Degenmen, qaperińde júrsin degenim ǵoı, — dedi sóziniń sońyn jaıbaraqatqa salyp.

Sol kúnnen bastap mektepke ózi baryp, ózi kelip júr. Barǵanda da, kelgende de zattaryna barynsha yqtıat. Túgendep alyp ketip, túgendep alyp keledi. Ázirshe esh nárseden shashaý shyǵarǵan joq. Baıqamaı múlt ketirse, ájesiniń qadalyp, jelkeleıtinin biledi. Sondyqtan, saq.

Biraq, bir jolǵy oqys jaǵdaıdan keıin óziniń sonshama jınaqy, muqıat ekenine eptep kúdiktene bastady. Biraq, umytshaq ekenin, bári bir, moıyndaǵan joq. Bir retki kezdeısoq jáıtke jorydy.

Ol osy jylǵy oqý maýsymynyń jańa bastalǵan kezi bolatyn. Bir kúni balalarmen birge mektepten shyqty da, jolaı asyq oınap jatqan tanys balalarǵa kezdesti. Asyq dese ishken asyn jerge qoıatyn ol taǵat qyla almady. Arqasyndaǵy aýyr boqshasyn alyp, andaı jerdegi alasa aǵashqa ildi de, janqaltasynan tastamaı alyp júretin saqasy men shúkimaıttaryn shyǵardy. Sonyń arasynsha bolǵan joq, bylaıǵy dúnıe múlde esinen shyǵyp, oıynnyń ıirimine ene boılap kete berdi. Bireýdi utty, bireýden utyldy, qyzyqqa ábden batty. Tek kún uıasyna eńkeıgenin baıqaǵan sátte ǵana basyn kóterdi.

Qaıtar jolda, nege ekenin, utqanyn emes, ylǵı utylǵanyn oılaýmen boldy. Átegen-aı jibergen tustary esine túskende, ishi ýdaı ashydy. Sol ókinishpen kelip tabaldyryqtan attady. Óz bólmesine kirip, kıimin aýystyrdy. Asúıge bas suǵyp, ájesi ázirlegen qaımaqty shaıyn ishti. Basqalardyń kelýine áli biraz ýaqyt bar eken. Bólmesine qaıtyp baryp, tósegine qısaıdy. Osynyń bárinde ol álgindegi qym-qıǵash oıyn jaıyn úzdiksiz oılaýmen boldy. Óte-móte utylǵan, ońsyz sátterin.

Jata-jata bir kezde kesh batqanyn ańdady. Tapsyrma oryndaý kerek ekeni esine túsip, jan-jaǵyn sholyp, sómkesin izdedi. Sol kezde baryp saq etti... boqshasyn baǵana ilgen jerine tastap ketkeni jadyna uryldy. Mańdaıynyń teri burq ete tústi. Eshteńege qaraǵan joq, esikke qaraı tura umtyldy. Tabaldyryqtan attaǵan beti asyq oınaǵan jerine jetip biraq toqtady. Joq. Sómkesi qoıǵan jerinen kórinbedi. Onsyzda júregi aýzyna tyǵylyp turǵan Aıdar ózin tejeı almaı jylap jiberdi.

Keshikpeı súlkini túsip artyna qaıtty. Súıretilip kelip esikten kirip, dybysyn bildirmeı óz bólmesine ótti. Bir qýanǵany, qashan tabaldyryqtan attap ketkenshe, qashan bolsyn aldynan shyǵyp, jigi-japar bop, dúnıelerin túgendep júretin ájesi kórinbedi.

Aıańdaǵan kúıi tósegine qaraı bettegen. Basyn salbyratyp sonda azkem otyrdy. Bir kezde jaılap basyn kóterdi. Esh maqsatsyz esikke qaraǵan. Sol sát jabýly esiktiń artyndaǵy kıimilgishte ilýli turǵan óziniń sómkesin kórgende, janary jarq etti. Sengisi kelmeı, kózin ýaqalap jiberip qaıta qarady. Óz boqshasy ekenine ábden kózi jetkende, qýanǵanyn atama. Ashshy daýsy shyǵa aıǵaılap jiberýge shaq qaldy. Ájesiniń estip qalýynan qoryqty ǵoı. Áıitpese, aıǵaılar edi.

Baryp, salmaǵyn sala salbyrap turǵan sómkesin ustap kórdi. Shattyǵynda shek joq edi. Biraq, artynsha onyń ájesi aıtqan álgi bir jáıtke aıǵaq bolyp, qarsy aldynda turǵany esine túskende, onsha unatpaı qaldy. Degenmen, onyń osy joly apshy qýyrar qatty urystan aman alyp qalǵanyn oılaǵanda, amalsyz ezý tartyp, sıpap qoıdy.

---