InfoHub Logo

Sálem, dostar! Bul men ǵoı, Qaltafon! Qalaısyńdar? Ómirde jaqsy adamdar kóp qoı, kezekti áńgime de sondaı bir izgi jan jaıynda.

Daryn bıyl mektepaldy daıyndyq synybyna barǵan. Kúnde ájesi ákelip, keshke ózi alyp ketip júr. Nege kerek bolǵanyn kim bilgen, bir kúni ákesi meni (Qaltafondy) alyp, ulynyń (Daryn) sómkesiniń kishkene qaltasyna salyp qoıdy. Sodan beri ekeýmiz kúnde birgemiz.

Mine, kesh batty. Daryn basqa balalarmen birge sómkesin arqalap syrtqa bettedi. Qappaǵa kelip, ájesiniń kelýin kútti. Ájesi birazǵa deıin kelmedi.

Ary-beri tosqan Darynnyń bir kezde óz betimen ketkisi keldi. Neden qorqady, úıleri jaqyn. Kúndegi joldarymen júrse boldy emes pe, bir demde jetip barady.

Ol qaqpadan shyǵyp, jaıaýlar jolymen aıańdap tartyp otyrdy. Asa asyqqan joq, jan-jaǵyna qarap, tóńerekti tamashalaı júrdi. Kúnde ájesi asyqtyryp, eshteńeni kórsetpeıdi eken ǵoı, jol boıy qandaı qyzyq! Rolık tepken balalar, ıt jetektegen áıelder aınalady órip júredi eken. Ájesi qasynda bolsa, osynyń bárin kórsetpes edi, endi qandaı raqat! Alańdamaı burylyp, armansyz qarady.

Mine, qyzyqtyń kókesi endi bastalǵandaı. Áldekimder dabyrlaǵan soń, eleń etip burylyp edi, qyzyldy-jasyldy shar kótergen bir kisi ózine qaraı taıap keledi eken. Túrli tústi sharlardyń bárin úrlep, býylǵan jerinen baılap, jińishke jippen kógendep alypty. Áýede jelmen ushyp, ıyqtasyp ketip barady. Syrtyna salynǵan súıkimdi bala beınesi kúlimdeı qarap, ózine shaqyratyndaı.

Daryn shydaı almady, eriksiz qozǵalyp, ere jóneldi. Artynan qalmaı ilesip otyrdy. Júre-júre bir qazandaı qaınaǵan shýly ortaǵa tap boldy. Sonda baryp basyn kóterip, jan-jaǵyna qarady. Buryn kórmegen jeri. Qaınaǵan qan bazarǵa  kirip ketkenin ol sálden keıin, qatar-qatar tizilgen áınek dúkenderge kózi túskende bildi.

Bul kezde kelgen dabyl boıynsha men de shyryldap qoıa bergen edim. Alǵashynda qalyń dýdyń ortasynda turǵan Daryn estimedi. Azdan soń bir shetke shyǵyp, tynystaǵanda ǵana qulaǵy shaldy.

Bilegin sozyp alaıyn dep edi, qoly arqasyna jetpedi. Amalsyz jotasyndaǵy sómkeni aldyna aldy. Sonan soń baryp men onyń alaqanyna tústim.

Qulaǵyna tosqanda arjaǵynan ájesiniń tanys daýsy estildi. Daryn abdyraǵan joq. «Áje» dedi qýanyp.

— Qaıdasyń, qulynym? Mekteptiń aldynda joqsyń ǵoı? — dedi ájesi daýysynan sál alańdaǵany bilinip.

— Áje, men mektepten ketip qaldym. Ózim úıge baraıyn desem... basqa jaqqa ketip qappyn.... — dedi Daryn kúmiljip.

— Qazir qaıda tursyń? — dedi ájesi sonda ǵana shyn sasqalaqtap. — Áteń, Qudaı-aı, qara basyp otyryp qalǵanymdy qarashy! Endi qaıttym... endi! Qaıda tursyń endi?..

— Bilmeıim. Bir adam kóp jerde turmyn... elder kóp júr...

— Onda alańdama, qulynym! Áýeli qasyńnan ótken kisini shaqyryp, telefonyńdy soǵan ber... qaıda turǵanyńdy ózim suraımyn.

Daryn jan-jaǵyna qarady. Taıaý jerden bir aǵa men ápke ketip barady eken, qarsy júrdi.

— Aǵa, meniń ájemmen sóılesińizshi! — dedi jaqyndaı bere qolyndaǵy telefondy, ıaǵnı, meni usynyp.

Beıtanys aǵa alǵashynda túsinbeı qalyp, eki oıly kúıde meni alyp qulaǵyna tosty. «Alo-o... » dedi artynsha tartyna til qatyp.

— Áı, balam, qasyń da turǵan meniń nemerem. Meni kútpeı, úıge ózim ketem dep adasyp ketipti. Qaıda turǵanyn aıtyp beresiń be...

Sonda baryp mán-jaıdy túsingen jigit:

— A, biz «Aral» bazarynda turmyz. Ózińiz qaıda tursyz... shyǵyp bara jatyr edik, jolaı nemereńizdi aparyp tastasam degenim ǵoı... — dedi jadyraı kúlip. — Jaqsy... jaqsy! Ázir jetemiz... — dedi artynan.

Darynǵa burylyp, meni qolyna ustatqan aǵa:

— Áı, tentek, ne búldirip júrsiń? — dedi jymıyp. — Júr, kettik! Ájeńe aparyp salamyn! — dedi artynan. Darynnyń qolynan ustap syrtqa qaraı bettedi.

Sodan az ótkende Daryn ájisiniń qasynda turdy jaırańdap.

Mine, balalar, maqtandy demeńder, keıde meniń adamdarǵa osyndaı da paıdam tıedi. Men balalardyń jaqsy dosymyn!

---