InfoHub Logo

Adam kúnine orta eseppen 16 myńǵa jýyq sóz aıtady. Alaıda ǵalymdar birneshe kún boıy ádeıi únsiz qalýdyń mıǵa áseri erekshe ekenin anyqtaǵan. Zertteýlerge sáıkes, tynyshtyq pen sóılemeý tek demalys emes, júıke júıesin «qaıta jandandyratyn» qural bolýy múmkin.

Bul týraly Infohub.kz aqparat agenttigi habarlaıdy.

Alǵashqy kúnderdegi ózgerister

Sóıleý toqtaǵan kezde mı ym-ıshara, mımıka, jazý sıaqty balama baılanys tásilderin izdeı bastaıdy. Bul kezeńde stress gormony kortızol deńgeıi joǵarylaıdy, oı aǵymy kúsheıip, ishki «dıalog» paıda bolady. Estý qabileti jaqsaryp, buryn baıqalmaǵan dybystar anyq estiledi.

Sonymen qatar, tynyshtyq mıdyń mańyzdy bóligi gıppokamp jumysyna oń áser etedi. Dál osy aımaqta jańa neırondar túzilýi múmkin, bul este saqtaý qabiletin jaqsartýǵa yqpal etedi.

Úshinshi-tórtinshi kúnnen keıin

Bul kezeńde kóp adam mazasyzdyqtyń azaıǵanyn jáne zeıinniń jaqsarǵanyn baıqaıdy. Bul mıdyń tynysh kúıde belsendi bolatyn júıesiniń qaıta rettelýine baılanysty. Stress deńgeıi tómendeıdi, bir nársege jaqsyraq den qoıa bastaımyz, emosıalardy túsiný qabileti artady.

Apta sońyndaǵy nátıjeler

Aptanyń aıaǵyna qaraı áser tereńdeı túsedi. Emosıalyq turaqtylyq qalyptasady, oılaý aıqyndalyp, kúrdeli máselelerdi sheshý jeńildeıdi. Sondaı-aq, uıqy men júrek yrǵaǵy jaqsarady.

Mamandar eskertedi

Mundaı nátıjeler tek erikti túrde jáne qaýipsiz ortada baıqalady. Eger adam májbúrli túrde oqshaýlansa nemese áleýmettik qoldaýdan aıyrylsa, kerisinshe kúızelis kúsheıýi múmkin.

Qorytyndy

Bir apta únsizdik mıstıkalyq tájirıbe emes, júıke júıesin qalpyna keltirýdiń bir tásili. Tynyshtyq mıdyń jumysyn jaqsartyp, stressti azaıtady. Eń bastysy – únsizdikti qalaı qoldanatynyńyzda. Sanaly túrde, ózińizdi túsinýge baǵyttalǵan tynyshtyq eń tıimdi nátıje beredi.