Birjan men Balýan Sholaqtyń kezdesýi
Ataqty Balýan Sholaqtyń balasy Qudaıbergen Sholaqov Birjan men óz ákesi týraly (1964 j.) mynadaı áńgime aıtty:
— Syrqattanyp jatyr dep estip ákem ádeıi barǵan soń, Birjan razy bolyp kóńildenip, masaıraı bastapty. Ákem sol elde qasyna Birjandy ertip qydyryp toǵyz kún júripti. Aýyrdy-shalyqty degen Birjan bir syr bildirmeı, kezegi kelgen jerde óleń aıtyp, án de salypty.
Ákeme qaıtarda:
— Áı, qaraǵym Sholaq-aı, kelgeniń óte jaqsy boldy-aý. Shirkin-aı, jurttyń bári sendeı bolmady-aý!— dep razy bolyp attandyryp qala beripti.
Bular attanyp ketip bir jerge qonyp otyrǵanda, artynan shapqyn kelipti «Birjan qaıta syrqattandy, sizdi shaqyra jiberdi»— dep.
Ákem: «Aldymda baraıyn degen jumysym bar edi, eki-úsh kúnnen keıin baram»,— dep qaıyrypty.
Birjannyń syrqaty sodan meńdeı aýyrlaı beripti, ony ákem syrttan esitip, meńdep ketken syrqat qoı, endi bolmas dep, qaıyra oralmapty.
-
Kókshetaýda «Qazaqstan» degen sovhozda turatyn Meıirbanuly İlıas aqsaqal Birjan týraly áńgimesin bylaısha bastaıdy:
-
Birjan sal alystan Saranyń aqyndyq-aıtqyrlyq dańqyn estip, qaıtkende izdep baryp onymen aıtysýdy arman etedi. Jol alys, el shalǵaı, oǵan myqty jolbasshy adam, alys jolǵa talmaıtyn kólik kerek bolady....
