InfoHub Logo

Qazaqstan Respýblıkasy Prezıdentiniń Jarlyǵymen Adam quqyqtary jónindegi komısıanyń jańa quramy bekitildi. Bul quramǵa Qýandyq Bıshimbaev isi boıynsha jábirlenýshi tarapty qorǵaǵan advokat Igor Vranchev te kirdi.

Bul týraly Infohub.kz aqparat agenttigi habarlaıdy.

Jarlyqqa sáıkes, komısıanyń tóraǵasy bolyp Senat tóraǵasynyń orynbasary Jaqyp Asanov taǵaıyndaldy. Al onyń orynbasarlary retinde Respýblıkalyq advokattar alqasynyń múshesi, advokat Aıdyn Bıkebaev pen Abaı atyndaǵy QazUPÝ-dyń Sorbonna-Qazaqstan ınstıtýtynyń dırektory Aıgúl Sabıtova bekitildi.

Komısıanyń jańa quramyna memlekettik organdardyń ókilderi de endi. Olardyń qatarynda Bas prokýror, Premer-mınıstrdiń orynbasary – mádenıet jáne aqparat mınıstri, Joǵarǵy sot keńesiniń tóraǵasy, ishki ister, syrtqy ister, ádilet, densaýlyq saqtaý, eńbek jáne halyqty áleýmettik qorǵaý, ǵylym jáne joǵary bilim mınıstrleri bar.

Sonymen qatar, komısıada adam quqyqtary jónindegi ýákilder, bala quqyqtary jónindegi ýákil, áleýmettik osal toptardy qorǵaý jónindegi ýákil, kásipkerlik quqyqtaryn qorǵaý jónindegi ýákil, otbasy máseleleri jónindegi ýákil, sondaı-aq Ulttyq qaýipsizdik komıteti tóraǵasynyń orynbasary da óz oryndaryn aldy.

Jańa quramǵa depýtattar, advokattar, qoǵamdyq uıymdardyń, akademıalyq ortanyń, kásipodaqtardyń, dinı birlestikter men quqyq qorǵaýshylardyń ókilderi de kirdi. Olardyń arasynda Senat depýtaty Janna Asanova, Sottar keńesiniń tóraǵasy Dosjan Ámir, Daǵdarys ortalyqtary odaǵynyń basshysy Zúlfıa Baısaqova, Májilis depýtaty Nursultan Baıtılesov, Halyqaralyq kóshi-qon uıymynyń ókili Svetlana Bekmambetova, «MEDIALIFE» qorynyń prezıdenti Olga Volkova, advokattar Vıtalıı Voronov, Igor Vranchev, Danıar Kanafın jáne Irına Osokına bar.

Komısıaǵa sondaı-aq E.A. Bóketov atyndaǵy Qaraǵandy ýnıversıtetiniń rektory Nurlan Dýlatbekov, Májilis depýtattary Danıa Espaeva men Únzıla Shapaq, L.N. Gýmılev atyndaǵy EUÝ profesory Svetlana Jarkenova, jýrnalıs Erqanat Kópjasaruly, «Civic peace» QB tóraǵasy Rýslan Qaskenov, Astana jáne Qazaqstan mıtropolıti Aleksandr Mogılev, Konstıtýsıalyq sot sýdıasy Qanat Mýsın, «Qazaqstannyń azamattyq alánsy» prezıdenti Baný Nurǵazıeva, Kásipodaqtar federasıasy tóraǵasynyń orynbasary Birjan Nurymbetov, bas múftı Naýryzbaı Ótpirov, Q.S. Narıkbaev atyndaǵy QazGZÝ ókili Sergeı Pen, adam quqyqtary jónindegi sarapshy Aısana Sman, Qazaqstan ekologıalyq uıymdary qaýymdastyǵynyń basshysy Aıgúl Soloveva, «Adam quqyqtary úshin Hartıa» qorynyń dırektory Jeńis Turmaǵambetova jáne «Sana Sezim» áıelder bastamalary quqyqtyq ortalyǵynyń dırektory Shahnoza Hasanova kirdi.

Prezıdent janyndaǵy Adam quqyqtary jónindegi komısıa — bul adam men azamattyń quqyqtary men bostandyqtaryn qorǵaý máselelerimen aınalysatyn konsýltatıvtik-keńesshi organ bolyp tabylady.