InfoHub Logo

Áleýmettik jelide buǵan deıin de óziniń ótkir pikirlerimen kózge túsken Tanagóz Tolqynqyzy taǵy da qoǵamdaǵy ózekti máselelerge qatysty salmaqty oıyn jarıalady. Bul joly ol eldegi moraldyq daǵdarys, satylǵyshtyq pen ádiletsizdikke basa nazar aýdaryp, ulttyq sananyń tómendeýine alańdaýshylyq bildirdi.

Bul týraly Infohub.kz aqparat agenttigi habarlaıdy.

«Báriniń moınynda baǵasy bar»

Avtor jazbasyn «Biz nege baqytsyz ultpyz?» degen ózekti saýalmen bastap, qoǵamdaǵy jaǵdaıdy syn kózben baǵalaıdy. Onyń aıtýynsha, búgingi tańda satylmaıtyn adam qalmaǵan.

«Ókinishke qaraı, bizde satylmaıtyn adam joq. Báriniń moınynda baǵasy jazylǵan bırka tur. Bireýiniń quny – alyp júrgen jalaqysy, bireýiniń quny – bes kúndik kreslosy, bireýiniń quny – kásibi, bireýiniń quny – tender», - dep jazdy ol.

Tanagóz Tolqynqyzynyń pikirinshe, qoǵamda ar-uıat pen ózin-ózi qurmetteý sezimi álsiregen. Al ózgeris jasaýǵa degen umtylys pen daıyndyq múldem joq.

Ózgeris úshin kúresý qajet

Avtor ózgeristiń tek adam ólýge daıyn bolǵanda ǵana keletinin, al eshkimniń mundaı qadamǵa barýǵa nıetti emestigin aıtady. Bul jaǵdaı ózgeristiń eshqashan kelmeıtinin meńzeıdi.

Ol sondaı-aq, Álıhan Bókeıhan, Ahmet Baıtursynuly syndy tarıhı tulǵalardyń eren eńbegi men qurbandyǵyn eske alyp, olardyń kúresi men qazirgi qoǵamnyń belsendiligin salystyrady. Mahatma Gandıdiń «Satágraha» – aqıqat pen ádilet úshin beıbit kúres fılosofıasyn mysalǵa keltirip, onyń «álemdi kúshpen emes, ar-ojdan arqyly jeńgenin» atap ótedi.

Tanagóz Tolqynqyzy qazirgi qoǵamda osyndaı tabandylyq pen prınsıptiliktiń jetispeıtinin, ásirese, qazaq tiliniń máselesine erekshe toqtaldy.

«Al seniń uly joryǵyń – qazaq tilinde sóıleý. Mahabbatpen sóıleý. Tabandy túrde sóıleý. Prınsıpti túrde sóıleý. Sol tilde sóıleýge ımenbeı, namystanbaı sóıleý», - dep jazdy ol.

Avtordyń oıynsha, qoǵamdaǵy jaǵdaıdy jaqsartý úshin ár adam ózgeristi ózinen bastaýy tıis.

Jeli qoldanýshylary bul jazbaǵa ártúrli pikir bildirip, keıbiri avtordy qoldasa, endi biri onyń oıymen kelispeıtinin jetkizgen. Atalǵan jazba qoǵamdaǵy ózekti máselelerdi taǵy bir márte kún tártibine shyǵardy.