Bizdiń úıge kóktem keldi, qyz keldi,
Qyzyǵyń da, tamashań da bizde endi.
Neǵyp jatyr, Ánýar shujyq, balqaımaq,
Nókerimen shaýyp ketpeı bizderdi...
Bizdiń úıge Sholpan keldi, Sholpanym!
Sholpym meniń...
Qyzyqqa endi sholpamyn.
Minezińnen...
Minezińnen qorqamyn,
Lashynǵa tartqan-aý dep jortamyn.
Qyzym meniń, kúlkim meniń, saýyǵym,
Bazarym da, baýyrym da, aýylym.
Qandaı ǵajap, qaraqattaı kózińde.
Qarap turǵan men ózimdi tanımyn.
Sen gúlimsiń
Qaraǵym, seni kim ekken?
Sezimbisiń?
Shyqqansyń qandaı júrekten!
Janarda turǵan jalǵyz tal álde tamshy ma eń?
Jalt etip birde kirpikten yrǵyp dir etken?!
Ánbisiń álde?
Netken ún seni shyrqady?
Álde sen, qalqam,
Bozaryp atqan qyr tańy.
Sezip tur sanam,
Sen óziń, sirá, bolǵaısyń
Jalǵandaǵy osy jaqsynyń ǵana urpaǵy.
Qınama meni.
Aıtsaıshy maǵan, súıiktim?
Adamba júrgen laǵymysyń kıiktiń?
Aıtsaıshy, qalqam, bulaǵymysyń álde sen
Burqanyp jatqan mendegi teńiz-kúıiktiń?

---