Bozqaraǵan...
Kórdiń be bozqaraǵan?
Sıren ıisi ańqıdy boz daladan.
Bozqaraǵan - tikenek, tikenge ósken
Sıren gúlin eshkim de qozǵamaǵan.
(Sonyń aty, bizdińshe - Bozqaraǵan.)
Qara sýdyń jaǵasy bozqaraǵan,
Bozqaraǵan butaǵyn qozǵama adam.
Bozqaraǵan ishinde boıjetkenge,
Bozbalalar bozaryp kóz qadaǵan.
Boıjetkender toılaryn jasarynda,
Bozqaraǵan janatyn oshaǵynda.
Átir ıisin ákelip ash aýylǵa,
Jelik berip turatyn jeńgeılerge,
Jer túbine bireýmen qasharynda!
Qarasazdyń toǵaıy - saıran baǵy,
Saıran baǵyn nelikten oırandady!?
...Bozqaraǵan gúlin ap, hatqa salyp,
Jiberýshi ek týysqa maıdandaǵy.
Bozqaraǵan!
Armysyń, qasıettim, bózge oraǵan!
Qaıda álgi boıjetkeniń kóz qadaǵan?
Qaıda jeńgem?
Sońynan sóz boraǵan...

---