«Qıyn jol qıamettiń - tar-dy» - deıdi,
«Bir jaǵy- sý, bir jaǵy ot, jar-dy» - deıdi.
«Haziret Ǵaly paıǵambar zamanynda
Mańaıynda bir músápir bar-dy!» - deıdi.
Kóńilinde ol músápir alasy joq,
Erli-baıly eki bas , balasy joq.
Jarlyǵy Jaratqannyń sondaı qatty:
Bir jalǵyz tym bolmasa qarasy joq.
Qudaıy beredi eken esine alyp,
Asy joq isherine baıǵus kárip.
Kúninde amaly joq ol beıshara,
Sýlarǵa júredi eken qarmaq salyp.
Ushqan kus, júgirgen ań, - bári tamaq,
Shákirtter ustazynan alar sabaq.
Uzyn kún qarmaq salyp júrse-daǵy,
Tiliner qarmaǵyna jalǵyz shabaq.
Ol jarly qarmaq salyp, qaıtady eken,
Kedeılik músápirge batady eken.
Ekeýi bir shabaqty qorek qylyp,
Sonymenen aýqaty ótip jatady eken.
Ol jarly burynǵydaı bola almady,
Kóńili kúndegideı tola almady.
Bir kúni kúni boıy qarmaq salyp,
Esh nárse qarmaǵymen ala almady.
«Qıyn jol qıamettiń - tar-dy» - deıdi,
«Bir jaǵy - órt, bir jaǵy ot, jar-dy» - deıdi.
«Ol kúni ash bolǵan soń jazǵan kárip,
Kápirge tamaq suraı bardy», - deıdi.
Joqtyqta qınar nápsi kárip jandy.
Kóredi ol músápir atpas tańdy.
Ne bersin tegin tamaq ol kápir de
Bir teńgeniń tamaǵyn qaryzǵa aldy.
Gİaıǵambar bizden buryn ótti deıdi,
Kemelge tileýli qul jetpeıdi.
«Pálen kúni kegil taýyp beremin!»-dep,
Bir kúndi boljal qylyp , ketti deıdi.
Ol jarly burynǵydaı bola almady,
Kóńili kúndegideı tola almady.
Boljal kúni bolǵanda, baryp edi,
Bererge jalǵyz tıyn taba almady.
Joqtyqta qınar nápsi kárip jandy,
Kóredi ol músápir atpas tańdy.
Kúninde ol teńgesin óteı almaı,
Endi jarly moınyna ósim saldy.
Joqtyqta qınar nápsi kárip jandy,
Kóredi bu músápir atpas tańdy.
Kúninde ol teńgesin óteı almaı,
Myń qylyp, bir teńgesin hatqa saldy.
Jarlyǵa myń teńge aqsha tústi deıdi,
Kedeılik bárinen de kúshti deıdi.
Aqshasy myńǵa jetip ketkennen soń,
Jarlyny: «Aqsham ber!» - dep, qysty deıdi.
- Qaıdan taýyp beremin saǵan? - deıdi,
- Az ǵana aıan bershi maǵan! - deıdi.
- Saǵan berer bir tıyn esh nársem joq,
Baraıyn Muhammedke taman! - deıdi.
Jaman joq burys basqan asqanynan ,
Bir teńge myńǵa qadam basqanynan.
Mysyrdy bul músápir qyryq aınaldy,
Bararyn bilmeı qaıda sasqanynan.
Shaharda bul barmaǵan esik qalmaı,
Bas salyp eshbirine kirip barmaı.
Syltaý ǵyp áne-mine degenmenen,
Teńgesin qoıar emes kápir almaı.
Ol jarly bir Allaǵa nalyp keldi,
Qoımasyn ol kápirdiń tanyp keldi.
Ózinen berer nárse joq bolǵan soń,
Sasqannan Muhammedke alyp keldi.
Qudaıdyń salǵanyna kónip keldi,
Engende Muhammedke kúlip keldi.
Muhammed, saqabalar - bári otyrǵan
Jerinde sálem berip kirip keldi.
- Ýaǵaleıkým ássalam, aı, músápir,
Bul qalaı qasyńdaǵy júrgen kápir?
Eki kóziń jylaýda, a, músápir,
Qaı jaqqa alyp seni bara jatyr?
- Syıynsań bir Allaǵa, buryn syıyn,
İs ótken soń syıynsań, bolar qıyn.
Bar edi bu kópirdiń mende aqshasy,
Bererge taba almadym jalǵyz tıyn.
- Jaratqan bárimizdi bir Qudaı-dy,
Jaratty jaryq qylyp Kún men Aıdy.
Ózińnen berer nárseń joq bolsa eger,
Barasyń muny ertip endi qaıda?
- Jaratqan jabdyǵymyz bir Qudaı-dy,
Jatqanǵa shalqasynan dúnıe qaıda ?
On segiz myń ǵalamnyń patshasy - siz,
Bir paıdańyz tıer me eken osyndaıda?
Ózine mal jımady ol paıǵambar,
Maly kóp saqabalar peıili tar.
Jan-jaǵynda otyrǵan saqabalar
Qarasa, Muhammedim jerge qarar.
Ashýy er Ǵalynyń endi keldi-eı,
Kóńilin keń jaratqan haq shalqar kóldeı.
- Babam jerge qarady - dep, haziret Ǵaly, -
- Bata ber, men územ! - dep, tura keldi-eı!
- Bata ber, men územ! - dep, tura keldi-eı
Ashýy er Ǵalynyń qatty keldi.
Adamnyń ón boıyna bitken túgi
Kıimnen naızadaı bop, shyǵa keldi.
Ol Muhammed paıǵambar bata berdi,
Ǵalynyń aıtqan sózin qabyl kórdi.
Babasynan bata alyp haziret Ǵaly
Eritip ol músápirdi úıge keldi.
Shúkir qyldym Qudaıdyń bul isine,
Taǵy táýbe qylamyn ár isine.
- Aqsha bar ma kápirge beretin? - dep,
Úıdiń ishin tinttirdi Bıbisine.
«Joq edi!» - dep, aýzyna ala almady,
Kóńili kúndegideı bola almady.
Úıdiń ishin aqtaryp qarasa da,
Bererge jalǵyz tıyn taba almady.
Qaıǵysyz haziret Ǵaly er-di deıdi,
Berer nárse tappady endi deıdi.
«Bul aqshańdy taýyp úzermin!» - dep,
Eki uǵylyn (ulyn) kápirge berdi deıdi.
Hasen men Husaıyndy aldy deıdi,
Qýanyp kápir úıge bardy deıdi.
Eki etegin beline túrip alyp,
Bir jaqqa betin túzep saldy deıdi.
Jolynda haziret Ǵaly jalǵyz júrdi,
Jalǵyz júrip, kóp ult mola kórdi.
Ol molanyń basyna keldi-daǵy,
Otyryp haziret Ǵaly duǵa (dýa) qyldy.
Molada bir torǵaı otyr, kezip saldy,
Torǵaıdy kóremin dep kóńiline aldy.
Er Ǵaly aınaldyryp kórip edi,
Sol jerde kórgennen soń, qaıran qaldy.
«Ustap alyp torǵaıdy kórsem!» - deıdi,
«Hasen men Husaıynǵa bersem!» - deıdi.
«Erikkende ermek qylyp, oınar edi,
Alyp baryp olarǵa bersem!»-deıdi.
Ne kúshti, oılap tursam, Qudaı kúshti,
Aýzyma aıtyp edim, Qudaı tústi.
Shap etip aıaǵynan ustap edi,
Torǵaı qus judyryqtaı aldy da, ushty.
Er Ǵaly bir Allaǵa nanyp ketti,
Bolaryn bir tamasha tanyp ketti.
«Maǵan endi ne par?» - dep, júrgen Ǵaly -
Judyryqtaı bir torǵaı alyp ketti.
Jaratqan jer dúnıeni jeksenbi kún,
Qarańǵy ólgenderge bolady tún.
«Haziret Ǵaly, torǵaıdan aırylma!» - dep,
Artynan ashshy daýys shyǵady ún.
Ol torǵaı aspanǵa shyrqap shyqty, qaırylmady,
Sóıtse de haziret Ǵaly qaıǵyrmady.
Erlikpenen torǵaıdy tutyp edi ,
Aqyrynda erlikpen aırylmady.
Qaıǵyryp haziret Ǵaly saspady endi,
Bir jolǵa Qudaı taǵala bastady endi.
Ol torǵaı aspanmenen alyp kelip,
Ǵalyny japan túzge tastady endi .
Er Ǵaly burynǵydaı kúle almady,
Qaldy jaıaý astyna at mine almady.
Ǵalyǵa bir zor ýaıym endi tústi,
Ózi qaıdan kelgenin bile almady.
Er Ǵaly táýbe qylyp, kúldi deıdi,
Bolǵanyn bir ǵajap is bildi deıdi.
- Ia, Qudaı, óziń ońǵa basta! - deýmen
Aıańdap bet aldyna júrdi deıdi.
Júre - júre bir asqar belge keldi,
Ózi týyp kórmegen jerge keldi.
Ár jolǵa Qudaıymnyń ózi bastar.
Bir kóp joıqyn en jatqan elge keldi.
Er Ǵaly elge qaraı júrdi deıdi,
Bir shalqardyń ilgine kirdi deıdi.
Bir erkek joq kóringen, bári urǵashy,
Bir qarasha úı kórip, keldi deıdi.
Keldi de qarasha úıge soıles kyldg,
Sóıles qylsa, bir jaman kempir keldi.
- Kempir-aý, tiri erkegiń elińde joq,
Suraımyn, jónińdi aıtshy, ne elsiń? - deıdi.
- Aıtaıyn jónimizdi sizge batyr,
Surasań, jónimizdiń ózi kápir.
Bar erkegi elimniń toıǵa ketti,
Patshamyz osy ýaqta toı qysh jatyr.
Ǵalynyń aýady endi tentek oıy,
Kempirdiń qozǵalady tula boıy.
- Qımyldaǵan erkegiń bári ketip,
Ol qylǵan patshańyzdyń neniń toıy?
- Bir jerge tamam kisi ornaıtuǵyn,
Moıynyn bóten jaqqa burmaıtuǵyn.
Patshanyń májilisi bar juma saıyn,
Saýyq qyp, keńes qylyp jyrlaıtuǵyn.
- Ketipti tiri erkegiń tamam! - deıdi,
- Ne boldy onda barmaı saǵan? - deıdi.
- Musylmannyń dinine kirgizeıin,
Ol toıyń týra silte maǵan! - deıdi.
- Barar bolsań, kóp turma munda - deıdi.
-Meniń aıtqan sózimdi tyńda! - deıdi.
-Sonaý jerge barǵanda, daýys shyǵar,
Toı qylyp, shýlap jatqan sonda! - deıdi.
- Bir jaqsylyq qylaıyn, kempir! - deıdi,
- Tilińdi kalımaǵa keltir! -deıdi.
- Musylmannyń dinine kirgizeıin,
- «Lá-ıla-ıla-Alla!» - keltir! - deıdi.
- Dinimdi bermen, tilimdi bersem-daǵy,
Kóńilim bermen, sózińe ersem-daǵy.
Tilimdi kalımaǵa keltirmeımin,
Óz kumymnan shyqpaımyn ólsem-daǵy!
Sonan soń haziret Ǵaly tasty deıdi,
Kempir jaman ol qorqyp sasty deıdi.
- Óz kumyńnan shyqpaıtyn neme ekensiń,
- Dep kempirdi darǵa (daraǵa) asty deıdi.
Kempirden bir ashýyn aldy deıdi,
Kempir baıǵus tyraıyp qaldy deıdi.
Eki etegin beline túrip alyp,
Er Ǵaly toıhanaǵa bardy deıdi.
Sol toıǵa keldi jaıaý batyr,
Kápirge-júrgen jeri - zaman aqyr.
Samsaǵan sary qolǵa keldi jetip,
Toı qylyp, shýyldap jatyr tamam kápir.
Haziret Ǵaly sol toıǵa keldi jaınap,
Kápirler shýlap jatyr kúlip-oınap.
Kirip baryp otyrdy ortasyna
Sansyz quldyń báriniń kózin baılap.
Syıyńdy haziret Ǵaly Allasyna,
Kirip baryp otyrdy ortasyna.
Mas bolǵan araq iship, saýyq qylyp,
Endi keńes aıttyrmaq moldasyna.
Kápirler óz esinen shyqty deıdi,
Bir-birin araq berip jyqty deıdi.
Sol azan saldyrtqaly moldasyna,
Basyna muńtarapyń shyqty deıdi.
- Jigitter, al tyńdaıyq, kidirińizshi,
Tyńdasańyz qulaq salyp: «E!» - deńizshi!
«Munaranyń basyna shyqqannan soń,
Azanda aıtatuǵyn ne?» - deńizshi!
Boqtaıdy: oraza, namaz áýel ıman,
Boqtaıdy taǵy onan soń kitap «Quran».
Júz jıyrma tórt myń paıǵambar boqtap berip,
Túk qaldyrmaı tórt jardan, saqabadan.
Ol molda burynǵydaı bola almady,
Kóńiline kúndegi sóz qona almady.
Aıtaıyn dep entelep kelse-daǵy,
Aıtýǵa bir aýyz sóz taba almady.
Arýaǵy er Ǵalynyń kúshti deıdi,
Molda baqyr kótinen pisti deıdi.
Sóziniń kúnde aıtatyn bireýi joq,
Moldany tamam kápir qysty deıdi.
Qıyn jol qıamettiń tar, bilemin,
Tórt shadıar paıǵambarǵa jar bilemin.
Sózimniń kúnde aıtqan bireýi joq,
Bir adam paıǵambardan bar bilemin.
Moldanyń kóńili boldy kúpti deıdi,
Bir aýyz sóz taba almas tipti deıdi.
- Paıǵambardan kim bar, qane, osynda?! - dep,
Kápirler tús-tús jaqtan tipti deıdi.
Ol molda burynǵydaı kúle almady,
Kóńiline kúndegi sóz qona almady .
Kápirler tús-tús jaqtan tintse-daǵy,
Ǵalyny ishindegi kóre almady.
Er Ǵaly ortasynda otyr jaınap,
Kápirler dýlap jatyr kúlip-oınap.
Ǵalyny ishindegi qaıdan tapsyn,
Báriniń qoıǵannan soń kózin baılap.
Arýaǵy er Ǵalynyń kúshti deıdi,
Molda batyr kótinen pisti deıdi.
- Sen ótirik aıtasyń, adam joq! - dep, Moldany:
- Óltirem! - dep, qysty deıdi.
Oılasam, Bısmıllanyń piri otyr-dy,
Kóńilge bısmılladan sebep kirdi.
- Paıǵambardan keıingi men barmyn! - dep,
Er Ǵaly erligimen túregeldi.
Dámetpegen tamaqtan ash qalady,
Qıamet qaıym bolǵanda, tas janady.
- Minekı, men barmyn! - dep, túregeldi,
Jıylǵan tamam kápir bas salady.
Er Ǵaly bir Allaǵa nanyp keldi,
Bolǵanyn bir ǵajap is tanyp bildi .
- Ózi jaıaý, bir adam júr eken! - dep,
Ǵalyny patshasyna alyp keldi.
Qylyshyn jasaýyldar qaıraıdy-mys,
Myltyǵyn jasaýyldar saılaıdy-mys.
«Bul kisini qalaı qylyp óltirem?!» - dep,
Patshasy moldasy men oılaıdy-mys.
Molda aıtty:
- Júr eken bul munda kelip,
Tálkektep, óltireıik mazaq qylyp.
Bul kisini: «Allalap» óltireıik,
Moınyna bir nárseni kiná qylyp.
- Ia, molda, siz aıtsańyz olaı qylyp,
Qudaıym berdi bizge ońaı qylyp.
Bul kisiniń mindetin sizge berdim,
Siz muny óltirseń de, qalaı qylyp.
- Bir adam áldeqalaı kelipti kez,
Jigitter, shamań kelse, qımylda tez!
Tapsań sen, taba almasań, óltireıik,
Jumbaq qylyp aıtaıyq eki aýyz sóz.
Molda ashpady Ǵalyǵa:
- Nanarmysyń?
Meniń aıtqam tilimdi alarmysyń?
Jumbaq qylyp aıtamyn on aýyz sóz,
Bir aýyzyn qaldyrmaı, tabarmysyń?
Ǵaly aıtady moldaǵa:
- Nanarmysyń?
Meniń aıtqam sózimdi alarmysyń?
Tapsam, taptym, tappasam, ólemin ǵoı,
Tapsam, úsh aýyz sóz aıtaıyn, tabarmysyń?!
Molda aıtady:
- Sóılesip, tanysalyq!
Tappaǵandy qylyshpen shabysalyq.
Áýeli men suraıyn, jaýap bershi.
Kezektesip jumbaqty, tabysalyq!
- Sóıleıin, sóıle deseń, Jabbar Qudaı,
Sharapaty Mádıneniń tursyn bylaı.
- Óltirermin, oılamaı, tapshy jyldam:
«Bir-ekeý bolmaq joq, munym qalaı?
- Sóıleıin, sóıle deseń, Jabbar Qudaı,
Sharapaty Mádıneniń turar bylaı.
Ol nege ekeý bolsyn, shupamyr qul,
Jaratqan bárimizdi jalǵyz Qudaı.
- Sóıleıin, sóıle deseń, Jabbar Qudaı,
Sharapaty Mádıneniń tursyn bylaı.
Dereý basyń kesermin, tapshy jyldam,
Ekeý úsheý bolmaq joq, onym qalaı?
- Únderde ne jaqsy, Quran úıi,
Túnderde ne tún jaqsy, Qadir túni.
Ol nege úsheý bolsyn, kápir dushpan,
Jaratqan bir Qudaıdyń Aı men Kúni!
- Sóıleıin, sóıle deseń, Jabbar Qudaı,
Sharapaty Mádıneniń turar bylaı.
Óltirtemin, oılamaı, tapshy jyldam,
Úsheý tórteý bolmaq joq, onym qalaı?
Aıtaıyn, bilgenimdi, jıylǵan kóp,
Men aıtsam osylaı qyp, bolar ma edi?
Ol nege tórteý bolsyn, kápir dushpan,
Huptannyń aıaǵynda otyr Ýájip.
- Sóıleıin, sóıle deseń, Jabbar Qudaı,
Sharapaty Mádıneniń turar bylaı.
Óltiremin, oılamaı, tapshy jyldam,
Tórteý beseý bolmaq joq, onym qalaı?
- Tórt shadıar: ekeýi: Omar, Ospan,
Bireýi - haziret Ǵaly - elden basqan,
Bireýi - Ábýbákir sydyq bolar,
Ol nege beseý bolsyn, kápir dushpan?!
- Sóıleıin, sóıle deseń, Jabbar Qudaı,
Sharapaty Mádıneniń turar bylaı.
Óltiremin, oılamaı, tapshy jyldam,
Beseý altaý bolmaq joq, onym qalaı?
- Shyraqtyń aldy menen arty bolmas,
Kitaptan shyqqan sózdiń qalty bolmas.
Dáret penen bes ýaqyt namaz bolar,
Shunamyr qul, ol - beseý, alty bolmas!
- Sóıleıin, sóıle deseń, Jabbar Qudaı,
Sharapaty Mádıneniń turar bylaı.
Óltiremin, oılamaı, tapshy jyldam,
Altaý jeteý bolmaq joq, onym qalaı?
- Qıamettiń qyl kópiri qıyn jer me,
«Israfıl sory» - degen qyzyl jel me?
Ol nege jeteý bolsyn, kápir dushpan,
Jaratqan ımandyǵa alty kálıma.
- Sóıleıin, sóıle deseń, Jabbar Qudaı,
Sharapaty Mádıneniń turar bylaı.
Óltiremin, oılamaı, tapshy jyldam,
Jeteý segiz bolmaq joq, onym kalaı?
- Seniń aıtqan sózińniń bári anyq,
Meniń aıtqan sózimdi qylma tanyq.
Ol nege segiz bolsyn, kápir dushpan,
Qylmysty qul orny tur - jeti tamuq.
- Sóıleıin, sóıle deseń, Jabbar Qudaı,
Sharapaty Mádıneniń turar bylaı.
Dereý basyń alarmyn, tapshy jyldam,
Segiz toǵyz bolmaq joq, munym qalaı?
- Qylmyssyz kulǵa oryn - jumaqtan taq,
On eki ıman kóńilimde bolady naq.
Ol nege toǵyz bolsyn, shunamyr qul,
Qylmyssyz kuldyń orny - segiz jumaq (ujmaq).
- Sóıleıin, sóıle deseń, Jabbar Qudaı,
Sharapaty Mádıneniń turar bylaı.
Óltiremin, oılamaı, tapshy jyldam,
Toǵyz oı bolmaq joq-ty, onym qalaı?
- Aı, kápirler, men aıtaıyn sózdiń jaıyn,
Gİaıdasy joq sózińdi ne qylaıyn?!
Ol nege oń bolsyn, shunamyr qul,
Toǵyz uldy paıǵambar Ibragım (Ibraıym)!
- Sóıleıin, sóıle deseń, Jabbar Qudaı,
Sharapaty Mádıneniń turar bylaı.
Óltiremin, oılamaı, tapshy jyldam,
On on bir bolmaq joq, munym qalaı?
- Jeti qabat jer men kók - bári ǵalam,
Beıish betin kóre almas qylǵysty adam .
Ol nege on bir bolsyn, shunamyr qul,
On aı kursaq kótergen urǵashy adam.
Ol dúnıe bul dúnıeden qatty deıdi,
Qyzyǵy bu dúnıeniń tátti deıdi.
Ol molda on aýyz sóz aıtyp edi,
Bir aýyzyn qaldyrmaı tapty deıdi.
Ǵaly aıtty:
- Tilime nanarmysyń,
Meniń aıtqan tilimdi alarmysyń?
On sózdi aıtyp ediń, bárin taptym,
Men úsh aýyz sóz aıtaıyn, tabarmysyń?
-Kóp sóziń bar ishińde seniń- deıdi,
- Ashýyma kóp tıme meniń! - deıdi.
- Álde ne dep aıtasyń maǵan? - deıdi,
- Ol sózińdi aıtpaımyn seniń ! - deıdi.
Arýaǵy er Ǵalynyń kúshti deıdi,
Kótinen molda baqyr pisti deıdi.
- Bu aıtqan soń, sen nege aıtpaısyń? - dep,
Moldany tamam kápir qysty deıdi.
- Qoımadyń, aı, patsham, halimizge,
Keldi bir zor qaıǵy shárimizge (shaǵarymyzǵa).
Munyń aıtqan úsh sózin aıtar em men,
Men aıtqanda, aıtar bolsań bárińiz de.
- Ótersiń bir nárseni kóńilińe alyp,
Tappasań, baıǵus moldam, boldyń kárip.
Seniń aıtqan sózińdi biz de aıtarmyz,
Bu jerde ne bolarmyz senen qalyp?!
- Aıtaıyn, solaı bolsa, men! -deıdi-mis,
- Meniń aıtqan sózime kón! - deıdi-mis.
- Aıtatuǵyn sózińdi sura menen,
Sózińdi aıtshy, bilelik, sen! - deıdi - mis.
- Oılasam, bısmıllanyń biri zat-ty,
Bolǵanda tilim - shejire, kóńilim - hat-ty.
Bul sózimdi oılamaı, jyldam tapshy,
Jumaqtyń esiginde ne jaratty?
- Qıamettiń qyl kópir jol bar deıdi,
Uzyndyǵy myń jyldyq mol bar deıdi.
Jumaqtyń esiginde esitkenim:
«Bısmılla al-rahman rahım!» - sol bar deıdi.
- Oılasam, bısmıllanyń biri zat-ty,
Bolǵanda tilim-shejire. kóńilim - hat-ty.
Bu sózimdi oılamaı, tapshy jyldam,
Jumaqtyń tap tórinde ne jaratty?
- Qıamettiń qyl kópir jol bar deıdi,
Uzyndyǵy myń jyldyq mol bar deıdi.
Jumaqtyń tap tórinde esitkenim:
«Lá-ıla-Alla-ıla-Alla!» - sol bar deıdi.
- Oılasam, bısmıllanyń biri zat-ty,
Bolǵanda tilim-shejire, kóńilim - hat-ty.
Bu sózimdi oılamaı, tapshy jyldam,
Jumaqtyń máýesinde ne jaratty?
- Qıamettiń qyl kópir jol bar deıdi,
Uzyndyǵy myń jyldyq mol bar deıdi.
Jumaqtyń máýesinde esitkenim:
«Lá-ıla-Alla-ıla-Alla» - sol bar deıdi.
Ol molda úsheýin de bildi deıdi,
Tilderi kalımaǵa keldi deıdi.
- Bárimizge ustat bolyp, ımam boldyń,
Ne alasyz bizderden endi?! - deıdi.
- Jetkizgen munda meni bir torǵaı qus,
Úıden meni shyǵarǵan jarly baıǵus.
Ne berersiz bizderge, ne bermessiz,
Kerek edi bizderge altyn, kúmis.
Tamam kápir musylman boldy deıdi,
Shaıtan qashty, perishte toldy deıdi.
Altyn menen kúmisti jınap edi,
Úlkendigi bir taýdaı boldy deıdi.
Er Ǵaly endi oılaıdy oıdy deıdi,
Altyn menen kúmiske toıdy deıdi.
Arqasynda kóterip salyp edi,
Er Ǵaly kótere almaı, qoıdy deıdi.
Er Ǵaly bir Allaǵa nanyp ketti,
Qudaıdyń sheberligin tanyp ketti.
Ekinshileı arqalap kótergende,
Torǵaı qus keldi de alyp, alys ketti.
Er Ǵaly sabyr qylyp, saspaıdy endi,
Alla taǵala bir jolǵa bastaıdy endi.
Ol torǵaı aspanmenen alyp ketip,
Ǵalyny óz úıine tastaıdy endi.
Alyp kelip kedeıge berdi deıdi,
Kedeı baıǵus qýaty kúldi deıdi.
Kedeı baryp kápirdiń boryshyn tólep,
Din musylman muny estip bildi deıdi.

---