InfoHub Logo

Batys Qazaqstan oblysy, Terekti aýdany – Alaıaqtar bir otbasynyń senimine kirip, olardy bir aı boıy aldap, nátıjesinde 20 mıllıon teńge kólemindegi qarajatynan aıyrǵan. Bul jaıly Qazaqstan telearnasy habarlady.

Oqıǵa Terekti aýdanynyń turǵynyn belgisiz bireýlerdiń «Qazposhta» qyzmetkerimiz dep habarlasýynan bastalǵan. Olar "sizge sálem-saýqat keldi" dep sendirgenimen, azamat eshqandaı sálemdeme kútpegenin túsinip, polısıa bólimshesine barmaq bolady.

Alaıda dál sol sátte taǵy bir qońyraý kelip, ózin İshki ister mınıstrliginiń qyzmetkeri retinde tanystyrǵan adam “sizdiń atyńyzǵa onlaın nesıe rásimdelip jatyr” degen jeleýmen azamatty qorqytady. Budan bólek, jalǵan Ulttyq bank ókili de baılanysqa shyǵyp, “qupıa tergeý amaldary júrip jatyr, eshkimge tis jarmańyz” dep eskertedi.

Osylaısha, alaıaqtar bir aı boıy túrli senarımen bir otbasy múshelerin aldap, kóptegen qarjylyq operasıalardy oryndata alǵan. Sońynda otbasy músheleri jalpy somasy 20 mıllıon teńgege jýyq qarajatty alaıaqtardyń shotyna óz qoldarymen aýdarǵan.

Resmı málimetke sáıkes, jyl basynan beri Batys Qazaqstan oblysynda 190 adam alaıaqtardyń arbaýyna túsip, 300 mıllıon teńgege jýyq shyǵynǵa ushyraǵan.

Quzyrly organdar turǵyndardy beıtanys nómirlerden kelgen qońyraýlarǵa saq bolýǵa, jeke derekter men bank shottaryna qatysty aqparatty eshkimge bermeýge shaqyrady. Sonymen qatar, ózin quqyq qorǵaý nemese qarjy uıymdarynyń ókili retinde tanystyratyn azamattardan resmı kýálik talap etý qajet.