Tákappar taýlar jatqan jan-jaǵynda,
Baryp qaıt salqyn jaılaý, maldy aýylǵa.
Bir jer bar «Qarasaz» dep atalatyn,
Kóresiń jolyń túsip barǵanyńda.
Kóresiń kók ormanyn, jylǵalaryn,
Móp-móldir qaınap shyqqan tunbalaryn.
Jylǵanyń jaǵasynda buzylǵan úı,
Sen soǵan eı, jolaýshym, bir qaraǵyn.
Kes-kestep kisi jolyn torymaǵan,
Osynda tirlik etken momyn adam.
Qanshama tyrbansa da sharýanyń
Dáýleti bir-birine qorymaǵan.
Ómirde ózin-ózi ol qul kóripti,
(Kıipti aýystyrmaı bir bórikti...)
Baıǵustyń barsha jurty tilek tilep,
Úıine tuńǵyshy bop ul kelipti.
Toı jasap, torqa tósep shabylmaǵan,
(Demek, toıdyń jabdyǵy tabylmaǵan.)
Ómir deıtin ózgermes mekemeniń
Aldynda ájem meni qabyldaǵan.
Keıin ákem el-jurtyn basqarypty,
(Qashanǵy jarǵaq bórki tastalypty.)
...Jaǵasynda jylǵanyń buzylǵan tam,
Ǵumyrym osy jerden bastalypty.

---