InfoHub Logo

Bul pikirdi QR Ulttyq ǵylym akademıasynyń prezıdenti Murat Jurynov bildirdi.

«Elbasynyń bul jolǵy Joldaýy bılik tarmaqtary arasyndaǵy ókilettikterdi bólýge qatysty úndeýimen baılanysty órbidi. Onda Prezıdentimiz 5 baǵytta basymdyq jarıalap otyr. Onyń birinshisi jedel tehnologıalyq jańǵyrýǵa qatysty. Bul baıaǵydan aıtylyp kele jatqan jaıt. Biraq, muny endigi ýaqytta jańa deńgeıge kóterip otyr. 2020 jylǵa deıingi ındýstrıaldy-ınnovasıalyq strategıamyzdy qurdyq. Endi ony jańa beleske kóterip, jedel tehnologıalyq jańǵyrtýymyz kerek», - dedi ol.

Akademıa prezıdentiniń paıymynsha, óndiris oshaqtaryna memlekettiń ekonomıkasyna paıda keltiretindeı jaǵdaılar jasamaı qoǵam alǵa qaraı damymaıdy. Óıtkeni, qoǵamdy damytý úshin qarjy kerek.

«Prezıdent Qazaqstanǵa ekonomıkalyq paıda ákelip otyrǵan birneshe baǵyttardy atady. Ol - taý-ken, munaı-gaz óndirý jáne munaı hımıasy salalary. Bul eki sala bizdiń ekonomıkamyzdyń úshten ekisin berip otyr. Odan keıin aýyl sharýashylyǵy salasy bar. Bizdiń jerimiz baı, aýyl sharýashylyǵyna, mal sharýashylyǵyna qolaıly. Endi sony ıgerý úshin bilim kerek, ǵylym kerek. Bul saladan da Qazaqstan Azıa elderiniń arasynda bilimi men ǵylymy damyǵan memleket», - dedi Jurynov.
Sonymen qatar ol shaǵyn jáne orta bıznesti kúsheıtý qajettigin atap ótti.

«Biz demokratıa kerek deımiz. Demokratıa bolýy úshin halyqtyń 60-70 paıyzy orta býynǵa enýi kerek. Onyń aılyǵynan basqa da tabysy, otbasynda qory bolýy tıis. Shaǵyn jáne orta bıznes 60-70 paıyz bolǵan kezde, olar ózderiniń partıasyn, kásipodaǵyn qurýy múmkin. Mine, sonda demokratıa bolady. Kedeı elde eshqashan demokratıa bolmaıdy. Ony myń jerden Konstıtýsıaǵa jazyp qoısań da», - dedi ol.

Jurynov jemqorlyqty joımaı birde-bir zań jumys istemeıtindigin de basa aıtty.

«Jalpy, Joldaýda jaqsy-jaqsy jańalyqtar aıtyldy. Endi ony tıanaqty oryndaı alsaq, qoǵam alǵa jyljıdy», - dedi akademık.

---