InfoHub Logo

Qazaq ádebıeti men qoǵamdyq ómirinde ózindik orny bar tulǵa, belgili aqyn ári qoǵam qaıratkeri Zýqaı Shárbaqynuly ómirden ozdy. Bul týraly Qazaqstan Jazýshylar odaǵy habarlady. Aqynnyń eli úshin atqarǵan eńbegi men qaldyrǵan rýhanı murasy erekshe.

Bul týraly Infohub.kz aqparat agenttigi habarlaıdy.

Zýqaı Shárbaqynulynyń ómir joly

1940 jyly Mońǵolıada dúnıege kelgen Zuqaı Shárbaqynuly bilimin Monǵol Pedagogıkalyq ınstıtýty men Partıa joǵary mektebinde alǵan. Eńbek jolyn Monǵolıanyń Baıan-Ólgıı aımaǵynda sport jáne ákimshilik salalarynda jaýapty qyzmetter atqarýdan bastaǵan.

1960 jyldardan bastap ádebıetke den qoıyp, óleń, dastan, poema, tarıhı hıkaıalar men ǵumyrnamalyq shyǵarmalar jazdy. 1970-1990 jyldar aralyǵynda Monǵolıada «Kókpar», «Aq jańbyr», «Syr marjandary», «Kóńildiń kókjıegi», «Jaılaý sazy» sıaqty óleń jınaqtary jaryq kórdi.

Qazaqstanǵa oralǵannan keıingi eńbegi

1992 jyly ata-baba jerine oralǵannan keıin de Zuqaı Shárbaqynuly belsendi eńbek etti. Ol sovhoz dırektorynyń orynbasary, Aqmola oblystyq kóshi-qon basqarmasynda aǵa maman bolyp qyzmet atqardy. Qazaqstan jerinde «Kıeli qannyń tamshysy», «Nar tulǵa», «Bederli ǵumyr», «Qıada túlegen qyran», «Qoıtasty qoınaýy jasyrǵan syr» syndy prozalyq kitaptary men «Aıbynym - Atamekenim», «Aspan asty – keń meken», «Tylsym tirlik taǵylymy», «Ómirdiń óń bederi», «Qart júrektiń alaýy» sıaqty óleńder jınaǵy jaryq kórdi.

20-dan astam kitaptyń avtory bolǵan Zuqaı Shárbaqynuly kóptegen jyr múshaıralarynyń júldegeri atandy. Ol 1975 jyldan Monǵolıa Jazýshylar odaǵynyń, 1993 jyldan Qazaqstan Jazýshylar odaǵynyń múshesi boldy.

Eldiń kóńil aıtýy

Jazýshylar odaǵynyń habarlamasynda: “Marqumnyń týǵan-týystary men jaqyndaryna, qalamdas áriptesterine qaıǵyra kóńil aıtamyz. Qazaq ádebıeti men rýhanıaty úshin orny bólek, sóz ónerine adal qyzmet etken qalamgerdiń qazasy – barsha el úshin orny tolmas aýyr qaıǵy. Artynda óshpes iz, taǵylymdy mura qaldyrǵan ardaqty tulǵanyń jarqyn beınesi halyq jadynda máńgi saqtalady”, - delingen.