InfoHub Logo

Tóle bıdiń týǵan jıeni Eskeldi on alty-on segiz jasar shamasynda osy naǵashysynyń aýylyna barady. Sol kezde «Sabalaq» atalyp ketken balań jigittiń túıe baǵyp júrgen kezi eken. Bári bas qosyp otyrǵan bir sátte sol Sabalaq Tóle bıge qarap:

— Uly bı, meniń de qalmaqqa qarsy attanatyn kezim jetken sıaqty. Maǵan batańyzdy berińiz — depti. Sonda Tóle bı:

— Bolat kezdik qyn túbinde jatpasyn bilgenmin. Jolyń bolsyn, bara ǵoı! — dep batasyn beredi.

Ketip bara jatqan Sabalaqty Eskeldi toqtatyp:

— Batyr, mynalardy esińe usta, — dep tóbesindegi taqıasyn kóterip basyna eki soǵady, belbeýin sheship joǵary kóteredi de, tilin shyǵaryp, qolyn bulǵaıdy. Sabalaq basyn ızep shyǵyp ketedi. Jaýyna tutqıyldan shapqan Sabalaq jaýdyń betin qaıtarǵanymen, olardyń bekinisin ala almaıdy. Qalyń qoldyń eńsesi túsip, qaıtpaq syńaı tanytady. Sonda Abylaı:

— Tóle bıdiń janynda otyrǵan balań jigit maǵan aqyl aıtyp edi, sony oryndasaq, bul qamaldy alyp qalarmyz, — deıdi.

— Ol qandaı aqyl?

— «Qalmaqtyń bekinisi myqty. Birinshi ret ala almassyń, ekinshi ret shap. Jaı shappa, belbeýińdi tý ǵyp kóterip, «Abylaılap» shap!» degen edi. Odan keıin aýzyn ashyp, tilin kórsetkeni — «bekinis alynar, biraq tilińe ıe bol, eshkimge-til tıgizbe» degeni. Qazaq, qalmaq áýelde bir týysqan. «Eldiń ıesi, jerdiń kıesi bolady» degen, aýzyńa abaı bol dep edi.

Osyny aıtqan Sabalaq belbeýin tý etip «Abylaılap» at qoıady. Qaıta shabýyldy kútpegen qalmaq jaǵy jeńilis taýyp, qamaldyń qaqpasyn ashady. Sabalaq (Ábilmansur) osydan bylaı Abylaı atanyp, keıin han saılanady, Eskeldi bı bas ýázir bolady...

---