InfoHub Logo

Qazaqstan Respýblıkasynyń Bas prokýratýrasy terorızmdi nasıhattaý jáne jalǵan aqparat taratý úshin qylmystyq jaýapkershilikke tartý týraly eskertý jasady. Bul týraly Tengrinews.kz habarlady.

Qylmystyq kodekstiń 256-baby («Terorızmdi nasıhattaý nemese lańkestik akti jasaýǵa jarıa shaqyrý») boıynsha jaza – 5 jyldan 9 jylǵa deıin bas bostandyǵynan aıyrý jáne múlikti tárkileý. Eger bul áreketter buqaralyq aqparat quraldary, telekomýnıkasıa jelileri nemese onlaın-platformalar arqyly jasalsa, jaýapkershilik kúsheıip, 12 jylǵa deıin bas bostandyǵynan aıyrýǵa deıin barady.

«Lańkestikke qoldaý kórsetýdiń tek tikeleı shaqyrýlar ǵana emes, ózge de formalary qylmystyq jazalanatynyn atap ótken jón. Atap aıtqanda, jasalǵan lańkestik aktini maquldaý nemese qoldaý, sonyń ishinde áleýmettik jelilerdegi pikirler nemese ózge de jarıalanymdar túrindegi qoldaý da terorızmdi nasıhattaý retinde baǵalanady», - dep eskertti Bas prokýratýra.

Konstıtýsıamen kepildendirilgen sóz bostandyǵy konstıtýsıalyq qurylysty kúshtep ózgertýdi, memlekettiń aýmaqtyq tutastyǵyn buzýdy, memleket qaýipsizdigine nuqsan keltirýdi, soǵysty, sondaı-aq zorlyq-zombylyq pen qatygezdik kúltin nasıhattaýǵa nemese úgitteýge jol bermeıtinin atap ótti.

Internette jáne áleýmettik jelilerde mektepter, saýda ortalyqtary, áýejaılar, vokzaldar jáne basqa da áleýmettik mańyzy bar nysandarǵa jarylǵysh zat qoıylǵany týraly jalǵan habarlamalar jıi taralady. Mundaı áreketter úshin 5 jylǵa deıin bas bostandyǵynan aıyrý jazasy qarastyrylǵan.

«Ótken jyly jalǵan terorızm faktileri boıynsha sotqa 25 qylmystyq is joldandy. Onyń birinde 11-synyp oqýshysy, ózge azamattyń aty-jónin paıdalanyp, daýsyn ózgertip, IP-mekenjaıdy aýystyrý baǵdarlamalaryn qoldanyp, Jetisaı qalasyndaǵy mektepterdiń birine jarylǵysh qurylǵy qoıylǵany týraly polısıaǵa habarlaǵan. Óz tulǵasyn jasyrýǵa tyrysqanyna qaramastan, qońyraý shalǵan azamat anyqtalyp, 1 jyl merzimge bas bostandyǵyn shekteýge sottaldy. Basqa bir jaǵdaıda Aqtaý qalasynyń turǵyny bilim berý mekemeleriniń birinde bomba bar degen jalǵan habarlama úshin 1 jyl 6 aı bas bostandyǵynan aıyryldy», - dep habarlady Bas prokýratýra.

Vedomstvo mundaı árbir habarlama TJM, polısıa, UQK bólimsheleri men jedel járdem brıgadalaryn tarta otyryp, aýqymdy tekserýler júrgizýge sebep bolatynyn eske saldy. Bul tekserýlerge jumsalǵan kúsh pen qarajat ta kináli tulǵalardan óndirip alynady.

«Bas prokýratýra azamattardy sabyrly bolýǵa, al ata-analardy balalarynyń ınternettegi jáne áleýmettik jelilerdegi minez-qulqy men belsendiligine erekshe nazar aýdarýǵa shaqyrady. Tipti beıkúná bolyp kóringen «ázil» de aýyr quqyqtyq saldarlarǵa ákelip soqtyrýy jáne adamnyń taǵdyryn máńgilikke ózgertýi múmkin», - dep tolyqtyrdy vedomstvo.